Ne Hiki he Tohi Tapu e Tau Momoui

Ko e heigoa ka hiki e tagata he kege fuata i Mesiko ne fakahigoa ko e Junior Satans ti eke mo tagata he motu ne gahua malolō mo e mahani fakamooli? Ko e ha e fifine pisinisi ne kautū i Sapani ne oti e tutuli ke he tau koloa ko e matapatu foliaga haana he moui, ti fēfē e logonaaga haana hagaao ke he tau hikihikiaga ne taute e ia? Ko e heigoa ne fakaohooho e tagata sela kanavaakau tau ke toka e gahua nakai matafakatufono haana ne mautū? Manamanatu la ke he  tau mena ka talahau e lautolu nei.

VALA TALA FAKATAGATA

HIGOA: ADRIAN PEREZ

TAU HE MOUI: 30

MOTU: MESIKO

MOUI FAKAMUA: TAGATA KEGE

MOUI HAAKU KUA MOLE: Kavi ke he 13 e tau he moui haaku, ne hiki atu e magafaoa haaku ki Ecatepec de Morelos he Motu ko Mesiko. He magaaho ia, ne lauia e matakavi ke he matahavala he tau fanau, moumou koloa, mo e kai tulaki. Nakai leva ti fakaaoga hehē e au e kava, moumou e tau koloa, mo e taute e mahani feuaki.

Fakamui, ne liu a mautolu hiki atu ki San Vicente, ko e taone ne fanau ai au. Pete ia, kua eke mo lekua makimaki e kai tulaki i ai. Kua aga mau ke kitia e tau fuata ne mamate he tau puhalatū. Ne hū au he kege ne fakahigoa ko e Junior Satans. Ne kaihā mo e fakaaoga e mautolu e tau tulaki, laulahi ai he hohogi e tau mena tuga e turpentine po ke pili. Lagaloga ai, ne nakai manatu e au ko e hoko fēfē au ki kaina, ti falu magaaho ne takoto nakai ofoofo au he puhalatū. Falu he tau kapitiga haaku ne fakahiku ke he fale puipui ha ko e kaihā mo e kelipopo tagata.

Pete ne tau mena oti ia, kua talitonu au ke he Atua. Ke fakahautoka e manamanatuaga haaku, ne fakalataha au ke he tau faiagahau fakalotu, tuga e fakatūtū he tau satauro he fale tapu he Faahi Tapu Fakatapu. Ka mole ia, ko mautolu oti, putoia e tagata ne taute e vala he Keriso, ne fakamanatu e fakalatahaaga ha mautolu ke he mena ne tupu he konahia.

 PUHALA NE HIKI HE TOHI TAPU E MOUI HAAKU: He vahā fuata mui haaku, ne kamata au ke fakaako e Tohi Tapu mo e Tau Fakamoli a Iehova. Ne mailoga e au kua nakai fai kakano mooli e moui haaku kaeke ke tumau au ke he puhala ia, to nakai hagahaga mitaki ki a au. Ko e mena ne nava au ki ai ko e manatu ne fakamau ia Kalatia 6:8: “Ko ia kua gana e tau mena ke lata mo e hana ni a tino, to helehele mai ai e ia ke he tino e mena ke popo; ka ko ia kua gana e tau mena ke lata mo e [a]gaga, to helehele mai ai e ia ke he [a]gaga e moui tukulagi.” Ne taute he kupu tohi nei au ke mailoga kaeke ke manako au ke moua e mitaki ni ma haaku, kua lata ia au ke gana e tau mena ke lata mo e vahā anoiha.

He fakaako au ke he Tohi Tapu, ne kamata au ke loto fakaaue ko Iehova ko e Atua moui ne fiafia fakatagata ki a au, ti kua makai a ia ke fakamagalo e tau hala ne taute e au he magaaho kua mole. Ne iloa tonu e au kua fanogonogo a ia mo e tali e tau liogi.

Ne nakai mukamuka ke hiki e puhala moui haaku. He toka e kege ko e mena uka lahi. Ne nakai o fakahanoa ke he falu matakavi, ti nakai maeke au ke fano ke he tau matakavi ia, pete ne nakai fakalataha au ke he kege. He falu magaaho, ne fakamumuli au he tau kapitiga fakamua haaku ha kua tatao e lautolu au mo e lali ke toho atu au ke he tau aga tuai haaku.

Kehe ai, he kamata au ke fina atu ke he tau feleveiaaga mo e Tau Fakamoli ke he Fale he Kautu, ne logona e au e mafanatia mo e fakaalofa he fakapotopotoaga. Ne nava au ha kua ha ha he tau tagata nei e mahani fakamoli mo e momoui fakatatau ke he tau mena ne fakaako e lautolu. Ko e takatakaiaga kehe mamao mai he mena ne mahani au ki ai.

PUHALA NE AOGA KI A AU: Nukua papatiso au ko e taha he Tau Fakamoli a Iehova ke hogofulu e tau mogonei. Ne lali fakalahi au ke fakagahua e tau fakaakoaga he Tohi Tapu he moui haaku. Ti ko e fua, kua moua e au e fakalilifu he magafaoa haaku. Ne iloa e lautolu au mogonei ko e tagata makutu he gahua, ti maeke foki au ke lagomatai fakatupe a lautolu. Ne kamata e matua fifine haaku ke fakaako e Tohi Tapu ti kua eke a ia mogonei mo taha he Tau Fakamoli a Iehova. Kua hikihiki foki e puhala moui he matua taane haaku. Laulahi he magafaoa haaku ne nakai ko e Tau Fakamoli a Iehova, ka e he mole e kitia e mena ne tupu ki a au, kua talahau e lautolu kua maeke he Tohi Tapu ke lagomatai e tagata ke holo ki mua e moui haana.

VALA TALA FAKATAGATA

HIGOA: YAYOI NAGATANI

TAU HE MOUI: 50

MOTU: SAPANI

MOUI FAKAMUA: FIFINE PISINISI NE KAUTŪ

MOUI HAAKU KUA MOLE: Ne tupu hake au he motu tote ne puke he tau tagata fekapitigaaki. Ne pule e matua taane haaku ke he fale koloa lahi he taone ne gahua ai hogofulu e tagata. Ko e fale ha mautolu he tapa fale koloa, ti pete ne lavelave e Matua Taane mo e Matua Fifine, ne nakai logona e au e matimati.

 Ko au e uluaki he tau tama fifine tokotolu, ti tali mai he magaaho ne tote au, ne fakamahani au ke leveki e pisinisi he magafaoa. Ne fai taane tuai au. Ne toka he taane haaku e gahua haana he pege mo e hau ke lagomatai e pisinisi he magafaoa. Tolu e tama ha maua ne fanau putuputui. Ne leveki he matua fifine haaku e tau tama he taute e ia e tau gahua fakakaina, ka e gahua au mai he pogipogi ke hoko ke he pō he fale koloa. Pete ia, ne fai magaaho agaia au ke fakalataha auloa mo e magafaoa haaku.

Ka kua tomo fakatupe ai e matakavi he tau fale koloa, ti kamata ai e pisinisi ha mautolu ke tū hagahaga kelea. He tuaga nei, kua fifili a mautolu ke fakatū e fale koloa ne fakafua e tau koloa tā fale he paka he puhalatū lahi. He aho ia ato taute e fakatokaaga ke kamata e talaga, ko e matua taane haaku, ko e pelesiteni he kamupanī ha mautolu, ne veli he matematekelea fakaofo ke he uhoniu. He mena ne tupu, kua nakai maeke a ia ke vagahau, ti kua lago ki a au e matagahua ke leveki e fale koloa foou. Ne fakatumau e taane haaku ke he fale koloa tuai. Ti holo ki mua e lavelave he tau momoui ha maua.

Kua kautū lahi e fale koloa foou ha mautolu. Ne matalahi au ke he kautūaga haaku ti tote e mohe ha ko e gahua. Pete ne fakahelehele e au e tau tama haaku, ko e mena ni ne toka he manamanatuaga haaku ko e gahua. Ne tote e magaaho haaku ke tutala ke he taane haaku, ti ka tutala a maua, ko e lahi ni ke taufetoko. Ke fahia ke he tupetupe, ne kamata au ke fano tumau he tau pō ke inu kava mo e tau kapitiga mo e tau tagata ne gahua mo au. Ko e mena ne taute e au ko e gahua, inu kava, mo e mohe. Ne kautū au fakatupe ka e holo ki mua e nakai fiafia ti nakai maama e au e kakano.

PUHALA NE HIKI HE TOHI TAPU E MOUI HAAKU: He magaaho ne kamata au ke fakaako e Tohi Tapu mo e Tau Fakamoli a Iehova, tolu e vala he Tohi Tapu ne lauia lahi ki a au. Ne tagi au he maama e kakano he Mataio 5:3: “[“Fiafia a lautolu ne manamanatu ke he tau mena fakaagaaga kua lata ma lautolu,” NW], ha ko e mena eke ma lautolu e kautu he lagi.” Ne fakamaama he kupu tohi nei e kakano ne gatigati e logonaaga haaku pete ne kautū fakatupe au mo e nava mai he tau tagata gahua haaku. Ne mailoga e au ko e manamanatu ni mo e fakamakona he tau manako fakaagaaga haaku ka maeke ke moua e au e fiafia mooli.

He magaaho ia, ne tomo hifo lahi e tuaga fakatupe a Sapani, ti kitia e au ke he tau tagata ne gahua mo au e mooli he 1 Timoteo 6:9: “Ko lautolu kua manako ke maukoloa, kua moua a lautolu he kamatamata, mo e hele, mo e tau manako lahi ne loga kua goagoa ai mo e kelea ai, ko e tau mena ia kua fakatomo ai e tau tagata ke he mahaikava mo e malaia.” Ne logona e au ko e tau kupu ha Iesu ne fakamau ia Mataio 6:24, “nakai maeke ia mutolu ke fekafekau ke he Atua mo Mamone,” ne hagaao ki a au ni, ti fifili au ke taute e tau hikihikiaga he moui haaku.

Ne mailoga e au kua tiaki e au e tau matua haaku, tane haaku, mo e fanau haaku. Ne maaliali foki kua feaki e au e falu aga fakatagata ne nakai mitaki. Nukua fakaikaluga au. Ne tote e fakauka haaku ke he tau tagata. Ti mafiti au ke ita. Fakamua, ne manatu au to nakai maeke au ke hiki ti eke mo Kerisiano. Pete ia, ne fakahelehele mooli e au e fanau haaku ti mailoga e au he fakagahua e fakatonuaga he Tohi Tapu he magaaho ne fehagai au mo e magafaoa haaku, ne tali fiafia lahi e tau tama haaku. Ne lahi e magaaho ne fakaaoga e au mo lautolu ti uta ai foki mo au ke he tau feleveiaaga Kerisiano.

PUHALA NE AOGA KI A AU: He iloa e kakano he moui mo e maeke ke fekafekau ke he Atua, mo e moua e moui kua fakafiafia ki a ia, kua foaki ki a au e olioli mo e makona mooli. Ne tuku mua tumau e au mogonei e magafaoa haaku ke he gahua, ti kua maeke ia au ke liu moua e fakalilifu fakatagata ne galo ia au.

He kitia e puhala he aga fakatagata haaku kua hiki ke he mitaki he fakagahua e au e tau matapatu fakaakoaga he Tohi Tapu ne fakalagalaga e matua fifine haaku ke fakaako e Tohi Tapu ti eke mo Kerisiano. Fiafia ai, ne nakai totoko he matua taane po ke taane haaku e tau fifiliaga ha mautolu. Kua tata lahi foki e fakafetuiaga haaku mo e tau tama, ti kua olioli e au e moui magafaoa fiafia mooli mogonei.

 VALA TALA FAKATAGATA

HIGOA: MIKHAIL ZUYEV

TAU HE MOUI: 51

MOTU: RUSIA

MOUI FAKAMUA: TAGATA SELA KANAVAAKAU NAKAI MATAFAKATUFONO

MOUI HAAKU KUA MOLE: Ko e taone haaku ko Krasnogorsk, ne takatakai ke he tau akau lanu laukou uhiuhi. Ne tafe e Vailele i Moscow ke he faahi toga. Ke he faahi lalo mo tokelau, kua teitei maluia katoa e maaga ke he vao uhi.

He mogo ne tote au, ne fiafia au ke taumoto mo e taute fakataitai he tau kanavaakau tau. Ne lahi mahaki e magaaho ne fakaaoga e au ke faofao tino. Ne talaga foki e au e tau fana, tau matapulu, mo e tau titipi nakai matafakatufono. Nakai leva ti eke e au e mena nei mo gahua haaku. Ne fakatokatoka mitaki mo e kautū lahi au he sela e tau koloa haaku ke he tau tagata kolokolovao.

PUHALA NE HIKI HE TOHI TAPU E MOUI HAAKU: He mataulu he atu tau 1990, ne feleveia au mo e Tau Fakamoli a Iehova, ke he magaaho fakamua ne nakai falanaki au ki a lautolu. Ne nakai fiafia au ha kua loga lahi e tau hūhū ha lautolu.

Taha aho, ne totou he taha ia laua ki a au e Roma 14:12: “To takitokotaha a tautolu mo e talatala atu hana mahani ke he Atua.” Ne manamanatu au ko e heigoa la haaku ka tala age ke he Atua. Ne fakalagalaga he kupu tohi nei au ke ako e mena ne manako e Atua ki a au.

Ne eketaha au ke fakagahua e fakatonuaga he Tohi Tapu ne fakamau ia Kolose 3:5-10: “Hanai, kia tamate e mutolu ha mutolu a tau fahi tino ha he lalolagi, ko e feuaki, ko e mahani kelea, ko e manako kelea, ko e foli kelea, mo e mahekeheke, ko e hufeilo ke he tupua haia; ha ko e tau mena ia kua hoko mai ai e ita he Atua . . . kia tuku kehe e mutolu e tau mena oti ia ko e ita foki, ko e vale, ko e loto kelea, ko e kupu kelea, mo e kupu fuafuakelea, mai he tau gutu ha mutolu; Aua neke fepikopikoaki ha kua tuku kehe e mutolu e tagata tuai katoa mo e hana tau mahani. Ha kua fakatapulu a mutolu ke he tagata fou.”

Ne uka lahi au ke taute e tau hikihikiaga pihia. Ne fakatumau e tau tagata gahua fakamua mo au ke mai e tau tupe ki a au ma e tau kanavaakau tau, ti kua uka ia au ke tautaofi e au au ka fakaita mai he tau tagata. Pete ia, ne moumou e au e fakaputuaga kanavaakau tauuka lahi haaku. He iloa fakahaga e au e fakaalofa he Atua mo e Keriso ne fakakite ki a au, ne fakalagalaga a au ke fakaalofa ki a laua. Ne fakatumau au ke he fakaako fakatagata haaku ke he Tohi Tapu, fina atu he tau feleveiaaga fakapotopotoaga he matakavi, mo e liogi ma e lagomatai he Atua.

PUHALA NE AOGA KI A AU: He fano ni fakahaga mo e lahi mahaki e taufetului fakalataha mo e lagomatai he tau matakainaga taane Kerisiano haaku, ne feaki e au e aga mitaki. He maama kua leveki e Iehova ko e Atua a tautolu takitokotaha, pihia foki mo e tau tagata kua mamate, ne fuluola lahi ki a au. (Gahua 24:15) Ne uho lahi ki a au e mahani fakamooli mo e matutakiaga ne kitia e au ke he Tau Fakamoli a Iehova. Ti loto fakaaue au ke he fiafia mooli ne fakakite e lautolu ki a au mo e mahani fakamooli ha lautolu ke he Atua.

He magaaho fakamua, ne totoko he falu he magafaoa mo e tau kapitiga haaku e tua foou haaku. Ka e mafanatia a lautolu he manatu kua lauka au ke putoia ke he lotu ka e nakai putoia ke he matahavala fakatokatoka pauaki. Kua fiafia au he nakai liu e moui haaku ke fakatupa ke he sela he tau kanavaakau tau ka kua tukulele ke lagomatai e falu ke ako hagaao ke he Atua he mafola.

[Fakatino he lau 27]

Ne fakalataha au ke he tau faiagahau Katolika ke fakahautoka e manamanatuaga haaku

[Fakatino he lau 28]

Ne kautū fakatupe au ka e nakai fiafia lahi