KO E matua fifine haaku ne hūhū ki a au: “Ko e ha a koe ne nakai manako ai ke tapuaki ke he tau tupuna haau? Mailoga nakai e koe ko lautolu ati moua e koe e moui? To fakakite nakai e koe e loto fakaaue haau ki a lautolu? Maeke fēfē a koe ke tiaki noa ni e tau aga fakamotu kua matutaki mai he tau atuhau? Ko e fakaheu ke fakalilifu e tau tupuna ha tautolu ne talahau ai kua goagoa e tapuakiaga ha tautolu.” He oti e talahau he mena nei ne kamata a Mami ke tagi.

Fai mahina ato hoko e mena ia, foaki he Tau Fakamoli a Iehova ke fakaako e Tohi Tapu mo e matua fifine haaku. Nakai manako a ia ke fakaako, ka e fakatoka totonu e ia ma laua ke fakaako mo au. Ti ko e mogonei kua hogohogo manava a ia ki a au, matakehe ai ha kua omaoma tumau au ki a ia. Ha kua manako au ke fakafiafia a Iehova, ne nakai maeke au ke omaoma ki a Mami. Nakai mukamuka, ka e foaki mai e Iehova e malolō ki a au.

Ko e magafaoa haaku ne ō he lotu Puta, tuga e laulahi he tau tagata i Sapanī. Ka e ua e mahina he mole e fakaako mo e Tau Fakamoli a Iehova, talitonu au kua mooli e Tohi Tapu. Mogo ne iloa e au na fai Matua au he lagi, manako lahi au ke iloa mitaki a ia. Fakamua, ne fiafia a Mami mo au he tutala ke he mena haaku kua fakaako. Kamata au ke fano he tau feleveiaaga he Aho Tapu ke he Fale he Kautu. He lahi atu e mena ne iloa e au, ne tala age au ki a Mami to nakai liu au ke fai vala he tau faiagahau faka-Puta. Amanaki ni ti hiki e aga haana. Pehē a ia: “He fai tagata he magafaoa ne nakai fai fakaalofa ma e tau tupuna ha tautolu ko e mena fakalialia.” Poaki a ia ke nakai fakaako e au e Tohi Tapu mo e fano ke he tau feleveiaaga. Ai manatu au to vagahau pihia e matua fifine haaku! Tuga e tagata kehe a ia.

Talia a Tete ki a Mami. Iloa e au mai he Efeso veveheaga 6 ne manako a Iehova ke omaoma au ke he tau matua haaku. Manako au ke liu mafola e magafaoa ha mautolu, ti manatu au ka fanogonogo au ki a laua, to fanogonogo mogoia a laua ki a au. He mogoia, ne lata ia au ke tauteute ma e tau kamatamata haaku he aoga, ti talia e au ke taute e mena ne talahau he tau matua haaku ke tolu e mahina. Ka e mavehe au ki a Iehova to liu au ke he tau feleveiaaga ka hoko e magaaho ia.

Ne ua e kakano ne kelea e fifiliaga haaku. Fakamua, manatu au ka mole e tolu e mahina to malolō  agaia e manako haaku ke fekafekau ki a Iehova. Ka e kamata e fakafetuiaga haaku mo Ia ke mafiti lahi ke lolelole. Uaaki, ne eketaha fakalahi a Mami mo Tete he lali ke taofi au he fekafekau ki a Iehova.

He Fale he Kautu, ne feleveia au mo e tokologa he Tau Fakamoli kua totoko he magafaoa ha lautolu. Ne fakamafana e lautolu au to fakamalolō e Iehova au. (Mataio 10:34-37) Fakamaama e lautolu ki a au ka tumau au ke mahani fakamooli ki a Iehova, to maeke he magafaoa haaku ke fakaako hagaao ki a Ia. Manako au ke falanaki ki a Iehova, ti kamata au ke liogi fakamakamaka.

Kehekehe e tau puhala ne totoko he magafaoa haaku au. Olelalo a Mami ki a au ke fakaoti e fakaako haaku ti lali ke fakakakano mo au. Laulahi he tau mogo ne ai gū au. Ka talahau e au taha mena, fa mahani a maua ke taufetoko ha kua lali tokoua a maua ke fakakite kua hako a maua. Mailoga mogonei e au ka lahi atu e fakalilifu haaku ke he tau logonaaga mo e tau taofiaga ha Mami, liga fakatotoka hifo e tuaga. Lahi atu e tau fekau kaina ne mai he tau matua haaku ki a au ke taofi aki au i kaina. Falu mogo ne loka e laua au i fafo he fale po ke nakai toka ha mena kai ma haaku.

Ole a Mami ke he falu ke lagomatai a ia ke hiki au. Tutala a ia ke he faiaoga haaku, ka e nakai gahua e mena nei. Uta e Mami au ke he takitaki haana he gahua ke maeke a ia ke fakaohooho au ko e mena nakai aoga e tau lotu oti. Hea telefoni foki a ia ke he tau magafaoa ha mautolu ti tagi a ia he ole lagomatai ki a lautolu. Ne fakahogohogo manava lahi he mena ia au. Ka e he tau feleveiaaga, fakamanatu mai he tau motua ki a au ka tutala a Mami ke he falu hagaao ke he tuaga ha maua, ko e fakamatala a ia ki a lautolu.

 Manako e tau matua haaku ke fano au he univesitī ke maeke ia au ke moua e gahua mitaki. Ne hogohogo manava lahi a mautolu ke tutala hagaao ke he matakupu nei he puhala fakatotoka, ti loga e tohi haaku ne tohi ki a laua ke fakamaama e tau foliaga haaku. Ita lahi mahaki a Tete ti pehē, “Ka manatu a koe to moua e koe e gahua, lali ke moua e gahua ato hoko a pogi neke fano kehe a koe he fale ē.” Liogi au ki a Iehova ti ole ki a ia ke lagomatai au. He aho hake, he haia au he gahua he fonua, tokoua e matakainaga fifine kehekehe ne foaki ki a au e gahua ke fakaako e tau fanau ha laua. Nakai fiafia a Tete ke he mena nei, ti ai liu vagahau ki a au mo e kamata ke fakaheu au. Ui a Mami, na lauka au he eke mo tagata matahavala ka e nakai ko e taha he Tau Fakamoli a Iehova.

Falu magaaho ne nakai maama ia au ko e manako ka ha Iehova ki a au ke lahi mahaki e totoko haaku ke he tau matua. Ti liogi au ki a Iehova mo e manamanatu fakahokulo ke he mena ne talahau he Tohi Tapu hagaao ke he fakaalofa haana. Lagomatai he mena nei au ke mitaki e onoonoaga mo e ke maama kua totoko he tau matua haaku au ha kua tupetupe a laua ki a au. Ne lagomatai e Iehova au ke fakahako e puhala manamanatu haaku ti iloa e mena ke taute. Lafi ki ai, he fano tumau au ke he gahua he fonua, ne lahi atu e fiafia haaku. Ē, kua manako au ke eke mo paionia.

Mogo ne logona he falu matakainaga fifine kua manako au ke paionia, ne tala mai a lautolu kua lata ia au ke fakatali ke fakatotoka hifo e tau matua haaku. Ne liogi au ma e pulotu, taute e tau kumikumiaga, manamanatu ke he tau kakano kua manako au ke paionia, mo e tutala ke he tau matakainaga lotomatala. Fifili mogoia au kua manako au ke fakafiafia a Iehova. Maama foki e au pete ni he fai magaaho ka fakatali au ato kamata ke paionia, to totoko agaia he tau matua haaku au.

Ne kamata au ke paionia he tau fakahiku haaku he aoga tokoluga. He fai magaaho ne paionia, ne fia fano au ke he matakavi ne manako lahi ke he lagomatai. Ka e nakai manako a Mami mo Tete ke toka e au a kaina. Ti fakatali au ato tu e 20 e tau. Ole mogoia au ke he la ofisa ma e kotofaaga ne tata ke he tau magafaoa haaku he faahi toga i Sapanī ke ua tupetupe lahi mahaki a Mami.

He kotofaaga ia haaku, ne fiafia au ke kitia e falu he tau tagata fakaako Tohi Tapu haaku ne papatiso. Kamata au ke fakaako e vagahau Peritania ha kua manako au ke lahi e mena ke taute he fekafekauaga haaku. He kitia mogoia e fakamakutu he tokoua he tau paionia pauaki he fakapotopotoaga haaku mo e puhala ne lagomatai e laua e falu, ne fifili foki au kua manako au ke eke mo paionia pauaki. Mogonei, lagaua e gagao lahi mahaki ha Mami ti liu mai lagaua au ki kaina ke lagomatai a ia. Ofo a Mami he mena nei, ti lahi foki e totonu haana ki a au.

Fitu e tau he mole, ko Atsushi, ko e taha he tau paionia pauaki ne totoku e au he mogo fakamua, ne fakafano mai e tohi ki a au. Ne loto a ia ke mau ti manako ke iloa e logonaaga haaku hagaao ki a ia. Nakai fai logonaaga loto fakavihi au ma Atsushi, ti nakai manatu au kua fai foki a ia ki a au. Taha e mahina he mole, ne tali atu au kua fiafia au ke iloa mitaki a ia. Mailoga e maua kua tatai e tau foliaga ha maua. Manako a maua ke matutaki he fekafekauaga mau ti makai ke talia ha kotofaaga. Fakahiku ne mau a maua. Fiafia lahi au he o mai a Mami, Tete, mo e falu magafaoa ke he fakamauaga ha maua.

Nakai leva he mole, he fekafekau a maua ko e tau paionia tumau, ne kotofa a Atsushi mo leveki takaiaga tuipū. Fakamui, ne kotofa a maua ko e tau paionia pauaki ti hoko atu ke he gahua takaiaga foki. He oti e ahiahi ha maua ke he tau fakapotopotoaga oti he takaiaga ha maua ke he mogo fakamua, ne matutaki mai e la ofisa ki a maua he  telefoni. Ole a lautolu kaeke kua makai a maua ke hiki ki Nepal ti matutaki ke he gahua takaiaga i ai.

Kua tupetupe au ke he logonaaga he tau matua haaku he hiki mamao haaku. He matutaki atu au he telefoni ki a laua, ko e tali ha Tete, “To fano a koe ke he matakavi mitaki.” He faahi tapu ne kua mole laia, taha he tau kapitiga ha Tete ne age ki a ia e pepa hagaao ki Nepal, ti kua manamanatu foki a Tete ko e matakavi mitaki ke ahiahi atu.

Ne fiafia a maua ke haia mo e tau tagata totonu i Nepal. Fakamui, ne lafi a Bangladesh ke he takaiaga ha maua. Pete ne tata ki Nepal, ne kehe lahi ai. Lahi e kehekehe ke he gahua he fonua ha maua. Mole e lima e tau, ne liu a maua kotofa ki Sapanī, ko e matakavi ne fiafia a maua he gahua takaiaga mogonei.

Lahi mahaki e mena haaku ne fakaako hagaao ki a Iehova he fekafekau i Sapanī, Nepal, mo Bangladesh. Ko e tau tagata he tau motu nei kua kehekehe e tau aga fakamotu, tau mahani, mo e tau aga tuai. Uho lahi e tau tagata takitaha. Kitia e au e puhala kua leveki e Iehova e tau tagata takitaha, talia a lautolu, lagomatai mo e fakamonuina a lautolu.

Kua loga lahi mahaki e mena haaku kua fakaaue ki a Iehova. Ne fakaatā e ia au ke iloa a ia mo e taute e gahua haana, ti foaki mai e ia ki a au e taane Kerisiano mitaki. Lagomatai he Atua au ke taute e tau fifiliaga mitaki, ti ko e mogonei kua mitaki e fakafetuiaga haaku mo Ia pihia mo e magafaoa haaku. Fakaaue ki a Iehova ha kua liliu a maua mo Mami eke mo tau kapitiga mitaki. Kua hokulo e loto fakaaue haaku ha kua moua e au e mafola mo e Atua pihia mo e matua fifine haaku.