1, 2. Ko e heigoa e foliaga ma e tau Kerisiano takitaha? Talahau e fakataiaga.

KO E heigoa he matua fifine kua kumi ki ai ka fifili e fua akau he makete? Liga nakai ko e tau fua akau lalahi mamahaki po ke tau mukamuka. Ka e kumi a ia he fua akau ne manogi mo e mitaki ti kua lata ke kai. Manako a ia ke momoho mo e motua e fua akau.

² Ka fakaako e tagata hagaao ki a Iehova ti fifili ke papatiso, ko e fakafetuiaga haana mo e Atua to matutaki ke tupu. Ko e foliaga haana ke eke mo Kerisiano motua fakaagaaga. Nakai kakano e motua nei ke he vahā motua he moui. Hagaao ai ke he tupuaga fakaagaaga, kakano ke moua e fakafetuiaga tata lahi mo Iehova. Manako e aposetolo ko Paulo ke he tau Kerisiano i Efeso ke motua fakaagaaga. Fakamafana e ia a lautolu ke kaufakalataha ke he tua ti fakatumau ke fakaako hagaao ki a Iesu ke eke mo “tau tagata kua katoatoa ai e mahani mitaki, ato hohoko atu foki ke he fafatiaga he loa kua lata mo e puke ha ia Keriso.”​—Efeso 4:13.

3. Fakatatai fēfē e fakapotopotoaga Efeso mo e tau tagata ha Iehova he vahā nei?

 ³ Kua fitā he fai tau e fakapotopotoaga Efeso he magaaho ne tohia e Paulo e tohi haana ki a lautolu. Tokologa he fakapotopotoaga ia ne fitā he eke mo tau Kerisiano lotomatala mo e motua fakaagaaga. Ka e fai agaia ne lata ke fakamalolō fakalahi ha lautolu a fakafetuiaga mo Iehova. Pihia foki he vahā nei, tokologa e matakainaga ne leva e fekafekau ki a Iehova ti kua eke mo tau Kerisiano motua fakaagaaga. Ka e fai he tau fakapotopotoaga ne nakaila hokotia ke he tuaga ia. Ma e fakatai, totou afe ne papatiso he tau tau takitaha, ti ha ha agaia falu ne lata ke motua fakaagaaga. Ka e kua a koe?​—Kolose 2:6, 7.

4, 5. Kehekehe fēfē e tau Kerisiano motua fakaagaaga mai he taha ke he taha, ka ko e heigoa ne fetataiaki a lautolu oti? (Kikite fakatino he kamataaga.)

⁴ Ka onoono a koe ke he fua akau momoho he makete, kitia e koe kua nakai tatai oti ai. Ka e fai mena ne tatai ai he fakakite kua momoho. Tatai foki ke he tau Kerisiano motua fakaagaaga. Nakai tatai oti a lautolu. O mai a lautolu he tau motu mo e tau tuaga kehekehe. Kua kehekehe e tau tau momoui ha lautolu ti kehekehe foki e tau mena ne fiafia mo e nakai fiafia a lautolu ki ai. Ka e moua he tau Kerisiano motua fakaagaaga e falu mahani kua tatai ne fakakite a lautolu na motua fakaagaaga. Ko e heigoa falu he tau mahani nei?

⁵ Ko e Kerisiano motua fakaagaaga ne fifitaki a Iesu ti muitua fakatata ke he “hana tau tuagahui.” (1 Peteru 2:21) Pehē a Iesu kua aoga lahi ma e tagata ke fakaalofa ki a Iehova mo e haana loto, agaaga, mo e manatu katoa ti fakaalofa ke he haana katofia tuga na ia ki a ia. (Mataio 22:37-39) Ko e Kerisiano motua fakaagaaga ne lali fakalahi ke omaoma ke he fakatonuaga ia. Ko e puhala ne moui a ia ne fakakite kua mua e aoga he haana a fakafetuiaga mo Iehova mo e fakaalofa hokulo ke he falu.

6, 7. (a) Ko e heigoa falu mahani kua fakakite e Kerisiano motua fakaagaaga? (e) Ko e heigoa kua lata ke hūhū hifo ki a tautolu?

⁶ Ko e fakaalofa e taha he tau mahani loga kua fakakite he Kerisiano motua fakaagaaga. (Kalatia 5:22, 23) Fakakite foki e ia e mahani molū, manako fakalatalata, mo e fakauka. Ko e tau mahani nei ka lagomatai a ia ke fakauka ke he tau tuaga vihi ka e nakai ita mo e ke fakauka ke he tau fakahogohogo manava ka e tumau e  amaamanakiaga. He fakaako fakatagata haana, ko e Kerisiano motua fakaagaaga ne kumikumi tumau ke he tau matapatu fakaakoaga he Tohi Tapu kua lagomatai a ia ke iloa e mena hako mo e mena hepe. Ti ka fakaaoga e ia haana loto manamanatu ne fakaako he Tohi Tapu, to maeke a ia ke taute e tau fifiliaga kua tonu. Ko e Kerisiano motua fakaagaaga kua loto holoilalo, ti talitonu a ia kua mitaki tumau e takitakiaga mo e tau tuaga ha Iehova ke he haana. * (Kikite matahui tala.) Fakamatala fakamakai e ia e tala mitaki ti taute e tau mena oti kua maeke ia ia ke lagomatai e fakapotopotoaga ke pipiki fakalataha tumau.

⁷ Pete ne fiha e leva he fekafekau a tautolu ki a Iehova, igatia a tautolu mo e hūhū hifo: ‘Fai hikiaga nakai ka taute e au ke fifitaki fakatata lahi ki a Iesu? Fai puhala nakai ke maeke au ke holo ki mua?’

8. Iloa mo e maama mitaki fēfē e Iesu e Tohi Tapu?

⁸ Iloa mo e maama mitaki e Iesu Keriso e tau Tohiaga Tapu. Pete he 12 e tau haana he moui, ne fakaaoga e ia e tau Tohiaga Tapu he tutala ke he tau akoako he faituga. “Kua ofomate a lautolu oti  kana ne fanogonogo kia ia ke he loto matala hana mo e hana tau kupu ne tali atu.” (Luka 2:46, 47) Fakamui, he mogo ne fakamatala a ia kua fakaaoga fakailoilo e ia e Kupu he Atua ke fakanonono aki e tau fī haana.​—Mataio 22:41-46.

9. (a) Ko e heigoa e fakaholoaga fakaako kua moua he Kerisiano motua fakaagaaga? (e) Ko e ha kua fakaako e tautolu e Tohi Tapu?

⁹ Ko e tagata ne manako ke eke mo Kerisiano motua fakaagaaga kua muitua e fifitakiaga ha Iesu ti manako ke maama lahi e ia e Tohi Tapu. Kua kumikumi tumau e ia e tau kupu mooli hokulo he tau Tohiaga Tapu, ha kua iloa e ia “ko e tau mena kakano, kua lata ia mo e tau tagata motua.” (Heperu 5:14) Ko e Kerisiano motua fakaagaaga kua manako ke “iloa maliali” e Tohi Tapu. (Efeso 4:13) Ti hūhū hifo: ‘Totou nakai e au e Tohi Tapu he tau aho takitaha? Fai fakaholoaga nakai au ma e fakaako fakatagata? Fai tapuakiaga he magafaoa nakai au he tau faahi tapu takitaha?’ Ka fakaako e koe e Tohi Tapu, kumi ma e tau matapatu fakaakoaga ka lagomatai a koe ke iloa e puhala ne manamanatu mo e logonaaga ha Iehova. Ti fakaaoga e tau matapatu fakaakoaga nei ka taute e koe e tau fifiliaga. To lagomatai he mena ia a koe ke fakatata lahi atu ki a Iehova.

10. Fēfē e logonaaga he Kerisiano motua fakaagaaga ke he fakatonuaga mo e tau matapatu fakaakoaga he Atua?

¹⁰ Kua lata he Kerisiano motua fakaagaaga ke nakai ni iloa hokoia e mena ne talahau he Tohi Tapu. Lata a ia ke fiafia ke he fakatonuaga mo e tau matapatu fakaakoaga he Atua. Ti fakakite e ia e fiafia nei ha ko e manako haana ke taute e finagalo ha Iehova ka e nakai ko e haana. Hiki foki e ia e puhala he moui, manamanatu, mo e aga haana. Ma e fakatai, ne fifitaki e ia a Iesu ti feaki e tau aga foou, “kua eke ke lata mo e Atua, ke he tututonu mo e mahani mitaki ke fakamoli ai.” (Totou Efeso 4:22-24.) Kua aoga ke manatu na fakaaoga he Atua e agaaga tapu haana ke takitaki e tau tagata tohia Tohi Tapu. Ti ka fakaako he Kerisiano e Tohi Tapu, lagomatai he agaaga tapu he Atua a ia ke tupu e iloilo, tupu e fakaalofa, mo e tupu e fakafetuiaga haana mo Iehova.

11. Ko e heigoa ne tupu he nofo a Iesu he lalolagi?

¹¹ Ko Iesu ko e tagata mitaki katoatoa. Ka ko e mogo ne nofo a Iesu he lalolagi, ne takatakai a ia he tau tagata nakai mitaki katoatoa. Ko e tau matua haana mo e tau lafu haana ne nakai mitaki katoatoa oti. Fakakite foki he tau tutaki tata lahi ha Iesu e tau mahani tuga e fakaikaluga mo e lotokai. Ma e fakatai, he pō to mate a ia, ne taufetoko haana tau tutaki ki a lautolu ni “ko hai taha ia lautolu ke mua.” (Luka 22:24) Pete ne manamanatu nakai mitaki katoatoa ha lautolu, ne iloa e Iesu to nakai leva ti eke e tau tutaki haana mo tau Kerisiano motua fakaagaaga ti fakatū e fakapotopotoaga ne kaufakalataha. He pō ia foki, ne liogi a Iesu ma lautolu ke kaufakalataha. Ne ole a ia ke he haana a Matua he lagi ke taha a lautolu oti, he pehē: “Ke tuga a koe, ma Matua na e, ha i loto ia au, ko au foki ha i loto ia koe.” Lafi e ia: “Kia taha a lautolu, tuga na taua ne taha.”​—Ioane 17:21, 22.

12, 13. (a) Ko e heigoa e foliaga ha tautolu ko e tau Kerisiano? (e) Fakaako fēfē taha matakainaga taane ke fakatupu e kaufakalatahaaga?

¹² Ko e Kerisiano motua fakaagaaga kua fakatupu e kaufakalataha he fakapotopotoaga. (Totou Efeso 4:1-6, 15, 16.) Ha  ko e tau Kerisiano, ko e foliaga ha tautolu ke “tutaki fakalataha,” kakano ke gahua fakalataha. Ke moua e puhala kaufakalataha nei kua lata e Kerisiano ke loto holoilalo. Ti pete ne lauia a ia he tau kūkū he falu, kua eketaha e Kerisiano motua fakaagaaga ke fakatumau e malolō he kaufakalataha he fakapotopotoaga. Ko e mena ia, hūhū hifo: ‘Fēfē e tali haaku ka taute he matakainaga e hehē? Fēfē e logonaaga haaku ka fai tagata ne fakamamahi au? Fa mahani kia a au ke nakai liu tutala ke he tagata ia? Po ke lali kia a au ke ati hake e fakafetuiaga?’ Ko e Kerisiano motua fakaagaaga kua manako ke fakamafola e lekua ka e nakai ke eke mo lekua ke he falu.

¹³ Manamanatu ke he fakataiaga ki a Uwe. He vahā kua mole, ne fa fakaatā e ia e tau kūkū he tau matakainaga ke fakaita a ia. Ti fifili a ia ke fakaaoga e Tohi Tapu mo e Insight on the Scriptures ke kumikumi ke he moui ha Tavita. Ko e ha ne fifili a Tavita? Ha kua lauia foki a Tavita he tau lekua mo e falu he tau fekafekau he Atua. Ma e fakatai, ne lali e Patuiki ko Saulo ke kelipopo a Tavita, falu tagata ne manako ke pinimaka a ia, ti vā foki he hoana haana a ia. (1 Samuela 19:9-11; 30:1-6; 2 Samuela 6:14-22) Ka e pete ne tau mena ne taute he falu ki a Tavita, ne fakaalofa a ia ki a Iehova ti falanaki ki a ia. Ti fakakite foki e Tavita e fakaalofa hofihofi. Talahau e Uwe kua lata a ia ke taute pihia. He kumikumi haana ke he Tohi Tapu, ne iloa e ia kua lata a ia ke hiki e puhala ne logona hifo e ia hagaao ke he tau kūkū he tau matakainaga haana. Lata a ia ke oti e manatu ke he tau hehē ha lautolu ti fakatupu e kaufakalataha he fakapotopotoaga. Ko e foliaga nakai haau ke taute pihia?

14. Fifili fēfē e Iesu e tau kapitiga haana?

¹⁴ Ne kapitiga a Iesu Keriso ke he tau tagata. Ko e tau tagata taane mo e tau fifine, ikiiki mo e momotua, ti pihia foki e tau fanau, ne logona e haohao mitaki mo Iesu. Ka e fifili fakamitaki e ia e tau kapitiga tata haana. Tala age a ia ke he tau aposetolo haana: “Ko e haku a tau kapitiga a mutolu, kaeke ke eke e mutolu e tau mena oti kana kua tala atu ai au kia mutolu.” (Ioane 15:14) Ne fifili e Iesu e tau kapitiga tata haana mai ia lautolu ne muitua fakamooli ki a ia mo e kua fakaalofa mo e fekafekau ki a Iehova. Fifili nakai e koe e tau kapitiga ne fakaalofa ki a Iehova mo e ha lautolu a tau loto katoa? Ko e ha kua aoga e mena nei?

15. Maeke fēfē a lautolu ne fuata ke aoga mai he kapitiga mo e tau Kerisiano motua fakaagaaga?

¹⁵ Laulahi he tau fua akau ne momoho mitaki ka haia he mena ne fai laā. He puhala taha, ko e fakaalofa mafanatia he tau matakainaga ha tautolu ka lagomatai a koe ke eke mo Kerisiano motua fakaagaaga. Ko koe kia ko e fuata hane lali ke fifili e mena ka taute e koe he moui haau? Ka pihia, kua pulotu ke fifili e tau kapitiga ne fai magaaho he fekafekau ki a Iehova mo e kua fakatupu e kaufakalataha he  fakapotopotoaga. Liga ha ha ia lautolu e tau lekua he tau momoui ha lautolu ti liga fakauka a lautolu ke he tau paleko ka e fekafekau ki a Iehova. Maeke ia lautolu ke lagomatai a koe ke fifili e puhala mitaki lahi he moui. Ka fai magaaho a koe mo lautolu, maeke ia lautolu ke lagomatai a koe ke taute e tau fifiliaga pulotu ti tupu ke eke mo Kerisiano motua fakaagaaga.​—Totou Heperu 5:14.

16. Lagomatai fēfē e lautolu ne momotua he fakapotopotoaga e taha matakainaga fifine he mogo ne fuata a ia?

¹⁶ Manatu e Helga he tau fakahiku haana he aoga, laulahi he tau kapitiga aoga haana ne tutala hagaao ke he tau foliaga ha lautolu ma e vahā anoiha. Tokologa ia lautolu ne loto ke ō ke he univesitī ke moua e gahua monuina. Ka e tutala a Helga ke he tau kapitiga motua fakaagaaga he fakapotopotoaga haana. Pehē a ia: “Tokologa ia lautolu ne motua hake ia au, ti lahi e lagomatai ha lautolu ki a au. Ne fakamalolō e lautolu au ke taute e fekafekauaga mau. Fakamui ne maeke au ke fekafekau ko e paionia ke lima e tau. Fai tau mogonei he mole, ne fiafia au ha kua hagaaki fakalahi e au e vahā fuata haaku ke fekafekau ki a Iehova. Nakai tokihala au ke he mena ne taute e au.”

17, 18. Maeke fēfē a tautolu ke fekafekau fakamitaki ki a Iehova?

¹⁷ Ka fifitaki e tautolu a Iesu, to tupu a tautolu ke eke mo tau Kerisiano motua fakaagaaga. To fakatata lahi atu a tautolu ki a Iehova, ti tupu foki e manako ha tautolu ke fekafekau ki a ia. Fekafekau fakamitaki he tagata a Iehova ka motua fakaagaaga a ia. Fakamalolō e Iesu e tau tutaki haana: “Kia kikila atu pihia ha mutolu a maama ki mua he tau tagata, kia kitia ai e lautolu ha mutolu a mahani mitaki ati fakaheke atu ai a lautolu ke he Matua ha mutolu ha ha he lagi.”​—Mataio 5:16.

¹⁸ Kua fakaako e tautolu e puhala ka eke e Kerisiano motua fakaagaaga mo lalagoaga malolō ke he fakapotopotoaga. Fakakite foki he Kerisiano e motua fakaagaaga haana ke he puhala ne fakaaoga e ia e loto manamanatu haana. Maeke fēfē he loto manamanatu ha tautolu ke lagomatai a tautolu ke taute e tau fifiliaga pulotu? Ti maeke fēfē a tautolu ke fakalilifu e loto manamanatu he falu? To tali e tautolu e tau hūhū nei he vala tala ka mui mai.