1. Ko e heigoa ne tutupu he tau 66? (Kikite fakatino he kamataaga.)

MANAMANATU ko e Kerisiano a koe kua nofo i Ierusalema he tau 66. Loga lahi e mena ne tupu. Ko e takitaki Roma ne higoa ko Florus ne kaihā 17 e taleni mai he mena ne toka ai e tau tupe he faituga. Ne mafiti e ita he tau Iutaia. Kelipopo e lautolu e tau kautau Roma tokologa ti talahau kua vevehe kehe mai i Roma. Ka e mafiti e tali atu ha Roma. He tolu e mahina, 30,000 he tau kautau kua takitaki e Cestius Gallus ne pātakai a Ierusalema. Ko e tau tagata totoko Iutaia ne fakamumuli he huaga he faituga, ka e o atu e tau kautau Roma ki tua he kaupā he faituga ti lali ke huhū atu ki loto. Kua kamata e tau tagata oti i loto he maaga ke hopoate. To fēfē e logonaaga haau he kitia e koe e tau mena oti nei?

2. Ko e heigoa he tau Kerisiano kua lata ke taute he kitia e lautolu e tau kautau Roma ne pātakai e maaga ha lautolu, ti maeke fēfē e mena nei?

² He tau tau fakamua atu, ne hataki e Iesu e tau tutaki haana hagaao ke he mena nei ne tupu ti poaki ki a lautolu: “Ka kitia e mutolu kua pātakai a Ierusalema he tau kau, ti iloa ai e mutolu  ke he vaha ia kua tata hana moumouaga. Ko e vaha ia, kia fehola a lautolu ha i Iutaia ke he tau mouga; ko lautolu foki ha i loto he māga ia, kia o kehe a lautolu; ko lautolu foki ha he tau kaina, aua neke huhu a lautolu ki loto he māga.” (Luka 21:20, 21) To maeke fēfē ma lautolu ke omaoma ke he tau fakatonuaga ha Iesu ke toka a Ierusalema ka e pātakai he tau kautau e maaga? Fai mena ofoofogia ne tupu. Ne amanaki e kautau Roma ti toka a Ierusalema! Tuga he talahau e Iesu kua “fakaku” e totokoaga. (Mataio 24:22) He o kehe e tau kautau, ko e magaaho anei ma e tau Kerisiano fakamooli ke omaoma ki a Iesu he fehola fakamafiti ke he tau mouga. * (Kikite matahui tala.) Fakamui, he tau 70, ne liliu e kautau Roma foou ki Ierusalema. Mogonei, ne moumou e lautolu e maaga. Ka ko lautolu oti kua omaoma ke he tau fakaakoaga ha Iesu ne hao.

3. Ko e heigoa e tuaga pihia ka nakai leva ti iloa he tau Kerisiano, ti ko e heigoa ha tautolu ka fakatutala ki ai he vala tala nei?

³ Ko e hatakiaga mo e tau fakatonuaga ha Iesu ne aoga foki ke he vahā ha tautolu. Nakai leva, to haia a tautolu he tuaga pihia foki. Fakaaoga e Iesu e tau mena tutupu he senetenari fakamua ke fakamaama e mena ka hoko he magaaho ka kamata e ‘matematekelea lahi.’ (Mataio 24:3, 21, 29) Tuga ni he hao e tau Kerisiano fakamooli he moumouaga ha Ierusalema, to ha ha i ai e “moto tagata tokologa” ka hao he mahaikava lahi hane hoko mai ke he lalolagi katoa. (Totou Fakakiteaga 7:9, 13, 14.) Kua aoga lahi ke maama e tautolu e mena ne talahau he Tohi Tapu ki a tautolu ke he tau mena nei ka tutupu anoiha. Ko e ha? Ha kua fakavē e tau momoui ha tautolu ki ai. Ti fakatutala a tautolu ke he puhala ka lauia fakatagata a tautolu he tau mena tutupu nei.

4. To kamata fēfē e matematekelea lahi?

⁴ Kamata fēfē e matematekelea lahi? Kamata aki e moumouaga he tau lotu fakavai oti. He Tohi Tapu, ko e lotu fakavai ne higoa ko ‘Papelonia Lahi, ko e matua he tau fifine fakataka.’ (Fakakiteaga 17:5-7) Ko e ha ne higoa e lotu fakavai ko e fifine fakataka? Ha ko e tau akoako i ai ne nakai fakamooli ke he Atua. He nakai lalago fakamooli a Iesu mo e haana Kautu, ne lalago e lautolu e tau fakatufono he tagata mo e fakaheu e tau fakaakoaga he Tohi Tapu ke maeke ke lahi e fakaohoohoaga. Ko e tapuakiaga ha lautolu kua nakai tuga e tapuakiaga meā ha lautolu ne fakauku. (2 Korinito 11:2; Iakopo 1:27; Fakakiteaga 14:4) Ka ko hai ka moumou a Papelonia Lahi? To fakatupu e Iehova e “tau hoe foki ne hogofulu” he “manu favale kula” ke “eke hana finagalo.” Ko e “manu favale kula” ne hukui e Tau Motu Kaufakalataha, mo e “tau hoe foki ne hogofulu” kua hukui e tau pule fakapolitika oti ne lalago atu ki ai.​—Totou Fakakiteaga 17:3, 16-18.

5, 6. Ko e ha ne pehē a tautolu kua kelipopo oti e tau tagata he lotu fakavai ka moumou a Papelonia Lahi?

⁵ To kelipopo oti kia e tau tagata he lotu fakavai ka moumou a Papelonia Lahi? Nakai. Ne omoomoi e Iehova e perofeta ko Sakaria ke tohi hagaao ke he mena ka tupu. He magaaho ia, ko e tagata he lotu fakavai he taha mogo ka pehē: “Nakai ko e perofeta au; ko e tagata gahua fonua au; ha ko e mena fakatupa ai au tali mai haku a vaha fuata. Ti pehe age taha kia ia, Ko e heigoa kia e tau kafokia na ke he tau lima hau? Ti pehe age ai a ia,  Ko e tau mena ia ne kafokia ai au ke he fale he haku a tau kapitiga.” (Sakaria 13:4-6) To fakatupua foki e tau takitaki lotu kua nakai mahani fakalotu a lautolu mo e to fakatikai ne nakai fakalataha a lautolu ke he tau lotu fakavai ia.

⁶ Ko e heigoa e mena ka tupu ke he tau tagata he Atua he magaaho ia? Fakamaama e Iesu: “Aua he fakaku e vaha ia, po kua nakai fakamoui taha; ka e fakaku e vaha ia ha ko lautolu kua fifili.” (Mataio 24:22) He senetenari fakamua, ne “fakaku” e matematekelea i Ierusalema. Fakaatā he mena nei a “lautolu kua fifili,” ko e tau Kerisiano fakauku, ke fehola. He puhala pihia, ko e vala fakamua he matematekelea lahi to “fakaku” ha ko “lautolu kua fifili.” Ko e tau pule fakapolitika, “ko e tau hoe . . . ne hogofulu,” ka nakai fakaatā ke moumou e tau tagata he Atua. Ka e, to ha ha i ai e magaaho kū kua milino ka oti agataha e totokoaga fakamua.

7, 8. Ko e heigoa e mena kua lata ke taute he magaaho ka mole e moumouaga he lotu fakavai, ti kehe fēfē e tau tagata he Atua he magaaho ia mai he tau tagata oti ne toe?

⁷ Ko e heigoa ka tupu he mole e moumouaga he lotu fakavai? Ko e magaaho ke fakakite mooli e tautolu e mena ne toka he tau loto ha tautolu. He magaaho ia, to laulahi he tau tagata kua eketaha ke moua e puipui mo e lagomatai mai he tau fakatokatokaaga tagata, ko e “tau kaumaka he tau mouga.” (Fakakiteaga 6:15-17) Ka e onoono atu e tau tagata ha Iehova ki a ia ma e puipuiaga. He “fakaku” e totokoaga he senetenari fakamua, nakai ko e magaaho ma e tau Iutaia oti ke amanaki ti liliuina ke he lotu Kerisiano. Ka ko e magaaho haia ma lautolu ne fitā he eke mo tau Kerisiano ke fehola kehe mai i Ierusalema tuga ne hataki e Iesu. He puhala pihia anoiha, ka “fakaku” e totokoaga ki a Papelonia Lahi, kua nakai amanaki a tautolu to tokologa e tagata ka amanaki ti liliuina ke he lotu Kerisiano mooli. Ka ko e magaaho a ia ma e tau tagata tapuaki mooli oti ke fakakite ha lautolu a fakaalofa ki a Iehova mo e lalago a lautolu ne fakauku.​—Mataio 25:34-40.

⁸ Nakai iloa tonu e tautolu e mena ka tupu he magaaho ia ka kamatamata. Ka e, amanaki a tautolu to nakai mukamuka e moui mo e ko e mena ia to lata ia tautolu ke tuku kehe e tau manako fakatino ha tautolu. He senetenari fakamua, ne toka he tau Kerisiano e tau kaina ha lautolu ti fakauka ke he tau mena vihi ke maeke ke momoui. (Mareko 13:15-18) Lata ia tautolu ke hūhū hifo: ‘Mautali nakai au ke toka kehe e tau mena fakatino? Makai nakai au ke taute e tau mena kua latatonu ke fakatumau e mahani fakamooli ki a Iehova?’ Manamanatu la! He magaaho ia, ko tautolu ni ka tapuaki ke he ha tautolu a Atua pete ni e tau mena ne tutupu, tuga e perofeta ko Tanielu.​—Tanielu 6:10, 11.

9, 10. (a) Ko e heigoa e fekau ka fakapuloa he tau tagata he Atua he mogo matematekelea lahi? (e) To tali atu fēfē e tau fī he tau tagata he Atua?

⁹ Nakai ko e matematekelea lahi e mogo  ke fakamatala e ‘tala mitaki he kautu.’ Ko e magaaho ke fakamatala e fekau ia kua mole tuai. To hoko mai e magaaho ma e “fakaotiaga”! (Mataio 24:14) To fakapuloa he tau tagata he Atua e fekau malolō he fakafiliaga ka lauia e tau tagata oti kana. Ko e fekau kua liga teitei moumou katoatoa e lalolagi kelea ha Satani. Kua fakatatai he Tohi Tapu e fekau nei ke he tau uha tuli he pehē ai: “Kua to mai foki mai he lagi ki luga he tau tagata e uha tuli mahaki tuga ne taleni hana mamafa; ti vagahau kelea ai e tau tagata ke he Atua, ha ko e malaia he uha tuli, ha kua lahi ue atu e malaia ia.”​—Fakakiteaga 16:21.

¹⁰ To logona he tau fī ha tautolu e fekau malolō nei. Ne omoomoi e Iehova e perofeta ko Esekielu ke fakamaama e puhala ka tali atu he matakau he tau motu, ne fakahigoa he Tohi Tapu ko Koku ha Makoku: “Kua pehe mai e vagahau he Iki ko Iehova, Ko e vaha ia to tutupu ai e tau mena ke he loto hāu, to manamanatu ai foki a koe e tau manatu kelea; To pehe a koe, To hake au ke he motu ha i ai e tau māga kua nakai nonofo taue; to fano au kia lautolu kua nonofo fakatekiteki, ko lautolu kua nonofo fakahanoa, ko lautolu oti kua nonofo mo e nakai fai kaupa a lautolu, to nakai fai fakamau fakalava a lautolu, po ke tau gutuhala. Kia uta ai e tau mena ne moua he tau, ke uta foki e tau mena ne fofo he tau, ke hoko e lima hāu ke he tau mena ne eke mo tau mena kua moumou, ka ko ainei kua kakai tuai, ko e motu foki kua fakapotopoto mai he tau motu kehe, ha ha ia lautolu e tau manu mo e tau koloa, kua nonofo a lautolu ke he lotouho he lalolagi.” (Esekielu 38:10-12) To kehe mamao e tau tagata he Atua mai he tau tagata oti ne toe, tuga kua nonofo a lautolu ke he “lotouho he lalolagi.” To nakai maeke he tau motu ke tautaofi ne lautolu a lautolu. Kua makai a lautolu ke totoko a lautolu ne fakauku ha Iehova mo e tau tagata ne lalago ki a lautolu.

11. (a) Ko e heigoa ha tautolu kua lata ke manatu ke he fakapapahiaga he tau mena tutupu he mogo matematekelea lahi? (e) To tali atu fēfē e tau tagata ka kitia e lautolu e tau fakamailoga?

¹¹ Ko e heigoa e mena ka tupu mogonei? Nakai talahau he Tohi Tapu ki a tautolu e fakapapahiaga mooli he tau mena tutupu, ka e liga to hohoko e falu mena tutupu he magaaho taha. He perofetaaga ha Iesu hagaao ke he fakaotiaga he fakatokaaga nei, pehē a ia: “To ha i ai foki e tau fakamailoga ke he la, mo e mahina, mo e tau fetu; ha he lalolagi foki e matematekelea he tau motu ke he fakahakuhaku; ke go foki e tahi mo e loka; To mamate foki e tau tagata he matakutaku mo e talifaki ke he tau mena ke hohoko mai ke he lalolagi; he ko e mena lulululu ai e tau kau he lagi. Ati kitia ai e lautolu e Tama he tagata kua hau ke he aolagi, mo e malolo, mo e lilifu lahi.” (Luka 21:25-27; totou Mareko 13:24-26.) To putoia nakai e fakamooliaga he perofetaaga nei ke he tau fakamailoga matakutakuina mo e tau mena tutupu he lagi? Kua lata ia tautolu ke fakatali ke iloa. Ka e iloa e tautolu ka kitia he tau fī he Atua e tau fakamailoga, to matakutaku a lautolu ti hopoate.

12, 13. (a) Ko e heigoa ka tupu he magaaho ka hau a Iesu “mo e malolo, mo e lilifu lahi”? (e) To fēfē e tali atu he tau fekafekau he Atua he magaaho ia?

¹² Ko e heigoa ka tupu he mogo ka hau a  Iesu “mo e malolo, mo e lilifu lahi”? To palepale e ia a lautolu kua mahani fakamooli ka e fakahala a lautolu kua nakai mahani fakamooli. (Mataio 24:46, 47, 50, 51; 25:19, 28-30) Ne fakaaoga e Iesu e fakatai ke fakamaama fakamatafeiga aki e mena nei. Pehē a ia: “Ka hau e Tama he tagata mo e hana lilifu, ko e tau agelu tapu oti foki fakalataha mo ia, ti nofo ai a ia ke he hana nofoaiki lilifu; To fakapotopoto ki mua hana e tau motu oti kana; ati vevehe kehekehe ai e ia a lautolu, tuga e leveki mamoe kua vevehe e tau mamoe mo e tau koti; To tuku e ia e tau mamoe ke he hana fahi matau, ka ko e tau koti ke he fahi hema.” (Mataio 25:31-33) Ko e heigoa e mena ka tupu ke he tau mamoe mo e tau koti? To fakafili a lautolu. Ko e tau koti, po ko lautolu ne nakai mahani fakamooli, to “o atu ai a lautolu ke he fakahala tukulagi.” Ka ko e tau mamoe, po ko lautolu ne mahani fakamooli, to moua e moui tukulagi.​—Mataio 25:46.

¹³ To fēfē e tali atu he tau koti ka mailoga e lautolu to fakamahakava a lautolu? To “tagi tatuki ai” a lautolu. (Mataio 24:30) Ka e to tali atu fēfē a lautolu ne fakauku mo e tau tagata ne lalago ki a lautolu? To taute e lautolu e mena ne tala age e Iesu: “Ka kamata he eke e tau mena ia kia kitekite hake mo e haga hake a mutolu; ha kua tata tuai ha mutolu a fakamouiaga.”​—Luka 21:28.

14, 15. Ko e heigoa e gahua fakapotopoto ka tupu he mole e kamata a Koku ha Makoku ke totoko, ti tupu fēfē e mena nei?

¹⁴ Ko e heigoa ka tupu ka mole e kamata a Koku ha Makoku ke totoko e tau tagata he  Atua? Pehē e Tohi Tapu ko e Tama he tagata to “fakafano atu ai e ia hana tau agelu, ke fakapotopoto e lautolu hana tau tagata ne fifili, mai he tau matamatagi ne fa; ke kamata he potu he lalolagi, ati hoko atu ke he patu lagi.” (Mareko 13:27; Mataio 24:31) Ko e gahua fakapotopoto nei ne nakai hagaao ke he magaaho ka fifili fakamua e tau Kerisiano fakauku. Ti nakai hagaao ke he fakamau fakamailoga fakahiku ha lautolu ne fakauku kua ha ha agaia he lalolagi. (Mataio 13:37, 38) Ko e fakamau fakamailoga ia kua tupu ato kamata ai e matematekelea lahi. (Fakakiteaga 7:1-4) Ti ko e heigoa e gahua fakapotopoto nei? Ko e magaaho ka moua e lautolu ne fakauku kua ha ha agaia he lalolagi e palepale ha lautolu ti o hake ke he lagi. (1 Tesalonia 4:15-17; Fakakiteaga 14:1) To tupu e mena nei he taha magaaho ka mole e kamata a Koku ha Makoku ke totoko atu. (Esekielu 38:11) Ti tuga ni he talahau e Iesu, “ati kikila ai a lautolu kua tututonu tuga ne la ke he kautu he Matua ha lautolu.”​—Mataio 13:43. * (Kikite matahui tala.)

¹⁵ Kakano kia e mena nei to “hamutia” a lautolu ne fakauku? Tokologa e tagata he Kerisitenitome ne talitonu to tahake fakatino tagata e tau Kerisiano ke he lagi. Manatu foki a lautolu to kitia e lautolu a Iesu ka hifo mai ke pule ke he lalolagi. Ka e fakakite fakamaali he Tohi Tapu kua nakai kitia e liu mai ha Iesu, he pehē ai: “Ati kitia ai ke he lagi e fakamailoga he Tama he tagata” mo e to hau a Iesu ke he “tau aolagi.” (Mataio 24:30) Talahau foki he Tohi Tapu kua “nakai maeke ke uta e kautu he Atua ma lautolu ha he tino kakano mo e toto.” Ti ko lautolu ka tahake ke he lagi to lata fakamua ke ‘faliu, to fakaofo ni tuga e magaaho ke kemo ai e mata, ka fakatagi e pu ke fakaoti ai.’ * (Kikite matahui tala.) (Totou 1 Korinito 15:50-53.) Nakai fakaaoga e tautolu e kupu “hamutia” hinei ke fakamaama aki e mena nei ne tupu ha kua matutaki ai ke he fakaakoaga fakavai he Kerisitenitome. Ka ko lautolu ne fakauku kua fakamooli ne ha ha agaia ke he lalolagi to fakapotopoto agataha ai a lautolu.

16, 17. Ko e heigoa ka hoko ato taute e kitofaitane he Punua Mamoe?

¹⁶ Ka haia oti e 144,000 ne fakauku ke he lagi, to maeke ke kamata e tau tauteuteaga fakahiku ma e taonaga he Punua Mamoe. (Fakakiteaga 19:9) Ka e fai mena foki kua lata ke hoko ato taute e matafekau fiafia lahi ia. Manatu to totoko e Koku e tau tagata he Atua ka e ha ha agaia a lautolu ne fakauku ne toe he lalolagi. (Esekielu 38:16) To tali atu fēfē e tau tagata he Atua? To omaoma e lautolu e tau fakatonuaga nā: “Nakai tau a mutolu ke he tau nai; kia tutu a a mutolu, kia tutu a mutolu, mo e kitekite atu a mutolu ke he fakamouiaga mai ia Iehova ko ia ha ha ia mutolu; . . . aua neke matakutaku a mutolu, ti ua fakaatukehe a mutolu.” (2 Nofoaga he Tau Patuiki 20:17) Fai magaaho he mole e kamata ha Koku ke totoko, to tahake oti a lautolu ne fakauku kua toe ne ha ha he lalolagi ke he lagi. Ti talahau he Fakakiteaga 17:14 ki a tautolu e tali atu he lagi ke he totoko ha Koku. Ko e tau fī he tau tagata he Atua “to tau a lautolu nai ke he Punua mamoe, ka e kautu e Punua mamoe kia lautolu; ha ko ia ko e Iki he tau iki mo e Patuiki  he tau patuiki, ko lautolu foki kua fakalataha mo ia kua uiina, mo e fifili, mo e fakamoli.” Ti ko Iesu, fakalataha mo e haana tau patuiki 144,000 ne fakauku he lagi, ka laveaki e tau tagata he Atua he lalolagi nei.

¹⁷ Ko e laveakiaga ia to fua ke he tauaga i Amaketo, ka tamai e fakahekeaga ke he higoa tapu ha Iehova. (Fakakiteaga 16:16) Ko lautolu oti ne fakafili ko e tau koti, po ke kua nakai mahani fakamooli, to fakamahakava. To nakai liu foki fai mahani kelea he lalolagi, mo e to hao e “moto tagata tokologa” i Amaketo. Fakahiku ai, maeke ke fakakatoatoa e fakahikuaga fiafia he tohi a Fakakiteaga, ko e kitofaitane he Punua Mamoe! (Fakakiteaga 21:1-4) * (Kikite matahui tala.) Ko lautolu oti ne hao ke he lalolagi to fiafia e taliaaga he Atua mo e moua e fakaalofa lahi mo e loto fakamokoi haana. Amaamanaki lahi atu a tautolu ke he magaaho ia. Ko e taonaga mooli he kitofaitane a ia!​—Totou 2 Peteru 3:13.

18. Ko e tau mena tutupu fiafia ka nakai leva ti hohoko mai, ko e heigoa kua lata ia tautolu ke eketaha ke taute?

¹⁸ Nakai leva to hoko mai e tau mena tutupu fiafia nei, ko e heigoa kua lata ia tautolu takitokotaha ke taute mogonei? Ne omoomoi e Iehova e aposetolo ko Peteru ke tohi: “Ko e hanai, to fakaotioti e tau mena oti ia, po ke fefe ha mutolu a mahani ke lata ai ke he tau mahani mitaki mo e tau mahani Atua; Kua fakatalitali mo e foli atu kia hoko mai e aho he Atua . . . Haia ni, ko e tau fakahelehele na e, ha ha ne fakatalitali ke he tau mena ia, kia lalilali atu a mutolu, kia moua e ia a mutolu mo e monuina, kua nakai fai ila, mo e nakai talahaua kelea.” (2 Peteru 3:11, 12, 14) Kia eketaha mogoia a tautolu ke tumau e tapuakiaga ha tautolu ke meā, ti nakai fai matutakiaga ke he lotu fakavai, mo e lalago e Patuiki he Mafola, ko Iesu Keriso.