Fā e Hūhū Hagaao ke he Fakaotiaga kua Tali

KUA talahau tuai e Iesu Keriso he magaaho i mua, ‘to hoko mai e fakaotiaga.’ He fakamaama hagaao ke he magaaho na, ne pehē a ia: “Ko e vaha ia ke lahi ai e matematekelea, nakai pihia taha mena tali mai he kamataaga he lalolagi, kua hoko ni ke he vaha nai; ti nakai tuai pihia foki.”—Mataio 24:14, 21.

Ko e tau talahauaga ha Iesu hagaao ke he fakaotiaga, lafi mo e falu faahi kupu he Tohi Tapu ke he matakupu nei, kua lagā mai e tau hūhū loga ne aoga. He ha he veveu e Tohi Tapu haau ti totou e tau talahauaga i ai ke he tali he tau hūhū ia?

1 Ko e Heigoa ka Fakaoti?

Nakai fakaako he Tohi Tapu to moumou e fua lalolagi. “Ko ia [Atua] ne fakave e lalolagi ki luga he hana tau fakave,” he tohi he salamo. “Kia nakai tuai gahuahua a ia tukulagi tukumuitea.” (Salamo 104:5) Nakai fakaako foki he Tohi Tapu to mahakava e tau mena momoui oti kana he felakutaki he lalolagi. (Isaia 45:18) Ne fakakite e Iesu to fai tagata ka hao he fakaotiaga. (Mataio 24:21, 22) Ti ko e heigoa mogoia ne talahau he Tohi Tapu ka fakaoti?

To fakaoti e tau fakatufono kaumahala he tagata. Ne omoomoi he Atua e perofeta ko Tanielu ke tohi: “To fakatu ai he Atua he lagi e kautu nakai fakaoti tukulagi; ko e kautu foki ia nakai tuku atu ai ke he taha motu, to tuki malipilipi mo e fakaotioti e tau kautu oti ia, ka ko ia to tumau tukulagi a ia.”—Tanielu 2:44.

To fakaoti e felakutaki mo e kiva. He fakamaama e mena ka taute he Atua, ne talahau he Salamo 46:9: “Kua fakahiku e ia e tau ato hoko ke he fakatulakiaga he lalolagi; kua fafati e ia e kaufana, mo e tūtū e tao; kua huhunu foki e ia e tau kariota ke he afi.” Ti fakaako he Tohi Tapu to “moumou ai foki a lautolu kua moumou e lalolagi.”—Fakakiteaga 11:18.

To fakaoti e kolokolovao mo e nakai fakafili tonu. Mavehe mai e Kupu he Atua: “Ko lautolu ne mahani hakohako to nonofo a lautolu ke he motu; mo lautolu ne katoatoa e mitaki ha lautolu a mahani to toe ai a lautolu. Ka to  vevehe kehe mai he motu a lautolu ne mahani kelea, to taaki ai foki a lautolu ne mahani fakavai.”—Tau Fakatai 2:21, 22.

2 To Hoko Mai A Fe e Fakaotiaga?

Fitā he fakatoka e Iehova ko e Atua e “[maga]aho ia” ke fakaotioti e mahani kelea ti fakatū e fakatufono he Kautu haana. (Mareko 13:33) Ka kua fakakite fakamaaliali he Tohi Tapu kua nakai maeke ia tautolu ke fuafua e aho tonu ma e fakaotiaga. Pehē a Iesu: “Ka ko e aho ia mo e magaaho ia nakai iloa he taha tagata, nakai iloa foki he tau agelu he lagi, ka ko e haku a Matua hokoia ni.” (Mataio 24:36) Ka e talahau tuai e Iesu mo e tau tutaki haana e tau tuaga he lalolagi tuga ni fakamua to fakahoko he Atua e fakaotiaga. Kua tata lahi e fakaotiaga ka tutupu oti e tau mena nā i lalo he taha e magaaho ke he lalolagi katoa.

Tupu lahi he fakamauaga tuai e miha he tau mena fakapolitika, takatakaiaga, mo e tau tagata. He tali e hūhū he tau tutaki hagaao ke he fakaotiaga, ne pehē a Iesu: “Ko e mena laga e taha motu ke he taha motu, ko e taha kautu foki mo e taha kautu; to ha i ai e tau mafuike ke he taha mena mo e taha mena; to ha i ai foki e tau hoge mo e fakafualoto; ko e kamataaga ia he tau mena matematekelea.” (Mareko 13:8) Ne tohi he aposetolo ko Paulo: “Ko e tau aho fakamui to hohoko mai ai e tau aho uka. Ha ko e mena ke ofaofa he tau tagata a lautolu ni, to velevele koloa, to hula noa, to fakatokoluga, to vagahau kelea, to faliuliu ke he tau matua, to nakai fakaaue, to mahani kelea, To nakai fai fakaalofa to nakai fia loto mafola, to tauamuamu, to nakai taofi e tau manako he tino, to mahani favale, nakai loto ke he mitaki, To afo tagata, to mahani fakahanoa, to fakatokoluga, to manako lahi ke he tau mena ke fiafia ki ai, ka e manako tote ke he Atua.”—2 Timoteo 3:1-5.

Hane taute e matagahua fakamatala ke he lalolagi katoa he tau vagahau kehekehe. Ne pehē a Iesu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.”—Mataio 24:14.

3 Ko e Heigoa ka Mui Mai he Mole e Fakaotiaga?

Nakai fakaako he Tohi Tapu to ta atu oti e tau tagata mahani mitaki mai he lalolagi ke momoui tukulagi he lagi. Ka kua fakaako e Iesu to fakamooli e finagalo fakamua he Atua ma e tagata. “Uhoaki a lautolu ne mahani molu; ha ko e mena to eke ma lautolu e motu,” he ui e Iesu. (Mataio 5:5; 6:9, 10) Ma lautolu kua mamate ato hoko e fakaotiaga, kua talahau he Tohi Tapu e maveheaga ma e liu tu mai anoiha. (Iopu 14:14, 15; Ioane 5:28, 29) Ko e heigoa ka mui mai he mole e fakaotiaga?

To pule mai a Iesu he lagi ko e Patuiki he Kautu he Atua. “Ne kitia e au ke he tau fakakiteaga he po,” he tohi he perofeta ko Tanielu, “ti kitiala, ne haele mai mo e tau aolagi Taha kua tuga e Tama he tagata [ko Iesu ne liu fakatu mai], ne hoko foki a ia kia Ia ne mai i tuai hana tau aho [Iehova ko e Atua], ti ta mai ai e lautolu a ia ki mua hana. Ti foaki age kia ia [Iesu] e pule, mo e fakahekeaga, mo e kautu, kia fekafekau kia ia e tau motu oti, mo e tau kautu, mo e tau vagahau kehekehe; ko e hana pule ko e pule tukulagi haia, nakai mole atu ia, ko e hana kautu foki nakai fakaoti ia.”—Tanielu 7:13, 14; Luka 1:31, 32; Ioane 3:13-16.

To olioli he tau tagata he Kautu he Atua e tino malolō mitaki katoatoa, haohao mitaki tumau, mo e moui tukulagi. “To ta fale e lautolu, mo e nonofo ai a lautolu,” he tohi he perofeta ko Isaia. “Mo e kai ai e lautolu ha lautolu a tau fua. Nakai ta fale e lautolu ke nonofo ai e falu, ti nakai to uluvine e lautolu ke kai ai e falu.” (Isaia 65:21-23) Ne tohi e aposetolo ko Ioane hagaao ke he magaaho ia: “Kitiala, kua fakalataha mo e tau tagata e fale  uta fano he Atua, to nofo a ia mo lautolu; to eke a lautolu mo motu hana, to ha ia lautolu e Atua ni, ko e ha lautolu a Atua haia. To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”—Fakakiteaga 21:3, 4.

4 Ko e Heigoa Haau kua Lata ke Taute ke Hao he Fakaotiaga?

Ne talahau he aposetolo ko Peteru ko e falu ne momoui he magaaho he fakaotiaga to vaiga ke he manatu na to fakalava mai e Atua ke he tau gahua he tagata ti fakaotioti e mahani kelea he lalolagi. (2 Peteru 3:3, 4) Pete ni ia, ne tomatoma e Peteru a lautolu ne momoui he magahala ha tautolu ke taute e tau mena nā.

Fakaako mai he fakamauaga tuai. Ko e Atua ne “nakai toka foki e lalolagi tuai, ka e laveaki a Noa kua tokovalu aki, ko e ogo he tututonu, ka e ta mai e fakapuke ke he lalolagi matahavala,” he tohi e Peteru. (2 Peteru 2:5) Hagaao ki a lautolu ne vaiga, ne pehē a Peteru: “Kua loto a lautolu ke galo ia lautolu e mena nai, ha i ai e lagi i tuai, ko e lalolagi foki mai e vai ia, ko e vai foki ne eke ai e lalolagi ha ko e kupu he Atua, Ko e tau mena ia  foki ne fakaotioti ai e lalolagi a tuai he vai ne puapuā; ka ko e lagi a enei mo e fonua kua fakatoka ha ko e kupu ia ni, kia taofi ma e afi ke he aho ke fakafili ai mo e mahakava ai e tau tagata matahavala.”—2 Peteru 3:5-7.

Momoui ke he tau puhala he mahani mitaki he Atua. Ko lautolu kua manako ke hao he fakaotiaga ka taute e “mahani ke lata ai ke he tau mahani mitaki mo e tau mahani Atua,” he tohi e Peteru. (2 Peteru 3:11) Mailoga nukua peehi e Peteru e “mahani ke lata ai” mo e “tau mahani [po ke, tau gahua he] tau mahani Atua.” Ko e mena ia kua lahi atu e mena ne putoia he talahaua noa kua tua po ke eketaha he mogoia ni he lali ke fai fakafetuiaga mo e Atua.

Ko e heigoa e tau aga mo e tau gahua pauaki kua talia he Atua? He ha he fakatatai e mena haau kua iloa mo e mena ne fakaako he Tohi Tapu hagaao ke he matakupu nei? To fiafia e Tau Fakamoli a Iehova ke lagomatai a koe. Ole ki a lautolu ke fakakite atu ki a koe i loto he Tohi Tapu haau e fakavēaga ma e tau tali ha lautolu. He taute pihia ka lagomatai a koe ke fehagai fakamalolō mo e mauokafua ke he vahā anoiha, pete he tupu e tau mena fakamatakutaku kua agaagai ia tautolu mogonei.

[Matahui Tala]

[Blurb he lau 7]

To nakai moumou e lalolagi, ka ko e tau tagata ne moumou ai ka utakehe