Ne talahau ia Iosua 6:10-15, 20 kua takai he kautau Isaraela e maaga ko Ieriko lagataha he aho ke he tau aho ne ono. He aho ke fituaki, ne takai lagafitu e lautolu e maaga. Ati fakamalolo hifo he Atua e tau kaupā maō ha Ieriko, ti fofō he tau Isaraela e maaga. Kua moua nakai he tau tagata kumikumi kelekele ha mena ne fakakite na kū e magaaho ne pātakai a Ieriko, tuga ne talahau he Tohi Tapu?

He tau vahā i tuai, ne pātakai e maaga ka takatakai he tau kautau e tau kaupā, ti mautali ke moumou ai. Kaeke kua leva lahi e pātakai, to kai he tau tagata he maaga e laulahi he tau mena kai ne tanaki e lautolu. Magaaho ne fofō he tau kautau e maaga ti uta e lautolu e tau mena oti ne manako a lautolu, putoia ai e tau mena kai ne toe hifo. Kakano haia kua nakai loga po ke nakai fai mena kai ne moua he tau tagata kumikumi kelekele mai he tau malona i Palesitaina ne kua moumou he puhala nei. Ka e kehe e tau malona ha Ieriko. Ne talahau he Biblical Archaeology Review: “Ko e tau koloa ne mua atu e loga ne moua he moumouaga, nakai ni putoia e tau kapiniu kelekele, ko e tau saito.” Lafi ki ai: “Ke moua e lahi he tau saito kua ofoofogia.”

Kua talahau he Tohi Tapu ne nakai uta he tau Isaraela ha mena kai mai i Ieriko ha kua poaki e Iehova a lautolu ke ua taute ai. (Iosua 6:17, 18) Talahau mai foki kua moumou he tau Isaraela a Ieriko he vahā tau tupu, nakai leva he mole e heleheleaga saito he magaaho ne loga lahi e tau saito ne tanaki ki loto he maaga. (Iosua 3:15-17; 5:10) Ti ko e loga agaia he tau saito i Ieriko he mole e pātakai kua fakamooli ai kua kū e magaaho ne pātakai, tuga ne talahau he Tohi Tapu.