1. Pule fēfē a Iehova mo Iesu? Ko e heigoa ka mauokafua a tautolu ki ai?

KO E fakaalofa ko e mahani mua ue atu ha Iehova ko e Atua. (1 Ioane 4:16) Ko e tufugatia fakamua haana ko Iesu Keriso ne loga e tau he fakalataha mo e haana Matua he lagi ti fakaako mai ia Iehova ko e Atua fakaalofa a ia. (Kolose 1:15) Ne fakakite e Iesu e vahega fakaalofa pihia he moui katoa haana ke he lagi mo e lalolagi. Ti maeke ia tautolu ke iloa tonu to pule tumau a Iehova mo Iesu he puhala fakaalofa.

2. Ko e heigoa e poakiaga kua lata ia tautolu ke omaoma?

² He hūhū taha tagata ki a Iesu ko e poakiaga fe ne mua ue atu, pehē a Iesu: “Kia fakaalofa a koe ke he Iki hau a Atua mo e hau a loto katoa, mo e hau a agaga katoa, mo e hau a manatu katoa. Ko e poaki fakamua hanā mo e lahi. Kua pihia foki mo ia ne ua aki, Kia fakaalofa atu a koe kia ia ne katofia a mua, kia tuga foki na koe kia koe.”​—Mataio 22:37-39.

3. Ko hai e “katofia” ha tautolu?

 ³ Kua aoga lahi ke fakakite e fakaalofa he tau fakafetuiaga oti ha tautolu. Pehē a Iesu kua lata ia tautolu ke fakaalofa ki a Iehova mo e fakaalofa foki ke he katofia ha tautolu. Ka ko hai e “katofia” ha tautolu? Ka fai taane po ke fai hoana a tautolu, ko e katofia tata lahi ha tautolu ko e ha tautolu a taane po ke hoana. Ko e tau matakainaga foki ha tautolu he fakapotopotoaga kua tata ki a tautolu. Ti ko e tau tagata ne feleveia e tautolu he gahua fakamatala ko e tau katofia foki ha tautolu. He vala tala nei, to fakaako e tautolu e puhala ka fakakite e tautolu e fakaalofa ke he ha tautolu a katofia.

4. Maeke fēfē e fakamauaga ke kautū pete ne nakai mitaki katoatoa?

⁴ Ne tufuga e Iehova a Atamu mo Eva ti fakalataha e ia a laua. Ko e fakamauaga fakamua a ia. Ne manako e Atua ki a laua ke fiafia e fakamauaga mo e fakapuke e lalolagi ke he tau fanau ha laua. (Kenese 1:27, 28) Ka e, he mole e liuliu ha laua ki a Iehova ne kelea e fakamauaga ha laua, ti hoko mai e agahala mo e mate ki a tautolu oti. (Roma 5:12) Pete ia, maeke e fakamauaga ke kautū he vahā nei. He Tohi Tapu, ko Iehova ko e Tamataaga he fakamauaga, ne foaki e fakatonuaga ne mua atu e aoga ma e tau taane mo e tau hoana.​—Totou 2 Timoteo 3:16, 17.

5. Aoga fēfē e fakaalofa he fakamauaga?

⁵ Ne fakakite he Tohi Tapu ko e fakaalofa mafanatia mo e hofihofi kua latatonu ma e tau fakafetuiaga fiafia. Aoga mooli e mena nei he fakamauaga. Fakamaama he aposetolo ko Paulo e fakaalofa mooli he pehē a ia: “Kua fakauka e fakaalofa, to totonu, nakai mahekeheke e fakaalofa, nakai hula e fakaalofa, ti nakai fakatokoluga, Nakai mahani fuafuakelea, nakai kumi e ia hana tau mena, nakai ita vave, nakai talahaua e kelea ke he taha, Nakai fiafia ke he tau mahani kelea, ka e fiafia ni mo e kupu moli; Kua fakauka ke he tau mena oti, kua talia e tau mena oti, kua amaamanaki ke he tau mena oti, kua fakamanavalahi ke he tau mena oti. Nakai tuai oti e fakaalofa.” (1 Korinito 13:4-8) Ka manamanatu a tautolu ke he tau kupu ha Paulo mo e fakagahua ai, maeke ia tautolu ke moua e fakamauaga fiafia.

6, 7. (a) Ko e heigoa ne talahau he Tohi Tapu he eke mo ulu he magafaoa? (e) Kua lata ke taute fēfē he taane Kerisiano e hoana haana?

⁶ Ko Iehova ne fifili ko hai kua lata ke eke mo ulu he magafaoa. Fakamaama e Paulo: “Kua loto au ke iloa ai e mutolu ko e ulu he tau tane oti ko Keriso haia, ko e ulu he hoana ko e tane haia, ka ko e ulu a Keriso ko e Atua haia.” (1 Korinito 11:3) Ka e amanaki a Iehova ke he tau taane ke eke mo tau ulu fakaalofa ka e nakai favale. Ko e Ulu totonu mo e nakai lotokai a Iehova. Ti ko e fua ne fakalilifu e Iesu e pule fakaalofa he Atua, ti pehē a ia: “Kua fakaalofa au ke he Matua.” (Ioane 14:31) To nakai logona hifo pihia a Iesu ane mai aga vale a Iehova ki a ia.

⁷ Pete ko e taane ko e ulu he hoana haana, pehē e Tohi Tapu ke fakalilifu e ia e  hoana haana. (1 Peteru 3:7) Maeke fēfē he taane ke taute e mena ia? Maeke a ia ke manamanatu ke he tau manako he hoana mo e fakalilifu e tau mena ne loto a ia ki ai. Talahau he Tohi Tapu: “Ko mutolu, ko e tau tane, kia fakaalofa a mutolu ke he tau hoana ha mutolu, tuga e fakaalofa a Keriso ke he ekalesia, mo e foaki mai e ia a ia ke eke mo hukui māna.” (Efeso 5:25) Ē, ne foaki foki e Iesu e moui haana ke lata mo e tau tutaki haana. Kaeke ko e ulu fakaalofa e taane tuga a Iesu, to mukamuka lahi ma e hoana ke fakaalofa mo e fakalilifu a ia mo e lalago e tau fifiliaga haana.​—Totou Tito 2:3-5.

8. Lata ke fēfē e logonaaga ha tautolu hagaao ke he tau matakainaga ha tautolu?

⁸ Totou miliona e tagata he lalolagi he vahā nei ne tapuaki ki a Iehova. Lata ke fēfē e logonaaga ha tautolu hagaao ke he tau matakainaga ha tautolu? Talahau he Tohi Tapu: “Kia mahani mitaki a tautolu . . . ke he tau tagata oti kana, ka e au atu ke he faoa ne tua.” (Kalatia 6:10; totou Roma 12:10.) Tohi he aposetolo ko Peteru ko e ha tautolu a ‘omaoma ke he kupu moli’ kua lata ke fua mai he “fakaalofa fak[a]moli ke he tau matakainaga.” Pehē foki a Peteru ke he tau matakainaga Kerisiano: “Kia mua ke he tau  mena oti ke moua e mutolu e fakaalofa lahi ko e taha kia taha.”​—1 Peteru 1:22; 4:8.

9, 10. Ko e ha ne kaufakalataha e tau tagata he Atua?

⁹ Kua ofoofogia e fakatokatokaaga ha tautolu he lalolagi katoa. Ko e ha? Ha kua moua e tautolu e fakaalofa hokulo mo e mooli ma e tau matakainaga ha tautolu. Mua atu ai, kua fakaalofa a tautolu ki a Iehova mo e omaoma e tau fakatufono haana, ne lalago e ia a tautolu he foaki mai e malolō mua ue atu he lagi mo e lalolagi katoatoa, ko e agaaga tapu. Lagomatai he agaaga he Atua a tautolu ke eke mo tau matakainaga fakalataha mooli he lalolagi katoa.​—Totou 1 Ioane 4:20, 21.

¹⁰ Ne peehi e Paulo e lata mo e fakaalofa he vahāloto he tau Kerisiano he mogo ne tohi e ia: “Kia fakatapulu a mutolu ke he fakaalofa hohofi noa, mo e mahani totonu, mo e loto holoilalo, mo e mahani molu, mo e fakauka, . . . Kia fefakaukaaki a mutolu, mo e fefakamagaloaki, kaeke kua mahani kelea taha kia taha; tuga ne fakamagalo mai a [Iehova] kia mutolu, kia pihia foki a mutolu. Ka e ha i luga he tau mena oti ia e fakaalofa ko e pipi haia ke fakamaopoopo ai.” (Kolose 3:12-14) Ko e fakaaue ha ia ha tautolu ha ko e fakaalofa, ‘ko e pipi ke fakamaopoopo ai’ ne tupu he vahāloto ha tautolu pete ne tau matakavi ne o mai ai a tautolu!

11. Ko e heigoa ne fakakite aki e fakatokatokaaga he Atua?

¹¹ Ko e fakaalofa mooli mo e kaufakalataha he tau fekafekau ha Iehova kua fakakite a lautolu ne fakagahua e tau mena he lotu mooli. Pehē a Iesu: “Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:34, 35) Ti tohi he aposetolo ko Ioane: “Ko e mena ia kua iloa ai e fanau he Atua mo e fanau he tiapolo. Ko lautolu gotoa kua nakai eke e mahani tututonu, nakai mai he Atua a lautolu, katoa mo lautolu kua nakai fakaalofa ke he tau matakainaga ha lautolu. Ha ko e poaki hanai kua fanogonogo ki ai a mutolu tali mai he kamataaga, kia feofanaki a tautolu.” (1 Ioane 3:10, 11) Ko e fakaalofa mo e kaufakalataha ne fakakite ko e Tau Fakamoli a Iehova ko e tau tutaki mooli he Keriso, ko e tau tagata ne fakaaoga he Atua ke fakamatala e tala mitaki he Kautu ke he lalolagi katoa.​—Mataio 24:14.

12, 13. Ko e heigoa ha lautolu he “moto tagata tokologa” hane taute he vahā nei, ti ko e heigoa ka nakai leva ti moua e lautolu?

¹² Laulahi he tau fekafekau ha Iehova he vahā nei ko e vala he “moto tagata tokologa” ne moua mai he tau vala kehekehe he lalolagi, ti fakakite e lautolu e lalagoaga ha lautolu ke he Kautu. “Ko lautolu na kua o mai mai he matematekelea lahi, kua unu foki ha lautolu a tau tapulu, mo e fakahina ha lautolu a tau tapulu ke he toto he Punua mamoe” he fakakite e tua he poa lukutoto ha Iesu. Ko lautolu he “moto tagata tokologa” kua fakaalofa ki a Iehova mo e haana Tama, ti tapuaki a lautolu ki a Iehova ke he “aho mo e po.”​—Fakakiteaga 7:9, 14, 15.

¹³ Nakai leva to moumou he Atua e lalolagi kelea nei he ‘matematekelea lahi.’ (Mataio 24:21; totou Ieremia 25:32, 33.) Ka e to puipui mo e takitaki e Iehova e tau fekafekau haana ke he lalolagi foou haana ha kua fakaalofa a ia ki a lautolu. He mavehe mai e ia teitei 2,000 tau kua mole, “to holoholo kehe he Atua e tau hihina mata oti mai he tau mata ha lautolu; ti nakai tuai fai  mate, po ke fakatutuku, po ke tagi, ti nakai tuai fai matematekelea.” Amaamanaki atu nakai a koe ke moui he Parataiso ka utakehe e mahani kelea, matematekelea, mo e mate?​—Fakakiteaga 21:4.

14. Kua tupu lahi mahaki fēfē e moto tagata tokologa?

¹⁴ He kamataaga he tau aho fakamui he 1914, tokogahoa e tokoafe he tau fekafekau fakauku he Atua ne moua e amaamanakiaga he lagi. He omoomoi he fakaalofa ma e katofia mo e lagomatai he agaaga tapu he Atua, ne fakamatala he matakau tote ia e tala mitaki he Kautu pete ne tau mena vihi. Ko e heigoa e fua? Ko e moto tagata tokologa ne moua e amaamanakiaga ke momoui tukulagi he lalolagi kua fakapotopoto ai. He vahā nei, kavi ke he 8,000,000 he Tau Fakamoli he 115,400 he tau fakapotopotoaga ke he lalolagi katoa, ti matutaki ni e numera ke tupu. Ma e fakatai, molea 275,500 he Tau Fakamoli ne papatiso he tau he fekafekauaga he 2014. Kavi ke he 5,300 ne papatiso he tau faahi tapu takitaha.

15. Logona fēfē he tokologa e tala mitaki he vahā nei?

¹⁵ Kua ofoofogia ke kitia e tokologa ne logona hagaao ke he tala mitaki he Kautu. He vahā nei kua moua e tau tohi ha tautolu ke molea e 700 vagahau. Ko e mekasini The Watchtower ne mua atu e lahi e tufatufa ke he lalolagi. Molea 52,000,000 e lagaki ne lomi ke he 228 e vagahau he tau mahina takitaha. Ko e tohi fakaako ha tautolu What Does the Bible Really Teach? ne fakaliliu ke molea 250 e vagahau. Hokotia mogonei ke molea 200,000,000 e lagaki ne kua lomi ai.

16. Ko e ha ne matutaki e fakatokatokaaga ha Iehova ke tupu?

¹⁶ Kua matutaki e fakatokatokaaga ha tautolu ke tupu ha kua ha ha ia tautolu e tua ke he Atua mo e talia e Tohi Tapu ko e Kupu omoomoi haana. (1 Tesalonia 2:13) Matutaki a tautolu ke fiafia e tau monuina ha Iehova pete ne vihiatia mo e totoko a Satani.​—2 Korinito 4:4.

17, 18. Amanaki fēfē a Iehova ke he logonaaga ha tautolu ki a lautolu ne nakai tapuaki ki a ia?

¹⁷ Kua kehekehe e tau puhala ne tali he tau tagata ke he gahua fakamatala ha tautolu. Falu tagata ne fanogonogo ki a tautolu, ka e falu ne vihiatia e fekau ha tautolu. Amanaki fēfē a Iehova ke he logonaaga ha tautolu ki a lautolu ne nakai tapuaki ki a ia? Pete ne puhala ne tali mai e tau tagata ke he fekau ha tautolu, kua muitua e tautolu e fakatonuaga he Tohi Tapu. Pehē ai: “Aua neke noa ha mutolu a tau kupu mo e fakaalofa, kia fakamasima ke he masima, kia iloa e mutolu ke tali fakatonu atu ke he tau tagata oti kana.” (Kolose 4:6) Ka papale e tautolu e tau taofiaga ha tautolu, manako a tautolu ke taute ai he puhala mahani molu mo e fakalilifu hokulo ha kua fakaalofa a tautolu ke he ha tautolu a katofia.​—1 Peteru 3:15.

¹⁸ Pete foki ka ita mo e fakaheu he tau tagata e fekau ha tautolu, fakakite e tautolu e fakaalofa ma e katofia ha tautolu mo e muitua e fakafifitakiaga ha Iesu. He magaaho ne “amuamu [ki a Iesu], ka e nakai amuamu atu ke taui atu ne fakamamahi a ia ka e nakai fakamatakutaku atu.” Pete he pihia kua falanaki a Iesu ki a Iehova. (1 Peteru 2:23) He tau magaaho oti, fakakite e tautolu e mahani fakatokolalo mo e fakagahua e fakatonuaga: “Aua neke taui atu e kelea ke he kelea, po ke amuamu ke he amuamu; ka kia fakamonuina atu e mutolu.”​—1 Peteru 3:8, 9.

19. Kua lata ke taute fēfē e tautolu e tau fī ha tautolu?

 ¹⁹ Lagomatai he mahani fakatokolalo a tautolu ke omaoma ke he matapatu fakaakoaga kua mua ne foaki e Iesu. Ne fakamaama e ia: “Kua fanogonogo a mutolu kua talahau mai, Kia fakaalofa atu a koe ke he tagata ne katofia mo koe, ka kia fakavihia e tagata kua fai fi kia koe. Ka e tala atu e au kia mutolu, kia fakaalofa atu a mutolu kia lautolu kua fai fi kia mutolu, . . . kia liogi foki a mutolu ma lautolu ne . . . favale mai kia mutolu; Kia eke ai a mutolu mo fanau he Matua ha mutolu ha he lagi, ha kua fakahake ne ia hana la kia lautolu kua mahani kelea katoa mo lautolu kua mahani mitaki, kua fakato hifo foki e ia e uha kia lautolu kua tututonu katoa mo lautolu kua nakai tututonu.” (Mataio 5:43-45) Ha ko e tau fekafekau he Atua, kua lata ia tautolu ke fakaalofa ke he tau fī ha tautolu pete ne puhala kua taute mai e lautolu ki a tautolu.

20. Iloa fēfē e tautolu to puke e lalolagi katoa he fakaalofa ke he Atua mo e katofia? (Kikite fakatino he kamataaga.)

²⁰ He tau magaaho oti, kua lata ia tautolu ke fakakite kua fakaalofa a tautolu ki a Iehova mo e katofia ha tautolu. Pete foki ka totoko he tau tagata a tautolu mo e ha tautolu a fekau, lagomatai e tautolu a lautolu ka manako lagomatai a lautolu. Tohi he aposetolo ko Paulo: “Aua neke toka ia mutolu ha mena taha he taha tagata, ka ko e feofanaki hokoia; ha ko ia kua fakaalofa atu kia taha, kua katoatoa kia ia e omaoma ke he fakatufono. Ha ko e tau kupu nai, Ua faivao, Ua keli tagata, Ua kaiha, Ua fatipiko, Ua manako lahi, kaeke foki kua toe e poaki kua fakamaopoopo ia ke he kupu nai, Kia fakaalofa atu a koe kia ia ne katofia a mua, kia tuga foki na koe kia koe. Kua nakai mahani kelea e fakaalofa kia ia ne katofia mo ia; hanai, ko e fakaalofa ko e katoatoa he omaoma ia ke he fakatufono.” (Roma 13:8-10) He lalolagi mavehevehe mo e vale nei ne pule a Satani, kua fakakite he tau fekafekau he Atua e fakaalofa ke he tau katofia ha lautolu. (1 Ioane 5:19) Ka mole e fakamahaikava e Iehova a Satani, tau temoni haana, mo e lalolagi kelea nei, to puke e lalolagi katoa he fakaalofa. Ko e fakamonuinaaga mooli he magaaho ka fakaalofa e lalolagi katoa ki a Iehova mo e katofia ha lautolu!