1, 2. Fakaako fēfē e Iehova a tautolu ke fakaalofa ki a ia?

KO E puhala mitaki lahi mahaki ka fakaako he matua taane haana tau fanau ko e haana ni a fakafifitakiaga. Ka fakakite e ia e fakaalofa ke he tau fanau haana, kua fakaako e ia a lautolu ke fakaalofa. Nakai fai foki ne fakaalofa lahi ki a tautolu tuga ne fakakite he ha tautolu a Matua ko Iehova. Ti fakaako e tautolu e puhala ke fakaalofa “ha ko e mena ne fakamua mai hana fakaalofa kia tautolu.”​—1 Ioane 4:19.

² He puhala fe kua fakakite “fakamua mai [e Iehova e] fakaalofa kia tautolu”? Pehē e Tohi Tapu: “Matulei a Keriso ke hukui aki a tautolu, ka ko e tau tagata hala agaia a tautolu.” (Roma 5:8) Ko e ha tautolu a Matua fakaalofa ko Iehova, ne foaki e haana Tama mo lukutoto ke laveaki a tautolu mai he agahala mo e mate. Ko e mena fakaalofa uho nei ati maeke a tautolu ke fakatata ki a Iehova mo e ke fakakite e fakaalofa ha tautolu ki a ia. He taute e poa ia ne mua, ne fakatoka e Iehova e fakafifitakiaga. Ne fakaako e ia a tautolu kua lata ia tautolu ke fakaalofa he fakamokoi mo e nakai mahani lotokai.​—1 Ioane 4:10.

3, 4. Fakakite fēfē e tautolu kua fakaalofa a tautolu ke he Atua?

³ Ko e fakaalofa e mahani pauaki ha Iehova. Ti maeke ia tautolu ke maama e kakano ne pehē a Iesu ko e poakiaga ne mua e  aoga anei: “Kia fakaalofa atu foki a koe ke he Iki hāu a Atua mo e hāu a loto katoa, mo e hāu a agaga katoa, mo e hāu a manatu katoa, mo e hāu a malolo katoa.” (Mareko 12:30) Manako a Iehova ki a tautolu ke fakaalofa ki a ia mo e ha tautolu a “loto katoa.” To fakamamahi ki a Iehova ka mua atu e fakaalofa ha tautolu ke he taha tagata po ke taha mena foki ke he fakaalofa ki a ia. Ka ko e fakaalofa ha tautolu ki a ia kua nakai lata ke lauia ni e logonaaga he loto. Amanaki foki a Iehova ki a tautolu ke fakaalofa ki a ia mo e ha tautolu a “manatu katoa” mo e ha tautolu a “malolo katoa.” Kakano e mena nei ko e fakaalofa ha tautolu ma Iehova kua putoia e puhala ne manamanatu mo e tau mena ne taute e tautolu.​—Totou Mika 6:8.

⁴ Kua lata mogoia a tautolu ke fakaalofa ki a Iehova mo e tau loto katoa ha tautolu mo e tau mena oti ne moua e tautolu. He tuku fakamua e tautolu a ia he tau momoui ha tautolu, fakakite e tautolu kua fakaalofa mooli a tautolu ki a ia. He vala tala fakamua, fakatutala a tautolu ke he fā e puhala ne fakakite e Iehova e fakaalofa lahi haana ke he tau fanau haana. Kia kitekite a tautolu mogonei ke he puhala ka fakahokulo ha tautolu a fakaalofa ki a Iehova mo e fakakite kua fakaalofa a tautolu ki a ia.

5. Ka manamanatu a tautolu ke he tau mena oti ne taute e Iehova ma tautolu, ko e heigoa kua manako a tautolu ke taute?

⁵ Ka atu he taha e mena fakaalofa ki a koe, liga fakakite e koe e loto fakaaue. Ha kua tokiofa e koe e mena fakaalofa, ne fakaaoga foki e koe. Tohi e Iakopo: “Ko e tau mena mitaki oti kua foaki noa mai, katoa mo e tau mena fakaalofa oti kua katoatoa ai e mitaki, mai luga e tau mena ia, kua hifo mai mai he Matua he maama, ko ia nakai ha i ai ha mena hikihikifano, po ke mafoki fakatote.” (Iakopo 1:17) Loto fakaaue lahi a tautolu kua foaki mai e Iehova ki a tautolu e tau mena oti kana ke lata ke momoui mo e ke fiafia a tautolu. Mailoga e tautolu e lahi he fakaalofa haana ki a tautolu, ti manako a tautolu ke fakakite ki a ia kua fakaalofa foki a tautolu ki a ia. Pihia nakai e logonaaga haau?

6. Ko e heigoa kua lata he tau Isaraela ke taute ka manako a lautolu ki a Iehova ke matutaki ke fakamonuina a lautolu?

⁶ Ne loga e mena mitaki ne moua he tau Isaraela mai ia Iehova. Totou teau e tau tau, ne takitaki e ia a lautolu aki e fakatufono haana ti foaki ki a lautolu e tau mena oti ke lata ia lautolu ke momoui. (Teutaronome 4:7, 8) Maeke he tau Isaraela ke fakakite e fakaaue ha lautolu ki a Iehova he omaoma e tau fakatufono nei. Ma e fakatai, ka foaki e lautolu e tau poa ki a Iehova, lata ia lautolu ke foaki ki a ia e tau fua uluaki ne mua e mitaki he motu. (Esoto 23:19) Iloa he tau Isaraela to matutaki a Iehova ke fakamonuina a lautolu ka omaoma a lautolu ki a ia mo e foaki katoatoa ki a ia.​—Totou Teutaronome 8:7-11.

7. Maeke fēfē a tautolu ke fakaaoga e ‘tau koloa uho’ ha tautolu ke fakakite ki a Iehova kua fakaalofa a tautolu ki a ia?

⁷ Maeke foki ia tautolu ke fakakite ki a Iehova kua fakaalofa a tautolu ki a ia he foaki ki a ia ha tautolu a ‘tau koloa uho.’ (Tau Fakatai 3:9) Taute e tautolu e mena nei he fakaaoga e tau mena kua moua e tautolu ke fakaheke a ia. Ma e fakatai, maeke ia tautolu ke tuku e tau mena fakaalofa ke lalago e gahua he Kautu he fakapotopotoaga ha tautolu mo e lalolagi katoa. Ka lahi po ke tote e tau mena moua ha tautolu, igatia a tautolu mo e fakaaoga e tau mena ne moua e tautolu ke fakakite e fakaalofa ha tautolu ki a Iehova.  (2 Korinito 8:12) Ka e fai puhala foki ka fakakite e tautolu ki a Iehova kua fakaalofa a tautolu ki a ia.

8, 9. Ko e heigoa taha puhala ne fakakite e tautolu kua fakaalofa a tautolu ki a Iehova? Ko e heigoa ne taute e Mike mo e magafaoa haana?

⁸ Fakaako e Iesu a tautolu ke kumikumi fakamua e Kautu mo e nakai fakaatukehe ke he tau mena kai mo e tau mena ke tapulu ai. Mavehe mai e Matua ha tautolu ke foaki ki a tautolu e tau mena kua lata mo tautolu. (Mataio 6:31-33) Falanaki a tautolu ki a Iehova mo e iloa to fakamooli e ia e maveheaga haana. Ka fakaalofa mooli a koe ke he taha tagata, to falanaki a koe ki a ia. Ti ka lahi e falanaki ha tautolu ki a Iehova, to fakakite fakalahi e tautolu ki a ia kua fakaalofa a tautolu ki a ia. (Salamo 143:8) Liga hūhū hifo a tautolu: ‘Fakakite nakai he tau pulega haaku mo e puhala ne fakaaoga e au e magaaho mo e malolō haaku kua fakaalofa mooli au ki a Iehova? Falanaki nakai au ki a Iehova he tau aho takitaha ke leveki e tau manako haaku?’

⁹ Ko Mike mo e magafaoa haana ne falanaki ki a Iehova. Mogo ne tote a Mike ne manako tumau a ia ke fakamatala he taha motu. Mole foki he mau a ia ti ua e tama, ne pihia agaia e manako haana. Mogo ne totou a Mike mo e magafaoa haana ke he falu matakainaga ne fekafekau he matakavi ne manako lagomatai lahi, ne fifili a lautolu ke fakamukamuka e tau momoui ha lautolu. Ne sela e lautolu e fale ti hiki ke he fale ne totetote hifo. Fakatote hifo foki e Mike e numera he tau tagata haana he pisinisi fakameā, ti moua e puhala ke leveki aki mai he taha motu he fakaaoga e Initanete. Ti ko e fua, maeke ia Mike mo e magafaoa haana ke hiki ke he taha motu, ti fiafia lahi mahaki a lautolu ke he gahua he fonua i ai. Pehē a Mike, “Logona e mautolu e mooli he tau kupu ha Iesu ia Mataio 6:33.”

10. Tuga e Patuiki ko Tavita, ko e ha kua mitaki ma tautolu ke manamanatu fakahokulo ke he mena ne fakaako e tautolu hagaao ki a Iehova?

¹⁰ Ne tohi he Patuiki ko Tavita he taha magahala: “Kua talahau he lagi e lilifu he Atua; kua fakakite foki he pu lagi likoliko e gahua he hana tau lima.” Lafi e ia: “Kua hakohako e fakatufono a Iehova, kua liuaki mai e agaga; kua fakamoli e talahau a Iehova, kua fakailoilo a lautolu kua goagoa.” He manamanatu fakahokulo a Tavita ke he tau fakatufono pulotu mo e tufugatia fulufuluola ha Iehova, ne fakatata lahi a ia ki a Iehova ti manako ke fakakite e fakaalofa haana ki a Ia. Pehē a Tavita: “Kia mitaki foki kia koe e tau kupu he haku gutu, mo e tau manamanatu he haku loto, Iehova na e, ko e haku a maka tumau mo e haku a lukutoto.”​—Salamo 19:1, 7, 14.

11. Maeke fēfē a tautolu ke fakaaoga e iloilo ne foaki e Iehova ki a tautolu ke fakakite e fakaalofa ha tautolu ki a ia? (Kikite fakatino he kamataaga.)

¹¹ He vahā nei, ne fakaako e Iehova ki a tautolu e tau mena loga hagaao ki a ia, finagalo haana, tufugatia haana, mo e Kupu haana. Fakamalolō he lalolagi e tau tagata ke fakaako, ka e fa taute he fakaakoaga tokoluga a lautolu ke galo e fakaalofa ha lautolu ke he Atua. Kehe ai, nakai ni manako a Iehova ke moua e tautolu e iloilo, ka e  lagomatai foki e ia a tautolu ke pulotu. Manako a ia ki a tautolu ke fakaaoga e mena ne fakaako e tautolu ke mitaki ai ni a tautolu mo e lagomatai e falu. (Tau Fakatai 4:5-7) Ma e fakatai, manako a ia ki a tautolu ke tala age ke he falu e “maama ke he kupu moli” ti lagomatai a lautolu ke momoui. (1 Timoteo 2:4) Fakakite e tautolu e fakaalofa ha tautolu ki a Iehova mo e tau tagata he fakaako e tokologa hagaao ke he Kautu he Atua mo e mena ka taute ai ke lata mo e tau tagata.​—Totou Salamo 66:16, 17.

12. Fēfē e mena ne talahau he matakainaga fifine tote hagaao ke he mena fakaalofa mai ia Iehova?

¹² Ko lautolu foki ne ikiiki ka manamanatu fakahokulo ke he tau mena oti ne foaki mo e fakaako e Iehova ki a lautolu. Manatu agaia e Shannon e logonaaga haana he fonoaga ne fina atu a ia he 11 e tau he moui mo e tehina haana ne 10 e tau he moui. He Fonoaga he Faahimotu “Godly Devotion,” kua tala age ke he tau fanau ikiiki oti ne putoia a Shannon mo e tehina haana ke nonofo he faahi pauaki. Fakamua, ne hopoate a ia. Ka e ofo a ia he igatia e tama mo e tohi Questions Young People Ask​—Answers That Work. Taute fēfē he mena fakaalofa fulufuluola nei a ia ke logona hifo hagaao ki a Iehova? Pehē a ia: “Ko e magaaho ia ne mailoga agataha e au kua mooli a Iehova ti fakaalofa lahi mahaki a ia ki a au. Ko e fiafia ha ia ha mautolu ha kua foaki noa mai he ha mautolu a Atua ne mua ko Iehova e tau mena fakaalofa fulufuluola ne mitaki lahi mahaki!”

13, 14. Kua lata ke tali fēfē a tautolu ka akonaki e Iehova a tautolu, ti ko e ha?

¹³ Fakamanatu he Tohi Tapu ki a tautolu: “Ko ia kua ofania e Iehova, kua akonaki e ia a ia; tuga he akonaki he matua tane e tama tane kua fiafia ki ai a ia.” (Tau Fakatai 3:12) Ka talia e tautolu e akonaki ha Iehova mo e fakaatā a ia ke fakamahani a tautolu, kua fakaako a tautolu ke taute e mena hako mo e moua e tautolu e mafola. Mooli, “ko e tau  akonakiaga oti kana kua nakai manatu a tautolu ke he vaha ia ko e mena ke fiafia ki ai, ka ko e mena ke momoko ai.” (Heperu 12:11) Pihia foki, fēfē e tali ha tautolu ke he tau akonakiaga ha Iehova ki a tautolu? Nakai lata ia tautolu ke fakaheu e fakatonuaga ha Iehova po ke matutaki ke ita ka nakai manako a tautolu ke he mena kua logona e tautolu. Fakaalofa a tautolu ki a Iehova ti fanogonogo a tautolu ki a ia mo e taute e tau hikiaga kua lata.

¹⁴ He vahā ha Malaki, ne nakai fanogonogo e tokologa he tau Iutaia ki a Iehova. Nakai popole a lautolu kua nakai fiafia a Iehova ke he tau poa ha lautolu ne foaki ki a ia. Ti foaki e Iehova ki a lautolu e fakatonuaga malolō lahi hagaao ke he mena nei. (Totou Malaki 1:12, 13.) Ne foaki lagaloga e Iehova e fakatonuaga ki a lautolu, ka e nakai fanogonogo a lautolu. Ti tala age a ia ki a lautolu: “Fakafano atu e au e malaia kia mutolu, mo e fakamalaia ai e au e tau mena kua monuina ai a mutolu.” (Malaki 2:1, 2) Kua maaliali ai ka fakaheu tumau e tautolu ke fanogonogo ke he fakatonuaga ha Iehova po ke logona kua nakai aoga, to galo ia tautolu e tuaga kapitiga haana.

15. Ko e puhala manamanatu fe kua lata a tautolu ke kalo kehe?

¹⁵ Fakamalolō he lalolagi ha Satani e tau tagata ke fakaikaluga mo e lotokai. Tokologa ne nakai manako ke fakatonu po ke tala age e mena ke taute. Falu ne fanogonogo ni ke he fakatonuaga ha ko e mena ia kua lata ke taute e lautolu. Nakai lata a tautolu ke pihia. Talahau he Tohi Tapu ki a tautolu ke “aua neke mahani foki . . . fakalataha mo e lalolagi nai.” Ka e lata a tautolu ke maama e mena ne amanaki a Iehova ki a tautolu ti taute e mena kua fiafia a ia. (Roma 12:2) Fakaaoga e ia e fakatokatokaaga haana ke foaki ki a tautolu e fakatonuaga he magaaho tonu. Ma e fakatai, fakamanatu ki a tautolu e mahani ke he vahāloto he tagata taane mo e fifine, fifiliaga he tau kapitiga ha tautolu, mo e fifiliaga he mena ka taute e tautolu ke lata mo e magaaho okioki. Ka talia fakamakai e tautolu e akonakiaga ha Iehova mo e taute e tau hikiaga ke fakafiafia a ia, kua fakakite e tautolu kua fakaaue a tautolu  ke he takitakiaga haana ti fakaalofa mooli a tautolu ki a ia.​—Ioane 14:31; Roma 6:17.

16, 17. (a) Ko e ha kua lata ia tautolu ke kumi e finagalo ha Iehova ato taute e tautolu e tau fifiliaga? (e) Ko e heigoa ne taute he tau Isaraela ka e nakai falanaki ki a Iehova?

¹⁶ Falanaki e tau fanau ikiiki ke he tau matua ha lautolu ke lagomatai mo e puipui a lautolu. Liga ole lagomatai foki e tau tagata lalahi ke he tau matua ha lautolu. Mailoga e lautolu pete ne maeke a lautolu ke taute e tau fifiliaga ha lautolu, maeke he tau matua ke foaki ki a lautolu e fakatonuaga mitaki. Fakaatā he ha tautolu a Matua ko Iehova a tautolu ke taute e tau fifiliaga ni ha tautolu. Ka e, he falanaki mo e fakaalofa mooli a tautolu ki a ia, kua ole tumau a tautolu ma e lagomatai haana ti taute e tau mena oti kua maeke ia tautolu ke iloa e manatu haana ato taute e tautolu e fifiliaga. Ka falanaki a tautolu ki a Iehova, to foaki e ia ki a tautolu e agaaga tapu haana ke lagomatai a tautolu ke taute e mena hako.​—Filipi 2:13.

¹⁷ He vahā ha Samuela, ne mahala e tau Isaraela he tau ke he tau Filisitia. He nakai ole ki a Iehova ke he mena kua lata foki ia lautolu ke taute, pehē a lautolu: “Kia ta mai e tautolu e puha he maveheaga a Iehova i Sailo kia tautolu, ka hoko mai a ia kia tautolu, ti fakamoui e ia a tautolu mai he lima ha lautolu kua fai fi mai kia tautolu.” Ti ko e heigoa e fua he fifiliaga ia? “Lahi ni e keliaga, ko e tau tagata Isaraela ne keli ko e tolugofulu e afe a lautolu, ko e kau ne o ke he tau hui ha lautolu. Ne uta foki e puha he Atua.” (1 Samuela 4:2-4, 10, 11) Manatu e tau Isaraela ko e uta noa ni he Puha mo lautolu, to lagomatai mo e puipui e Iehova a lautolu. Ka e nakai ole a lautolu ma e lagomatai ha Iehova po ke lali ke iloa e finagalo haana. Ka e manatu a lautolu kua hako e mena ne taute e lautolu, ti matematekelea lahi mahaki a lautolu.​—Totou Tau Fakatai 14:12.

18. Ko e heigoa ne fakaako he Tohi Tapu ki a koe hagaao ke he falanaki ki a Iehova?

¹⁸ Ko e salamo ne hokulo e fakaalofa ki a Iehova ti falanaki ki a ia ne tohi: “Kia amaamanaki a koe ke he Atua, ha ko e mena to liu foki fakaheke au kia ia ha ko e fakamouiaga mai mua hana. Haku Atua na e, kua mānu haku agaga ki loto ia au; ko e mena ia ne manamanatu ai au kia koe.” (Salamo 42:5, 6) Pihia nakai e logonaaga haau ki a Iehova? Tata nakai e logonaaga haau ki a ia mo e falanaki ki a ia? Liga maeke ia koe ke fakaako ke falanaki fakalahi ki a ia. Pehē e Tohi Tapu ki a tautolu: “Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu. Kia manatu e koe a ia ke he hāu a tau puhala oti, ti fakahakohako ai e ia hāu a tau puhala.”​—Tau Fakatai 3:5, 6.

19. To fakakite fēfē e koe ki a Iehova kua fakaalofa a koe ki a ia?

¹⁹ He fakaalofa fakamua a Iehova ki a tautolu, ne fakaako e ia a tautolu ke he puhala ke fakaalofa ki a ia. Kia manatu tumau e tautolu e lahi he mena ne taute e ia ma tautolu mo e lahi he fakaalofa haana ki a tautolu. Kia fakakite foki e tautolu ki a ia kua fakaalofa a tautolu ki a ia mo e ha tautolu a loto, agaaga, manatu, mo e malolō katoa.​—Mareko 12:30.