IA IUNI 1970, ne takoto au he mohega fale gagao ha Pennsylvania i Amerika. Ko au ko e kautau ne 20 e tau he moui ne matematekelea ha ko e pikitia hagahaga kelea lahi mahaki. Ne fakakia he nosi taane e malolō he toto haaku he tau hafa tulā oti. Ko e nosi ne fai tau he fakamua ia au ne tupetupe e onoonoaga. He matutaki e toto haaku ke hifo fakahaga, ui au, “Kua kitia nakai a koe ha tagata kua mate?” Ne hina e fofoga haana ti tali a ia, “Ai la kitia.” Tuga ke nakai moui au, ka e moui ni au. To tala atu e au falu tala ke he moui haaku.

Ne gagao au he mogo ne gahua mo e tau matini he poko iihi he felakutaki i Vietnam. Ka kua fiafia au he lagomatai a lautolu ne gagao mo e pakia ti ha ha ia au e foliaga ke eke mo ekekafo iihi. Hoko atu au ki Vietnam ia Iulai 1969. Tuga e tau kautau foou, ne fakaatā ki a au taha e faahi tapu ke fakamahani ke he hikiaga he magaaho mo e matagi vela.

Kua kotofa au ke gahua he fale gagao he tau kautau i Mekong Delta. Loga e kautau ne pakia kua tamai he helikopotā ke he fale gagao. Na fiafia lahi au ke he motu haaku mo e fiafia ke gahua, ti manako au ke lagomatai mafiti e tau tagata haaku he motu. Ne tauteute e tau kautau ne pakia ke iihi ti ta atu mafiti ke he tau puha lapatoa ikiiki ne fai matagi fakahahau ne fakaaoga mo tau poko iihi. Ko e ekekafo iihi, ekekafo fakaligo, mo e tokoua e nosi kua eketaha a lautolu ke fakahao e tau momoui. Mailoga e au e tau taga uli lalahi ne nakai tuku mai ki fafo he tau helikopotā. Fakailoa ai ki a au ko e tau taga ia ne toka ai e tau vala kakano he tau kautau ne maheveheve e tau tino he malētau. Ko e taha iloaaga fakamua ia haaku he felakutaki.

Ne logona fakamua e au e kupu mooli mai he Tau Fakamoli a Iehova he tote au. Fakaako he matua fifine haaku e Tohi Tapu mo e Tau Fakamoli, ka e nakai papatiso a ia. Na fiafia lahi agaia au he fano ke he tau fakaakoaga ia. Taha aho ne momole a maua mo e matua taane ke uaaki haaku he Fale he Kautu. Hūhū au ki a ia, “Ko e heigoa a kō?” Tali e ia, “Ua fano fakatata ke he tau tagata ia!” He  ofania mo e falanaki e au e matua taane ke uaaki haaku, kua omaoma au ti nakai liu feleveia mo e Tau Fakamoli a Iehova.

Ka e mogo ne liu mai au i Vietnam, loga e manatu mamahi haaku. Ha ko e tau mena ne iloa e au he felakutaki, nakai ha ha ia au ha logonaaga. Tuga kua nakai fai tagata ne maama mooli e tau mena ne tutupu i Vietnam. Manatu e au he logona e tau tagata totoko ne ui e tau kautau Amerika ko e tau tagata tamate tama mukemuke ha ko e tau hokotaki ne talahau kua kelipopo e tau fanau nakai agahala. Ko e tau mena oti nei ne taute au ke logona hifo kua lata au ke fai fakafetuiaga mo e Atua.

He kumi haaku ke he Atua, ne kamata au ke fano ke he tau tapu kehekehe. Ne fakaalofa tumau au ke he Atua, ka e nakai manako au ke he tau mena ne kitia e au he tau tapu ia. Fakahiku ti fano au ke he Fale he Kautu Delray Beach i Florida. Ko e feleveiaaga fakamua haaku he Aho Tapu ia Fepuari 1971.

He hū atu au ke he Fale he Kautu, ko e fakaoti a ia he lauga ke he toloaga ti nofo au ma e Fakaakoaga Watchtower. Nakai manatu e au e matapatu he vala tala, ka e manatu e au he kitekite ke he tau fanau ne kumi e tau kupu tohi he tau Tohi Tapu ha lautolu. Nava lahi au! Ne fanogonogo mo e kitekite noa ni au. He amanaki au ke fano, ko e matakainaga taane ne kavi ke he 80 e tau he moui ne hau ki a au. Ko e higoa haana ko Jim Gardner. Ne fakaolo mai e ia ki a au e tohi The Truth That Leads to Eternal Life ti hūhū, “Fakamolemole to talia nakai e koe e mena nai?” Ē he ui e au, ti fifili a maua ke feleveia ma e fakaako Tohi Tapu fakamua haaku he pogipogi Tuloto.

He mole e feleveiaaga he Aho Tapu, ne fano au ke gahua. Na gahua au he fale gagao i Boca Raton i Florida, ti fakatoka au ke gahua he matahola 11 he pō ke he matahola 7 he pogipogi. Nakai tokologa lahi e tagata gagao he pō ia, ti maeke au ke totou e tohi Truth. Ne uta he nosi e tohi ia au, onoono ke he kili, ti manako lahi ke iloa kua eke kia ne fai au mo taha he Tau Fakamoli a Iehova. Liuaki mai e au e tohi ti tala age ki a ia pete kua fai vala he tohi ne totou e au, kua manamanatu mooli au ke eke mo Fakamoli. Toka e ia au, ti oti e tohi he totou e au he pō ia.

Kamata e fakaakoaga Tohi Tapu fakamua haaku mo e Matakainaga ko Gardner he hūhū, “Ti ko e heigoa ha taua ka fakaako ki ai?” Tali e ia, “He tohi ne atu e au ki a koe.” Pehē au, “Fitā he totou ai e au.” Talahau totonu he Matakainaga ko Gardner, “Fakatutala na taua ke he veveheaga fakamua nei.” Ofomate au he loga e vala tala ikiiki ne nakai mailoga e au. Pehē a ia ki a au ke fakakia e tau kupu tohi loga he Tohi Tapu King James Version haaku. Ko e fakaako laia au hagaao ke he Atua mooli ko Iehova. Tolu e veveheaga he tohi Truth ne fakaako e Jim mo au he pogipogi ia. Mole ia, fakaako e maua tolu e veveheaga he tau pogipogi Tuloto takitaha. Fiafia lahi mahaki au ke he tau fakaakoaga ia. Ko e lilifu lahi ma haaku ke fakaako he  matakainaga fakauku ia ne iloa a Charles T. Russell!

Fai faahi tapu he mole e fakaako, ne fakaatā au ke fakamatala e tala mitaki. Nakai mukamuka e fakamatala he taha fale ke he taha fale ki a au, ka e lagomatai e Jim au ke fahia ke he tau tupetupe haaku. (Gahua 20:20) Ha ko e lagomatai haana, ne fakaako au ke fiafia lahi ke he gahua he fonua. Logona hifo e au ko e gahua he fonua e lilifu mua ue atu ne moua e au. Fiafia lahi au ha kua eke au mo ekegahua he Atua!​—1 Korinito 3:9.

To tala atu e au mogonei taha mena uho lahi ki a au, ko e fakaalofa fakamua haaku ki a Iehova. (Fakakiteaga 2:4) Ko e fakaalofa ia ki a Iehova kua lagomatai au ke fakauka ke he tau manatu mamahi mai he felakutaki mo e tau lekua loga foki.​—Isaia 65:17.

He 1971, ne tala mai ki a au ke fano kehe he poko ne fakaatā he tau matua haaku au ke nofo ai. Ko e ha? Nakai manako e matua taane ke uaaki haaku ke nofo taha he Tau Fakamoli a Iehova i ai! Nakai loga lahi e tupe haaku mogoia. Ne totogi ni he fale gagao au he tau faahi tapu ua oti, ti lahi e tupe haaku ne fakaaoga ke he tau mena tui ma e gahua he fonua ha kua manako au ke fakailoa fakamitaki a Iehova. Fai tupe au ne toka he pege, ka e haia he taone ne tupu hake au i Michigan. Ti fai aho he nofo ai au he motokā haaku. Ne koukou mo e hifi e hafe haaku he tau fale tote he tau utuaga penisini.

Taha aho he nofo agaia au he motokā haaku, tuku e gahua haaku he fale gagao ti fano ke he Fale he Kautu, fai tulā ato kamata e feleveiaaga ma e gahua he fonua. He nofo au i tua he Fale he Kautu he mena ne nakai maeke ha tagata ke kitia au, ne liu mai e tau manatu i Vietnam ki a au. Tuga na  hohogo agaia e au e tau vala he tino he tagata kua vela mo e kitia oti e toto, ti kamata au ke fakaatukehe. Tuga na logona mo e kitia agaia e au e tau fuata taane ne olelalo ki a au: “To moui nakai au? To moui nakai au?” Ne iloa e au to mamate a lautolu, ka e lali au ke fakamafana a lautolu mo e fakatupua to mitaki e tau mena oti. He nofo au i ai, ne tupetupe lahi mahaki e tau logonaaga haaku.

Ne tagi lahi au he liogi ki a Iehova. (Salamo 56:8) Kamata au ke manamanatu fakahokulo ke he liu tu mai. Ko e magaaho ia ne mailoga e au kua homo ue atu e amaamanakiaga nei! To fakaliu tu mai e Iehova e tau fuata taane ia ke he moui, mo e to moua e lautolu e magaaho ke fakaako e kupu mooli hagaao ki a Ia. To utakehe he liu tu mai e mamahi mo e matematekelea oti ne lauia ai a tautolu. (Gahua 24:15) He maama e au e mena ia, ne malolō lahi e fakaalofa haaku ki a Iehova nakaila pihia fakamua. Ne uho agaia e aho ia ki a au. Tali mai ai, ka fai lekua au he moui, eketaha au ke manatu e fakaalofa fakamua haaku ki a Iehova.

Ne taute he tau tagata e tau mena kelea lahi he felakutaki, ti taute foki e au. Ka kua mafanatia au he manamanatu fakahokulo ke he ua e kupu tohi haaku ne fiafia lahi ki ai. Kupu tohi fakamua ia Fakakiteaga 12:10, 11, ne talahau na kautū ke he Tiapolo nakai ni he gahua fakamatala ha tautolu ka e pihia foki ke he toto ha Iesu. Kupu tohi ke uaaki ia Kalatia 2:20, ne fakamanatu mai ki a au na mate a Iesu ma haaku. Fakaaue ke he poa he Keriso, kua fakamagalo e Iehova au ha ko e tau mena ne taute e au. Ti ha ha ia au mogonei e loto manamanatu meā mo e manako malolō lahi ke tala age ke he falu hagaao ke he ha tautolu a Atua fakaalofa noa ko Iehova!​—Heperu 9:14.

He manamanatu au ke he tau mena ne tupu ke he moui haaku, maaliali ai ki a au kua leveki fakamitaki tumau e Iehova au. Ma e fakatai, aho ne iloa e Jim na nofo au he motokā haaku, ne fakafeleveia e ia au ke he matakainaga fifine ne totogi e tau poko nonofo he kaina haana. Talitonu au kua fakaaoga e Iehova a Jim mo e matakainaga fifine ke foaki e kaina mitaki ma haaku. Totonu mooli a Iehova! Leveki e ia e tau tagata tapuaki fakamooli haana.

Ia Me 1971, ne lata au ke fano ki Michigan. To toka e au a Florida, fakapuke e au e motokā haaku aki e tau tohi loga, ti fano hala tokelau. Ato toka foki e au e maagamotu ko Georgia, kua tufa oti e au e tau tohi. Ne fakamatala fakamakutu e au e tala mitaki he Kautu ke he tau matakavi oti ne fano au ki ai. Fakamatala au he tau fale puipui ti age foki e tau tuleke ke he tau tagata taane he tau fale tote he tau matakavi okioki. Fa manamanatu agaia au na fai tagata nakai ne tutala au ki ai ne fakaako e kupu mooli.​—1 Korinito 3:6, 7.

Tala atu mooli e au he mogo fakamua ne fakaako e au e kupu mooli, nakai fakailoilo tumau au, mua atu ka tutala au ke he magafaoa haaku. Falu mogo na talahau fakahako ne au. Na ofania lahi mahaki e au e lafu haaku ko John mo Ron, ti ko e mogo ne fakamatala au ki a laua, lali au ke peehi a laua ke talia e tau taofiaga foou haaku. Fakamui, lata au ke fakamolemole fakalahi. Ka e matutaki au ke liogi ke talia e laua e kupu mooli. Tali mai ai, ne lagomatai e Iehova au ke fakailoilo lahi au ka fakamatala mo e fakaako atu.​—Kolose 4:6.

Ko e fakafetuiaga haaku mo Iehova to tuku fakamua tumau he moui haaku. Ka e ha ha i ai falu ne ofania lahi mahaki e au, mua atu ke he haaku a hoana fakavihi ko Susan. Na manako tumau au ke he hoana ka lagomatai au ke matutaki ke fekafekau ki a Iehova. Ko e fifine fakamakamaka a Susan  ne fakaalofa lahi mahaki ki a Iehova. Taha aho he fakamahani kapitiga a maua, ne ahiahi atu au ki a ia he kaina he tau matua haana i Rhode Island. Ko ia hane nofo he kaupā ne totou he The Watchtower fakalataha mo e Tohi Tapu haana. Ko e mena ne nava lahi au kua kumi oti e ia e tau kupu tohi, pete he nakai totou e ia he vala tala fakaako. Maeke au ke kitia ko e fakafetuiaga haana mo Iehova kua uho lahi ki a ia. Mau a maua ia Tesemo 1971. Fakaaue lahi au ke moua e hoana lagomatai pihia. Ko e mena ne loto fakaaue lahi au, pete ne fakaalofa a ia ki a au, ne lahi atu e fakaalofa haana ki a Iehova.

Kua foaki mai e Iehova ki a maua tokoua e tama taane fulufuluola, ko Jesse mo Paul. He tutupu hake a laua, ne takitaki e Iehova a laua. (1 Samuela 3:19) Ne ha ha ia laua e fakafetuiaga fakatagata mo ia, ti taute he mena nei a maua ke fiafia lahi. Igatia a laua mo e fekafekau mau ki a Iehova ke molea 20 e tau. Ti matutaki a laua ke fekafekau ki a Ia ha kua manatu foki e laua e fakaalofa fakamua ha laua ki a Ia. Matalahi foki au ke he tau figona fifine fulufuluola tokoua haaku ko Stephanie mo Racquel, ne onoono au ki a laua ko e tau tama fifine ni haaku. Fakaaue lahi au ha kua mau he tau tama taane haaku e tau fifine ne fakaalofa mai he tau loto ha laua ki a Iehova ti fakaaoga e tau momoui ha laua ke fekafekau ki a Ia.​—Efeso 6:6.

 Na fekafekau au ke 16 e tau i Rhode Island, ti loga e kapitiga haaku ne moua i ai. Manatu agaia e au e tau motua mitaki lahi mahaki ne fekafekau au ki ai. Fakaaue foki au ke he tau leveki faifano tokologa ne lagomatai au. Ko e lilifu lahi ke fekafekau ki a Iehova fakalataha mo e tau tagata taane ne fakatumau ha lautolu a fakaalofa fakamua ki a Iehova. He 1987, hiki atu a mautolu ki North Carolina ko e matakavi ne manako lahi ke he lagomatai, i ai foki ne loga e kapitiga mitaki ha mautolu ne moua. *​—Kikite matahui tala.

Ia Aokuso 2002, ne talia e au mo Susan e uiina ke fakalataha mo e tau tagata he magafaoa Peteli he United States i Patterson. Fekafekau au he Faahi Gahua he Fekafekauaga mo e gahua a Susan he fale unu, mena ne fiafia a ia ki ai! Ia Aokuso 2005, moua e au e lilifu ke eke mo taha he Kau Fakatufono. Nakai hokotia e lata haaku ma e kotofaaga foou nei. Molea foki e tupetupe ha Susan ha ko e matagahua, gahua, mo e tau fenoga ne putoia ai. Nakai fiafia a ia ke fano he vakalele; ka e lagaloga e ō ha maua he vakalele. Ko e tau lagomataiaga totonu he tau hoana he tau matakainaga he Kau Fakatufono kua lagomatai lahi ki a ia. Kua taute a ia ke eketaha fakalahi ke lagomatai au, ti ofania e au a ia ma e mena ia!

Loga e ata fulufuluola lahi he ofisa haaku ne fakamanatu ki a au e moui fiafia ne moua e au. Ne moua e au e tau monuina loga he eketaha ke manatu haaku a fakaalofa fakamua ki a Iehova!