1, 2. (a) Ko e heigoa haau ne amaamanaki lahi ki ai he Parataiso? (Kikite fakatino he kamataaga.) (e) Ko e heigoa ka foaki ki a tautolu e fiafia lahi he lalolagi foou?

KUA amaamanaki lahi atu a tautolu ke he “moui tukulagi.” Ne fakamaama he aposetolo ko Paulo e mena nei ko e “moui mooli.” (NW) (Totou 1 Timoteo 6:12, 19.) Ke he laulahi, kakano ai to momoui tukulagi ke he Parataiso he lalolagi. To uka ke manamanatu to fēfē la he ala hake he tau pogipogi oti mo e logona hifo e malolō he tino, fiafia, mo e totokaaga. (Isaia 35:5, 6) Manamanatu ke he mitaki ka fai magaaho a koe mo e haau a magafaoa mo e tau kapitiga, pihia mo lautolu ka fakaliu tu mai. (Ioane 5:28, 29; Gahua 24:15) To fai magaaho a koe ke fakaako e tau taleni foou ti mitaki fakahaga he tau mena ne fiafia a koe ki ai. Ma e fakatai, maeke ia koe ke fakaako fakalaulahi ke he saiene. Po ke maeke ia koe ke fakaako ke tā e tau akau fakatagitagi po ke talaga e kaina ni haau.

² Pete he amaamanaki atu a tautolu ke he tau mena mitaki oti nei, ko e tapuaki ki a Iehova ka tamai e fiafia lahi ki a tautolu.  Manamanatu la to fēfē e moui ka fakatapu he tau tagata oti kana e higoa ha Iehova ti talia a Iehova ko e Pule ha lautolu. (Mataio 6:9, 10) To fiafia a tautolu ke kitia kua puke e lalolagi he tau tagata mitaki katoatoa, tuga ni he finagalo e Atua ki ai. Ti manamanatu la e mukamuka lahi ke fakahokulo e tuaga kapitiga ha tautolu mo Iehova he mitaki katoatoa fakahaga a tautolu!​—Salamo 73:28; Iakopo 4:8.

3. Ko e heigoa kua lata ke tauteute e tautolu mogonei?

³ Falanaki a tautolu to taute e Iehova e tau mena homo ue atu oti nei, ha kua “maeke e tau mena oti ke he Atua.” (Mataio 19:25, 26) Ka manako a tautolu ke nonofo tukulagi he lalolagi foou, ko e magaaho anei ke “toto atu” ke he moui tukulagi. Iloa e tautolu kua mafiti e hoko mai he moumouaga, ti lata ke momoui he puhala kua fakakite kua amaamanaki a tautolu ke hoko mai e moumouaga he ha magaaho ni. Lata ia tautolu ke taute e tau mena oti kana kua maeke ia tautolu mogonei ke tauteute ma e moui he lalolagi foou. Kia kitekite la e puhala.

4. Maeke fēfē a tautolu ke tauteute mogonei ma e moui he lalolagi foou? Talahau e fakatai.

⁴ Maeke fēfē a tautolu ke tauteute mogonei ma e moui he lalolagi foou? Ka fakatoka a tautolu ke hiki atu ke nonofo he taha motu, liga tauteute e tautolu falu mena ke lata mo e moui he motu ia. Ma e fakatai, maeke ia tautolu ke kamata ke fakaako e vagahau mo e tau aga fakamotu he tau tagata ne nonofo i ai. Liga fakamahani a tautolu ke he falu mena kai ha lautolu. Pihia foki, maeke ia tautolu ke tauteute mogonei ma e moui he lalolagi foou he taute e tau mena kua maeke ia tautolu ke momoui tuga kua fitā a tautolu he nonofo i ai. Kia kumikumi la tautolu ke he falu puhala ka taute e tautolu e mena nei.

5, 6. To fakaako fēfē he omaoma ke he takitakiaga mai he fakatokatokaaga ha Iehova kua lagomatai a tautolu ke tauteute ma e moui he lalolagi foou?

⁵ He lalolagi nei, manako a Satani ke he tau tagata ke manatu na maeke ia lautolu ke taute ha mena kua loto a lautolu ki ai. Tokologa ne logona hifo kua aoga ke vevehe kehe ti kua nakai lata ke omaoma ke he Atua. Ko e heigoa e fua? Lahi e matematekelea mo e nakai fiafia. (Ieremia 10:23) Ka ko e Pule totonu a Iehova. Ti kua mitaki mooli e moui he lalolagi foou ka omaoma e tau tagata oti ki a ia!

⁶ He lalolagi foou, to fiafia a tautolu he muitua e takitakiaga mai he fakatokatokaaga ha Iehova ke lagomatai ke taute e lalolagi nei ke eke mo parataiso fulufuluola ti lagomatai ke fakaako a lautolu kua fakaliu tu mai. Lahi e gahua ha Iehova ma tautolu. Ka e kua ka tala mai e lautolu ne leveki ki a tautolu ke taute e mena kua nakai loto lahi a tautolu ki ai? To omaoma nakai a tautolu? To eketaha nakai a tautolu ke taute mo e fiafia e kotofaaga ha tautolu? Ke tauteute ke lata mo e moui tukulagi he lalolagi foou, lata ia tautolu ke omaoma ke he takitakiaga mai he fakatokatokaaga mogonei ha Iehova.

7, 8. (a) Ko e ha kua lata ia tautolu ke kaufakalataha mo lautolu ne leveki? (e) Ko e heigoa falu hikiaga kua moua he falu Kerisiano? (i) Ko e heigoa ka iloa tonu e tautolu he lalolagi foou?

⁷ Ka manako a tautolu ke mautauteute ma e moui he lalolagi foou, lata ia tautolu ke fakaako ke mahani fakalatalata mo e kaufakalataha mo e fakatokatokaaga ha Iehova mo e taha mo e taha. Ma e fakatai, ka foaki ki a tautolu e kotofaaga foou, makai a tautolu ke kaufakalataha mo e eketaha ke fiafia mo e mahani fakalatalata. Ka fakaako a tautolu ke kaufakalataha mo lautolu ne leveki a tautolu mogonei,  liga to taute pihia foki e tautolu he lalolagi foou. (Totou Heperu 13:17.) He huhū atu e tau Isaraela ke he Motu he Maveheaga, ne kotofa ki a lautolu e mena ke nonofo ai. (Numera 26:52-56; Iosua 14:1, 2) Nakai iloa e tautolu e matakavi ka igatia a tautolu mo e kotofa ai ke nonofo he lalolagi foou. Kaeke ke iloa e tautolu ke kaufakalataha, to fiafia a tautolu ke taute e finagalo ha Iehova he ha matakavi kua nonofo ai a tautolu.

⁸ Manamanatu la ke he lilifu ka fekafekau he lalolagi foou he Atua i lalo he pule he Kautu! Ma e kakano nei, kua fiafia a tautolu ke kaufakalataha mo e fakatokatokaaga ha Iehova he mogonei ke taute e tau mena kua kotofa ki a tautolu ke taute. Ka e falu magaaho, liga hiki e tau kotofaaga ha tautolu. Ma e fakatai, falu matakainaga he Peteli i United States ne hiki e kotofaaga ke gahua he fonua. Ha ko e tau tau momoui po ke falu tuaga, ne kotofa e falu leveki faifano ke eke mo tau paionia pauaki. Kua fiafia a lautolu he tau kotofaaga foou ha lautolu, ti fakamonuina e Iehova a lautolu. Ka liogi a tautolu ma e lagomatai ha Iehova, eketaha ke fekafekau ki a ia, ti fakaako ke mahani fakalatalata ke he ha kotofaaga kua moua e tautolu, to fiafia a tautolu mo e to fakamonuina e Iehova a tautolu. (Totou Tau Fakatai 10:22.) Ka e kua ka haia a tautolu he lalolagi foou ti manako a tautolu ke nonofo he taha faahi, ka e tala mai e fakatokatokaaga ha Iehova ki a tautolu ke hiki ke he taha faahi? He magaaho ia, to nakai popole a tautolu ke he mena ke nonofo a tautolu po ke mena ke taute e tautolu. To fakaaue a tautolu ke momoui he lalolagi foou.​—Nehemia 8:10.

9, 10. (a) Maeke he ha ia tautolu ke fakauka he lalolagi foou? (e) Maeke fēfē ia tautolu ke fakauka he mogonei?

⁹ He lalolagi foou, liga lata ia tautolu he falu magaaho ke fakauka. Ma e fakatai, liga logona e tautolu kua fiafia lahi falu tagata ha kua fakaliu tutū mai e tau magafaoa mo e tau kapitiga ha lautolu. Ka e maeke ia tautolu ke fakatali ma e liu tu mai he tau fakahele ha tautolu. Ka hoko e mena ia, to fiafia fakalataha nakai a tautolu mo e falu ti fakauka? (Roma 12:15) Ka fakaako a tautolu ke fakatali fakatekiteki ki a Iehova ke fakamooli e tau maveheaga haana mogonei, to lagomatai a tautolu ke fakauka he mogoia.​—Fakamatalaaga 7:8.

¹⁰ Maeke foki ia tautolu ke tauteute ke lata mo e lalolagi foou he fakauka ka moua e tautolu e tau hikiaga he maamaaga ha tautolu ke he kupu mooli he Tohi Tapu. Fakaako nakai e tautolu e tohi foou nei, ti fakauka ka nakai maama katoatoa ai e tautolu? Ka pihia, he lalolagi foou to mukamuka lahi ke fakauka he tau magaaho takitaha ka foaki mai e Iehova ki a tautolu e tau poakiaga foou.​—Tau Fakatai 4:18; Ioane 16:12.

11. Ko e ha kua lata ke fakaako a tautolu ke fakamagalo e falu mogonei, mo e lagomatai fēfē he mena nei a tautolu he lalolagi foou?

¹¹ Taha puhala ka tauteute a tautolu ke lata mo e moui he lalolagi foou ko e fakaako ke fakamagalo. He Pule Afe Tau he Keriso, to fai magaaho ma e tau tagata oti ke mitaki katoatoa. (Gahua 24:15) To fakaalofa mo e  fakamagalo nakai a tautolu ke he taha mo e taha? Ka fakaako a tautolu ke fakamagalo e falu mo e moua e fakafetuiaga mitaki mo lautolu mogonei, to mukamuka lahi ma tautolu ke taute pihia he lalolagi foou.​—Totou Kolose 3:12-14.

12. Ko e ha kua lata ia tautolu ke tauteute mogonei ma e moui he lalolagi foou?

¹² He lalolagi foou, liga to nakai moua tumau e tautolu e tau mena ne manako a tautolu ki ai, po ke liga fakatali a tautolu ke moua ai. To lata ia tautolu ke fakaaue mo e mahani fakalatalata ke he ha tuaga kua ha ha i ai a tautolu. To lata ia tautolu ke moua e tau mahani pihia hane fakaako e Iehova ki a tautolu ke fakakite mogonei. Ko e fakaako ke fakakite e tau mahani nei mogonei, fakamooli e tautolu kua moolioli e lalolagi foou ki a tautolu ti ko e mena ia kua tauteute a tautolu ma e moui tukulagi. (Heperu 2:5; 11:1) To fakakite foki e tautolu kua manako mooli a tautolu ke momoui he lalolagi kua omaoma e tau tagata oti ki a Iehova.

13. Ko e heigoa ka tuku fakamua e tautolu he tau momoui he lalolagi foou?

¹³ He lalolagi foou, to moua e tautolu e tau mena oti kua lata mo tautolu ke fiafia e moui. Ka ko e fiafia lahi mahaki ha tautolu to moua mai he ha tautolu a fakafetuiaga tata mo Iehova. (Mataio 5:6) To fagahuatia a tautolu he fekafekauaga ha Iehova, mo e to fiafia a tautolu he fekafekau ki a ia. (Salamo 37:4) Ti ka tuku fakamua e tautolu a Iehova he tau momoui ha tautolu mogonei, kua tauteute a tautolu ma e moui he lalolagi foou.​—Totou Mataio 6:19-21.

14. Ko e heigoa e tau foliaga he fekafekauaga ha Iehova ka fakatoka he tau fuata ikiiki?

¹⁴ Maeke fēfē ia tautolu ke fiafia atu foki he fekafekau ki a Iehova? Taha puhala he fakatoka e tau foliaga. Kaeke ko e fuata tote a koe, manamanatu fakahokulo ke fakaaoga e moui haau ke fekafekau ki a Iehova. He ha he taute e falu kumikumiaga ke he tau tohi ha tautolu ke he tau puhala kehekehe he gahua mau?  Maeke a koe ke fakatoka taha he tau mena nei mo foliaga. * (Kikite matahui tala.) Tutala ke he falu ne loga e tau he fekafekau ki a Iehova he gahua mau. Ka fakaaoga e koe e moui haau ke fekafekau ki a Iehova, to moua e koe e fakamahaniaga kua aoga. To lagomatai he iloaaga nei a koe ke fekafekau ki a Iehova he lalolagi foou.

15. Ko e heigoa e falu foliaga kua maeke ke fakatoka e tautolu he fekafekauaga ha Iehova?

¹⁵ Loga e foliaga ka fakatoka e tautolu he fekafekauaga ha tautolu ki a Iehova. Ma e fakatai, maeke ia tautolu ke fakatoka e foliaga ke fakaako e puhala foou he gahua he fonua. Po ke maeke ia tautolu ke lali ke maama mitaki e tau matapatu fakaakoaga he Tohi Tapu ti fakaako e puhala ka fakagahua ai he tau momoui ha tautolu. Maeke ia tautolu ke lali ke fakaholo ki mua e totou ha tautolu ke he toloaga po ke tau lauga ha tautolu mo e tau tali he tau feleveiaaga. Ko e manatu hanei: Ka fakatoka e koe e tau foliaga he fekafekauaga haau ki a Iehova, to lagomatai a koe ke lahi e fakamakutu mo e tauteute ma e moui he lalolagi foou.

16. Ko e ha e fekafekau ki a Iehova ko e puhala mitaki lahi mahaki he moui?

¹⁶ Ka fakaaoga e tautolu e magaaho ha tautolu ke tauteute ma e lalolagi foou he Atua, kua tonoa kia e tautolu e puhala moui mitaki mogonei? Nakai! Ko e fekafekau ki a Iehova ko e puhala mitaki lahi he moui. Nakai fekafekau a tautolu ki a ia he omoi he taha tagata a tautolu ke taute po ke hao mai he matematekelea lahi. Ka moua e tautolu e fakafetuiaga mitaki mo Iehova, kua holo ki mua e moui ha tautolu ti fiafia lahi a tautolu. Ko e puhala a ia ne tufuga e ia a tautolu ke momoui. Ko e moua e fakaalofa he Atua mo e moua e takitakiaga haana he tau momoui ha tautolu kua mua atu e mitaki ke he ha mena foki. (Totou  Salamo 63:1-3.) Logona e tautolu oti e fiafia kua moua mai he tapuaki ki a Iehova mo e tau loto katoa ha tautolu. Falu ne fekafekau ki a ia ke loga e tau tau ka talahau mooli ko e puhala mitaki lahi mahaki anei he moui.​—Salamo 1:1-3; Isaia 58:13, 14.

17. Aoga fēfē he taute e tau mena ne manako mo e fiafia a tautolu ki ai he Parataiso?

¹⁷ He Parataiso, to fiafia a tautolu ke fai magaaho ke taute e tau mena ne manako mo e fiafia a tautolu ki ai. Mole ia, ko Iehova ne tufuga a tautolu aki e manako ke fiafia a tautolu, ti mavehe a ia to “fakamakona e manako he tau mena momoui oti.” (Salamo 145:16; Fakamatalaaga 2:24) Lata ia tautolu ke fakafiafia ti lata foki ia tautolu ke okioki, ka e moua e tautolu e fiafia lahi ke he tau mena nei ka tuku fakamua e tautolu e fakafetuiaga ha tautolu mo Iehova. To pihia foki he lalolagi foou. Ti kua pulotu ke tumau ke ‘kumikumi fakamua ke he Kautu’ mo e hagaaki ke he tau monuina kua moua e tautolu he fekafekau ki a Iehova.​—Mataio 6:33.

18. Fakakite fēfē e tautolu kua tauteute a tautolu ke nonofo tukulagi he Parataiso?

¹⁸ He lalolagi foou, to mua e mitaki he moui ke he mena kua manamanatu a tautolu ki ai. Maeke ia tautolu ke fakakite e manako lahi ha tautolu ke ha ha i ai he tauteute mogonei ke lata mo e ‘moui mooli.’ Kia feaki e tautolu e tau mahani kua fakaako e Iehova ki a tautolu ke fakakite, mo e fakamatala fakamakutu e tautolu e tala mitaki. Kia moua e tautolu e fiafia he tuku fakamua e tapuakiaga ha Iehova he tau momoui ha tautolu. Falanaki katoatoa a tautolu he lalolagi foou, to taute e Iehova e tau mena oti ne mavehe e ia. Kia momoui a tautolu tuga kua fitā he haia a tautolu i ai!