Ko e Lata He Ha ke Fiafia ke he Tau Mana?
Ko e Lata He Ha ke Fiafia ke he Tau Mana?
“Tau mana, ko e fakamaamaaga kua moumou e tau matapatu fakaakoaga he saiene.”—RICHARD DAWKINS, POROFESA FAKAMUA MA E MAAMAAGA FAKALAULAHI HE SAIENE.
“Ko e talitonu ke he tau mana kua fakavē ke he kakano katoa. He nakai fakamā ke he tua fakalotu, ko e tau fakamailoga a ia ke he fakaalofa he Atua, mo e fakatumau e putoia he tufugatia.”—ROBERT A. LARMER, POROFESA HE PULOTU.
“TALITONU nakai a koe ke he tau mana?” He fakakite he tau talahauaga i luga, kua kehekehe e tau manatu. Ka e tali fēfē e koe e hūhū ia?
Liga fakauaua a koe ke tali, “E, talitonu au.” Liga logona hifo e koe ka tali pihia to tuga ke fakakite kua fakataulaatua po ke goagoa a koe. Tokologa kua pihia e logonaaga.
He taha faahi, liga talia e koe na tutupu mooli e tau mana. Liga talitonu a koe ke he tau mana ne fakamau he Tohi Tapu, tuga he vevehe ua e Mose e Tahi Kula. Liga talitonu foki a koe na tutupu e tau mana he magahala ha tautolu. Ne fakatoka mai he hokotakiaga ne nakaila leva ia “ko e vala lahi he puke tagata he Faahi Lalo he lalolagi—ma e fakatai kavi ke he tolu kuata a lautolu he tau Faahi Kaufakalataha mo e 38 e pasene i Peritania—ne matutaki ke talitonu ke he tau mana.” (The Cambridge Companion to Miracles, ne tohi e Graham H. Twelftree) Lafi atu, ko e taofiaga ke he tau mana kua nakai fakakaupā ni ke he tau Kerisiano. Hagaao ke he Britannica Encyclopedia of World Religions, ko e talitonu ke he tau mena tutupu fakamana “kua teitei ni ko e vala he tau lotu oti.”
Po ke liga fakalataha a koe ke he matakau ke toluaki ka tali: “Ai iloa au, ti ai popole au! Nakai tupu e tau mana he moui haaku!” Ko e ha mogoia ne manamanatu a koe ke he tau mana?
Mailoga e tuaga nei: Manamanatu kua moua a koe he gagao ne nakai fai tuluiaga. Kaeke ke totou e koe e hokotaki he senolo aoga lahi fakaekekafo hagaao ke he vai tului foou ka liga fakamaulu e gagao haau, kua mitaki nakai ke fakaaoga e koe e taha magaaho mo e malolō ke kumikumi e tau mena mooli? Pihia foki, kua mavehe mai he Tohi Tapu to nakai leva ti fai mana ofoofogia ka tupu. To lauia e tau momoui he tau mena momoui oti kana he lalolagi nei. To nakai kia aoga ke foaki taha magaaho mo e malolō haau ke kumi kua moolioli nakai e maveheaga ia?
Ka e, ato kumikumi e tautolu e tau mana ia ne mavehe mai, kia tali e tautolu tolu e totokoaga aga mau hagaao ke he tau mana.
[Puha he lau 3]
KO E HEIGOA E MANA?
Ko e mena tupu ne mua atu ke he lotomatala mo e tau malolō pauaki oti kana he tagata ti fa matutaki ai ke he falu vahega malolō kehe.
