KUA kitia nakai e koe falu ne taute mena kelea?​— a Ne kitia e Samuela. Ne nofo a ia he matakavi ne nakai amanaki a koe kua tutupu e tau mena pihia. Ko e faituga he Atua a ia, po ke matakavi he tapuakiaga, he maaga ko Sailo. Kia kitekite la a tautolu, he molea e 3,000 tau kua mole, ke he puhala ne eke e Samuela e faituga he Atua mo kaina haana.

Ato fanau a Samuela, ne manako lahi haana matua fifine, ko Hana, ke fai tama. He aahi atu ke he faituga, ne liogi a Hana ke he Atua hagaao ke he mena ia. Ne liogi fakamakamaka a ia ati kalamukalamu haana tau laugutu. Ne taute he mena nei e ekepoa ne mua, ko Eli, ke manamanatu kua konahia a Hana. Ka ko e magaaho ne iloa ai e Eli ne nakai ko e konahia ka ko e tupetupe lahi a Hana, ne fakamonuina e Eli a ia, pehē: “Kia foaki mai foki he Atua a Isaraela e tau mena kua ole e koe kia ia.”​—1 Samuela 1:17.

Fakamui, ne fanau a Samuela ti fiafia lahi a Hana ti tala age a ia ke he taane haana ko Elekana: ‘Ato oti e kai huhu a Samuela, to uta e au a ia, ke he faituga ke fekafekau ai ke he Atua.’ Ti ko e mena ia ni ne taute e ia! He mogoia, kua liga fā po ke lima e tau ha Samuela he moui.

Kua fuakau tuai a Eli, ti ko e tau tama taane haana, ko Hofeni mo Fineaso, ne nakai hako e puhala ne tapuaki ki a Iehova. Ne mahani feuaki foki a laua mo e tau fifine ne aahi atu ke he faituga! Ko e heigoa he manatu e koe kua lata e matua taane ha laua ke taute?​— E, ne lata a ia ke akonaki a laua mo e nakai fakaatā ke taute e tau mena kelea ia.

Ne tupu hake e fuata tote ko Samuela he faituga, ti liga iloa e ia e mahani kelea he tau tama taane ha Eli. Muitua nakai a Samuela ke he fakafifitakiaga kelea ia ha laua?​— Nakai, ne fakatumau a ia ke taute e mena kua hako, tuga ni he fakaako he tau matua haana a ia ke taute. Nakai ofo ai, kua ita a Iehova ki a Eli. Ne fakafano atu foki e ia e perofeta ke tala age ki a Eli hagaao ke he puhala ka fakahala e Ia e  magafaoa ha Eli, mua atu ke he tau tama taane kelea haana.​—1 Samuela 2:22-36.

Ne matutaki a Samuela ke fekafekau mo Eli he faituga. Ti hoko ke he taha pō, ko Samuela hane mohe, ne ui ai haana higoa. Ti poi atu a Samuela ki a Eli, ka e tala age a Eli ki a ia, nakai ui atu au ki a koe. Ne liu foki ui atu ki a ia. He mole e mena taha ia ne tupu ke lagatolu aki, ne tala age a Eli ki a Samuela ke talahau: “Kia vagahau mai ā koe Iehova na e, ha kua fanogonogo atu hau a fekafekau.” He magaaho ne talahau pihia e Samuela, ati vagahau a Iehova ki a ia. Iloa nakai e koe e mena ne tala age e Iehova ki a Samuela?​—

Ne fatiaki he Atua ki a Samuela e finagalo Haana ke fakahala e magafaoa a Eli. He pogipogi hake, ne matakutaku a Samuela ke tala age ki a Eli e mena ne tala age e Iehova. Ka kua olelalo a Eli ki a Samuela: “Aua neke fufu ai e koe ia au ha kupu.” Ati fakahiku ai, ne tala age e Samuela e tau mena oti ne vagahau age e Iehova to taute e Ia​—tuga ni he tala age fakamua he perofeta Haana ki a Eli. Ko e tali a Eli: “Kia eke e ia [Iehova] e mena kua finagalo ai a ia.” Fakahiku ai, ne kelipopo a Hofeni mo Fineaso, ti mate foki a Eli.​—1 Samuela 3:1-18.

He magaaho ia, “ne tupu a Samuela, ti fakalataha a Iehova mo ia.” Mogonei, liga ko e fuata mui a Samuela, ko e magahala kua mua e aoga ke he tau momoui ha lautolu kua ikiiki. Manatu nakai a koe kua mukamuka ki a Samuela ke fakatumau ke taute e mena hako pete he nakai pihia e falu?​— Pete ne nakai mukamuka, ne fekafekau fakamooli a Samuela ki a Iehova ke he moui katoa haana.​—1 Samuela 3:19-21.

Ka e kua a koe? To tuga nakai a Samuela a koe ka tupu hake? To pipiki nakai a koe ke he mena kua hako? To matutaki nakai a koe ke taofi mau ke he tau fakaakoaga he Tohi Tapu mo e tau mena ne fakaako he tau matua haau ki a koe? Ka taute pihia e koe, to fakafiafia e koe a Iehova mo e tau matua haau.