KO E magaaho ne hiva e tau he moui haaku, ne oti e loa haaku. Mogonei he 43 e tau, taha ni e mita haaku he loa. Magaaho ne mailoga he tau matua haaku kua nakai loa hake au, fakamafana e laua au ke gahua malolō ke nakai manamanatu tumau ki ai. Ke tumau e lavelave, fakatū e au e tuaga fua lakau i mua he fale ha mautolu ti fakakia tumau ai kua maopoopo. Futiaki mai he mena ia e tokologa he tau tagata fakatau.

Mooli, nakai fai mena taha ne hiki ha ko e gahua malolō. Kū mote agaia au, ti taufetului au mo e tau mena mukamuka he moui tuga e tokoluga he tau laulau ne totogi e tau koloa fakatau. Kua tuga na talaga e tau mena oti ma e tau tagata ne fakalahi ua e loloa ia au. Momoko na au ki a au, ka e hiki e mena ia he 14 e tau he moui haaku.

He taha aho, tokoua e fifine ne ko e Tau Fakamoli a Iehova ne fakatau e falu fua lakau ti foaki ke fakaako Tohi Tapu mo au. Nakai leva ti mailoga e au kua mua e aoga ke iloa a Iehova mo e finagalo haana ke he loa haaku. Lagomatai lahi he mena ia au. Eke e Salamo 73:28 mo kupu tohi ne fiafia lahi au ki ai. He vala fakamua he kupu ia ne pehē: “Ko e mitaki kia au ke fakatata ke he Atua.”

Ne hiki fakaofo e magafaoa ha mautolu mai i Côte d’Ivoire ki Burkina Faso, ti hiki lahi e moui haaku. He tuutakaina tuai ha mautolu, kua mahani e tau tagata ke kitia au he tapa he tuaga fua lakau. Ka e he tuutakaina foou ha mautolu, tokologa ne onoono ki a au kua kehe au, ti matakehe foki. Mataono e tau tagata ki a au, ti nofo ni au i fale ke he tau faahi tapu loga. Manatu mogoia e au e mitaki ma haaku ke fakatata ki a Iehova. Ne tohi au ke he la ofisa he Tau Fakamoli a Iehova, ti fakafano mai e lautolu e tagata hako. Ko e misionare ko Nani ne hau he sikuta (scooter) ke ahiahi ki a au.

Ne hekeheke tumau e tau puhalatū he tuutakaina ha mautolu, ti pelapela he tau vahā uha. Lagaloga e tō a Nani he sikuta haana ka hau ke taute e fakaakoaga mo au, ka e fakatumau na ia ke hau. He taha aho ne foaki e ia ke uta au ke he tau feleveiaaga. Mailoga e au, he toka e fale haaku to fakamanava lahi au ke he mataono he tau tagata. Lafi foki, ka heke au i tua he sikuta to fakamamafa foki e sikuta ne kua fitā e uka ke fakaholo. Pete ia, talia e au he manatu e vala ke  uaaki he kupu tohi ne fiafia lahi au ki ai: “Kua eke e au e Iki ko Iehova mo kolo haku.”

Ne mokulu a maua mo Nani he falu mogo ke he pelapela, ka ko e fiafia ha maua ke he tau feleveiaaga ti ai popole a maua. Kehe mamao mai he tau mamali fiafia ne kitia e au i loto he Fale he Kautu mo e mataono kua moua e au i fafo! Hiva e mahina he mole ti papatiso au.

“Kia talahau atu . . . hāu a tau gahua oti” ko e vala ke toluaki he kupu tohi ne fiafia lahi au ki ai. Iloa e au to paleko lahi mahaki e gahua he fonua ki a au. Manatu agaia e au e mogo fakamua ne fakamatala au he taha fale ke he taha fale. Ko e tau fanau mo e tau tagata lalahi ne mataono mo e mumui ki a au, mo e vaiga e puhala fano haaku. Fakamamahi lahi e mena ia ki a au, ka ko e mogo ne fakamanatu e au ki a au kua lata foki a lautolu mo e Parataiso tuga ni au, ti maeke au ke fakauka.

Ke fakamukamuka ai, moua e au e pasikala taholi hui tolu. Ne poka hake he hoa paionia haaku au he palia ti heke foki mogoia he pasikala he holo hifo he katoa a maua he palia. Pete ne paleko e gahua he fonua he mogo fakamua, ka e nakai leva ti fiafia lahi au he 1998 he eke au mo paionia tumau.

Loga e fakaako Tohi Tapu haaku ne taute, ti tokofā ia lautolu ne papatiso. Lafi ki ai, taha he tau lafu ni haaku ne talia foki e kupu mooli! He logona e puhala ne holo ki mua e falu ne fa fakamafana au he tau magaaho kua latatonu. Taha aho he matematekelea he gagao malaria, fai tohi au ne moua mai i Côte d’Ivoire. Kamata e au e fakaako Tohi Tapu he gutuhala mo e tagata ne fano he univesitī i Burkina Faso, ka kua age ai ke he matakainaga taane. Ne hiki e tagata fakaako he mogo fakamui ki Côte d’Ivoire. Fiafia lahi au ke logona kua eke tuai a ia mo tagata fakailoa nakaila papatiso!

Leveki fēfē e au a au? Ko e fakatokatokaaga ne lagomatai a lautolu ne fai matafatia kua maeke ke fakaako ki a au ke tuitui. Mailoga he taha faiaoga e tau aga gahua haaku ti pehē, “Lata a mautolu ke fakaako a koe ke taute e tau magamoli.” Ti taute pihia ai e lautolu. Taute e au mogonei e tau magamoli unu mo e tau magamoli koukou i kaina. Loto e tau tagata ke he magamoli haaku ti tala age foki ke he falu. Lau ni e au he fakaaoga e sikuta hui tolu.

Momoko ai, ne oti e paionia haaku he 2004 ha kua mamahi lahi mahaki e tua haaku. Ka e fano tumau agaia au he gahua he fonua.

Talahau he tau tagata na iloa lahi au ha ko e mamali haaku. Ha ha ia au e tau kakano oti ke fiafia ha kua mitaki ki a au ke fakatata ke he Atua.​—Ne talahau e Sarah Maiga.