1, 2. Ko e heigoa kua hagaao e talahauaga “fakatuaga hui” ki ai he tau Tohiaga Tapu Heperu?

KUA pehē a Iehova ko e Atua: “Ko e lagi ko e haku a nofoaiki haia, ko e lalolagi ko e haku a fakatuaga hui haia.” (Isaia 66:1) Ne tutala foki e Atua hagaao ke he “fakatuaga hui” haana he pehē a ia: “To fakalilifu foki e au e mena ke tu ai haku a tau hui.” (Isaia 60:13) Fakalilifu, po ke taute fēfē e ia e fakatuaga hui haana ke fulufuluola? Ti ko e heigoa e kakano he mena nei ma lautolu ne nonofo he haana a fakatuaga hui, ko e lalolagi?

² He tau Tohiaga Tapu Heperu, ko e talahauaga “fakatuaga hui” kua fakaaoga foki ke fakamaama e faituga i tuai i Isaraela. (1 Nofoaga he Tau Patuiki 28:2; Salamo 132:7) Ko e faituga kua fulufuluola lahi ki a Iehova ha ko e lotouho a ia he tapuakiaga mooli. Ti fakaaoga ai ke fakalilifu a Iehova ke he lalolagi.

3. Ko e heigoa e lotouho he tapuakiaga mooli he vahā nei, ti ko e magaaho fe ne kamata ai?

³ Ko e heigoa e lotouho he tapuakiaga mooli he vahā nei?  Nakai ko e fale a ia tuga e faituga. Ka ko e faituga fakaagaaga, ti kua fakalilifu ai a Iehova nakai tuga e falu fale foki. Ko e heigoa e faituga fakaagaaga? Ko e fakatokaaga he Atua kua fakaatā e tau tagata ke eke mo tau kapitiga haana mo e ke tapuaki a ia. Ko e fakatokaaga nei kua maeke ni ha ko e lukutoto ha Iesu. Ko e fakatokaaga nei ne kamata he tau 29 he mogo ne papatiso a Iesu ti fakauku ko e Ekepoa ne Mua he faituga fakaagaaga ha Iehova.​—Heperu 9:11, 12.

4, 5. (a) Ko e heigoa he tau tagata tapuaki mooli ha Iehova kua manako ke taute fakatatau ki a Salamo 99? (e) Ko e heigoa e hūhū kua lata ia tautolu ke hūhū ki a tautolu ni?

⁴ Kua fakaaue lahi a tautolu ke he fakatokaaga he Atua ma e tapuakiaga mooli. Fakakite e tautolu e loto fakaaue ha tautolu he tala age ke he falu hagaao ke he higoa a Iehova mo e mena fakaalofa homo ue atu haana he lukutoto. Kua fiafia a tautolu he molea valu e miliona he tau Kerisiano mooli hane fakaheke a Iehova he tau aho takitaha! He tokologa e tagata lotu ne manamanatu hepe to fakaheke e lautolu e Atua he lagi ka mole e mamate ha lautolu, kua iloa he tau tagata ha Iehova e aoga ke fakaheke a ia hinei mo e mogonei.

⁵ Ka fakaheke e tautolu a Iehova, kua muitua e tautolu e fakafifitakiaga he tau fekafekau fakamooli he Atua ne fakamaama ia Salamo 99:1-3, 5. (Totou.) Ko e tau tagata taane tuga a Mose, Arona, mo Samuela ne lalago katoatoa e fakatokaaga he Atua ma e tapuakiaga mooli he vahā i tuai. (Salamo 99:6, 7) He vahā nei, ato kamata a lautolu he lalolagi ke fekafekau ko e tau ekepoa mo Iesu he lagi, kua fekafekau fakamooli a lautolu ki a Iehova he vala he faituga fakaagaaga ke he lalolagi. Totou miliona e ‘tau mamoe kehe’ ne lalago fakamooli a lautolu. (Ioane 10:16) Fakalataha e tau matakau ua ia ke tapuaki a Iehova. Ka e lata ia tautolu ke hūhū ki a tautolu ni e hūhū, ‘Lalago katoatoa kia e au e fakatokaaga a Iehova ma e tapuakiaga mooli?’

6, 7. Ko e heigoa e lekua ne tupu he fakapotopotoaga Kerisiano fakamua atu, ti ko e heigoa ne hoko he tau 1919?

⁶ Ato 100 tau he mole e fakatū he fakapotopotoaga Kerisiano, ne tupu e tiaki taofiaga tuga ne talahau tuai. (Gahua 20:28-30; 2 Tesalonia 2:3, 4) Mole atu e magaaho ia, ne uka lahi ke kitia e tau tagata tapuaki mooli he Atua. Totou teau tau he mole ato fakaaoga e Iehova a Iesu ke fakakite ko hai mooli ne fekafekau ke he Atua he faituga fakaagaaga Haana.

⁷ He tau 1919, ko lautolu ne talia he Atua mo e fekafekau he faituga fakaagaaga haana ne kitia maaliali. Ne taute e lautolu e tau hikiaga ke maeke he tapuakiaga ha lautolu ke talia lahi ki a Iehova. (Isaia 4:2, 3; Malaki 3:1-4) Ti ko e fakakiteaga kua kitia he aposetolo ko Paulo he tau teau tau fakamua atu ne kamata ke fakamooli.

8, 9. Ko e heigoa e “Parataiso” ne kitia e Paulo he fakakiteaga?

⁸ Ko e fakakiteaga ha Paulo ne fakamaama  ia 2 Korinito 12:1-4. (Totou.) He fakakiteaga ia, ne talahau e Iehova taha mena ke mailoga e Paulo ka tupu he vahā anoiha. Ko e heigoa e “Parataiso” ne kitia e Paulo? Fakamua, maeke ke hagaao ke he Parataiso mooli ka nakai leva ti hoko mai ke he lalolagi. (Luka 23:43) Uaaki, maeke ke hagaao ke he parataiso fakaagaaga mitaki katoatoa he lalolagi foou. Mo e toluaki, maeke ke hagaao ke he tau tuaga homo ue atu he lagi he “Parataiso he Atua.”​—Fakakiteaga 2:7.

⁹ Ka ko e ha ne pehē a Paulo na “fanogonogo [a ia] ke he tau kupu nakai maeke ke talahaua, kua nakai lata foki ke vagahau ai ha tagata”? Ha kua nakai ko e magaaho ma haana ke fakamaama fakamatafeiga e tau mena homo ue atu ne kitia e ia he fakakiteaga. Ka ko e vahā nei kua fakaatā e Iehova a tautolu ke tala age ke he falu e tau monuina kua olioli he tau tagata haana he magaaho tonu nei!

10. Ko e ha kua nakai tatai e parataiso fakaagaaga mo e faituga fakaagaaga?

¹⁰ Fa tutala a tautolu ke he parataiso fakaagaaga, ka ko e heigoa a ia? Ko e takatakaiaga pauaki he mafola ne foaki he Atua ke he tau tagata haana. Ti ko e parataiso fakaagaaga mo e faituga fakaagaaga kua nakai tatai. Ko e faituga fakaagaaga ko e fakatokaaga he Atua ma e tapuakiaga mooli. Kua fakakite fakamaali he parataiso fakaagaaga a lautolu kua talia he Atua mo e tapuaki a ia ke he faituga fakaagaaga haana.​—Malaki 3:18.

11. Ko e heigoa e kotofaaga ne moua e tautolu he vahā nei?

¹¹ Kua fiafia lahi ke iloa tali mai he 1919, ne fakaatā e Iehova e tau tagata nakai mitaki katoatoa ke feaki, fakamalolō, mo e fakatupu e parataiso fakaagaaga. Hane lagomatai nakai a koe ke taute e gahua homo ue atu nei? Loto fakaaue nakai a koe ke he kotofaaga he gahua mo Iehova ke fakalilifu a ia ke he lalolagi?

12. Iloa fēfē e tautolu kua fakamooli e Isaia 60:17? (Kikite fakatino he kamataaga.)

¹² Ne talahau tuai he perofeta ko Isaia to loga e tau hikiaga homo ue atu ka tutupu he vala he fakatokatokaaga he Atua he lalolagi. (Totou Isaia 60:17.) Ko e tau Kerisiano fuata po ke foou ne totou po ke logona hokoia ke he tau hikiaga nei. Ka e tokologa e matakainaga ne moua e kotofaaga he iloa e tau hikiaga homo ue atu ia! Mauokafua e tau fekafekau fakamooli nei kua fakaaoga he Atua ha tautolu a Patuiki ko Iesu ke takitaki mo e fakahakohako e fakatokatokaaga Haana! Ka fanogonogo a tautolu ke he tau iloaaga he tau Kerisiano fakahele nei, to fakamalolō e tua mo e falanaki ha tautolu ki a Iehova.

13. Hagaao ke he Salamo 48:12-14, ko e heigoa ha tautolu kua lata ke taute?

¹³ Kua lata e tau Kerisiano mooli oti ke tala age ke he falu hagaao ke he fakatokatokaaga ha Iehova. Mena ofoofogia mooli he pete ne  nonofo a tautolu he lalolagi kelea ha Satani, ha ha ia tautolu e fakatokatokaaga he tau matakainaga mafola mo e kaufakalataha! Kua lata ia tautolu ke fiafia he tala age ke he “hau i tua” hagaao ke he fakatokatokaaga ha Iehova mo e parataiso fakaagaaga!​—Totou Salamo 48:12-14.

14, 15. Ko e heigoa e tau hikiaga ne taute he mole e 1970, ti kua aoga fēfē e fakatokatokaaga?

¹⁴ Tokologa a lautolu ne momotua he tau fakapotopotoaga ha tautolu ne iloa e tau hikiaga ne taute e vala he fakatokatokaaga ha Iehova he lalolagi ke mua atu e fulufuluola. Manatu e lautolu e mogo ne ha ha i ai e fekafekau fakapotopotoaga ka e nakai ko e matakau he tau motua, he ha ha i ai he tau motu e fekafekau he la ka e nakai ko e La Komiti, po ke mogo ne foaki he pelesiteni he Watch Tower Society e takitakiaga ka e nakai ko e Kau Fakatufono he Tau Fakamoli a Iehova. Pete ni ko e tau matakainaga taane nei ne fai lagomatai fakamooli, taha e tagata ne pule katoa ke taute e tau fifiliaga he tau fakapotopotoaga, he tau la ofisa, mo e tau matapatu he lalolagi. He mole e 1970, ne taute e tau hikiaga ke maeke he tau matakau he tau motua ke fai fakalagoaga he taute e tau fifiliaga ka e nakai toka ni ke he tagata tokotaha.

¹⁵ Ko e ha kua aoga e tau hikiaga nei ke he fakatokatokaaga? Ha kua fakavē ai ke he maamaaga mitaki he tau Tohiaga Tapu. He nakai tokotaha e tagata kua taute e tau fifiliaga oti, kua aoga e fakatokatokaaga mai he  tau mahani mitaki he tau motua, po ke “tau mena fakaalofa ke he tau tagata” oti, ne foaki e Iehova.​—Efeso 4:8; Tau Fakatai 24:6.

16, 17. Ko e heigoa e tau hikiaga foou kua nava a koe ki ai, ti ko e ha?

¹⁶ Manamanatu ke he falu hikiaga foou ne taute ke he tau tohi ha tautolu. Fiafia a tautolu he foaki e tau tohi lagomatai mo e ofoofogia he ha tautolu a gahua fakamatala. Manamanatu foki ke he puhala kua fakaaoga e tautolu e tau matini foou ke fakamatala e tala mitaki. Ma e fakatai, ko e faahi kupega hila jw.org kua hokotia ke he tau tagata tokologa foki ke maeke ia lautolu ke moua e lagomatai kua lata mooli mo lautolu. He tau hikiaga oti nei, kitia e tautolu e fiafia hokulo ha Iehova ke he tau tagata mo e fakaalofa haana ma lautolu.

¹⁷ Loto fakaaue foki a tautolu ke he tau hikiaga ne taute ke he tau feleveiaaga ha tautolu ke maeke ia tautolu ke fai magaaho ma e tapuakiaga he magafaoa po ke fakaakoaga fakatagata. Ti loto fakaaue a tautolu ke he tau hikiaga ne taute ke he ha tautolu a tau fakaholoaga he toloaga mo e fonoaga. Tuga kua holo ki mua tumau he tau tau takitaha! Fakaaue foki a tautolu ke he tau fakamahaniaga kua moua e tautolu mai he loga e tau aoga Tohi Tapu ha tautolu. He tau hikiaga oti nei, maaliali ai kua takitaki e Iehova e fakatokatokaaga haana ti matutaki a ia ke taute e parataiso fakaagaaga ke mua atu foki e fulufuluola!

18, 19. Lagomatai fēfē a tautolu ke taute e parataiso fakaagaaga ke mua atu e fulufuluola?

¹⁸ Ne tuku mai e Iehova ki a tautolu e lilifu he lagomatai ke taute e parataiso fakaagaaga ha tautolu ke mua atu foki e fulufuluola. Ka e taute fēfē e tautolu e mena ia? He fakamatala fakamakutu e tala mitaki he Kautu mo e taute tutaki foki. He tau magaaho oti kua lagomatai e tautolu e tagata ke eke mo fekafekau he Atua, kua lagomatai e tautolu e parataiso fakaagaaga ke tupu.​—Isaia 26:15; 54:2.

¹⁹ Lagomatai foki a tautolu ke fakafulufuluola e parataiso fakaagaaga ka eketaha a tautolu ke fakaholo ki mua e aga faka-Kerisiano ha tautolu. Lagomatai e mena nei ke taute e parataiso fakaagaaga ha tautolu ke futiaki fakalahi e falu. Fa mahani, nakai ni ko e ha tautolu a iloilo ke he Tohi Tapu ka ko e ha tautolu a mahani meā mo e mafola ne futiaki fakamua e tau tagata ke he fakatokatokaaga ti ki a Iehova mo Iesu.

20. Hagaao ke he Tau Fakatai 14:35, ko e heigoa e manako ha tautolu?

²⁰ Maeke ia Iehova mo Iesu ke fiafia lahi ka kitia e laua e parataiso fakaagaaga fulufuluola ha tautolu mogonei. Ko e olioli ha tautolu mogonei he taute ai ke mua atu e fulufuluola ko e vala tote he olioli ka logona hifo e tautolu he magaaho fakamui ka gahua a tautolu ke eke e lalolagi mo parataiso mooli. Kua lata ia tautolu ke manatu tumau e Tau Fakatai 14:35 ne pehē: “Ha ha i ai e fakaalofa he patuiki ke he fekafekau iloilo.” Eketaha a tautolu ke pulotu he gahua malolō ke fakafulufuluola e parataiso fakaagaaga!