Tau Mana kua Amanaki ke Tutupu

KAEKE ke fakatoka e ekekafo iihi ke taute e iihi halavihi ki a koe, to fēfē e logonaaga haau ka iloa e koe kua nakaila lagataha he taute e ia e iihi nei? Nakai noa to tupetupe a koe. Ka e kua kaeke kua iloa e koe, ko e ekekafo nei ko e takitaki iihi he faahi gahua haana mo e kua loga tuai e iihi haana ne taute ti ­kautū ai, tuga e iihi kua amanaki a koe ki ai? To nakai kia lahi e mauokafua haau to maeke a ia ke lagomatai a koe?

Ko e lalolagi gagao kua nonofo ai a tautolu he vahā nei kua lata mafiti ke “iihi.” Puhala he haana Kupu, ko e Tohi Tapu, kua mavehe mai e Iehova ko e Atua to liuaki mai e ia e Parataiso ke he lalolagi nei. (2 Peteru 3:13) Ka e ke tupu e mena ia, kua lata ni ke utakehe fakamua e mahani kelea, he taaki kehe katoatoa. (Salamo 37:9-11; Tau Fakatai 2:21, 22) Ko e tau tuaga mamahi oti ne kitia viko e tautolu kua lata ni ke utakehe katoatoa ato fakatū e parataiso. Kua latatonu mooli e mana ke tupu e mena ia!​—Fakakiteaga 21:4, 5.

Kua talitonu e Tau Fakamoli a Iehova to nakai leva ti tutupu e tau hikiaga lalahi mamahaki ia. Ko e ha? Ha ko e tau mana ne fitā a Iehova ko e Atua he taute kua fakamooli e malolō haana ke fakakatoatoa haana tau maveheaga. Fakatatai ono e mana ne fakamau he Tohi Tapu mo e tau maveheaga kua talahau i ai ma e vahā anoiha.

 Kia matutaki a koe ke fakaako hagaao ke he tau maveheaga he Tohi Tapu ma e ha tautolu a vahā anoiha. He tupu ki mua e tua haau, to pihia foki e amaamanakiaga haau​—ko e amaamanakiaga ke moui he magaaho ka aoga a koe mai he tau mana kua taute e Iehova.

 [Puha/​Fakatino he lau 9, 10]

MANA:

FAGAI E IESU E TOKOAFE AKI E TAU ARETO MO E TAU IKA GAHOA.​—MATAIO 14:13-21; MAREKO 8:1-9; IOANE 6:1-14.

MAVEHEAGA:

“Kua fua mai he kelekele hana tau fua; ko e Atua, ko e ha mautolu a Atua kua fakamonuina mai e ia a mautolu.”​—SALAMO 67:6.

KAKANO MA TAUTOLU:

TO NAKAI LIU FOKI TAHA KE MATEMATEKELEA HE HOGE.

MANA:

FAKAALA E IESU E TAU MATAPOULI.​—MATAIO 9:27-31; MAREKO 8:22-26.

MAVEHEAGA:

“Ti fakaala ai e tau mata he tau tagata mata pouli.”​—ISAIA 35:5.

KAKANO MA TAUTOLU:

TO LIU E TAU TAGATA MATAPOULI OTI KE KITIA.

MANA:

FAKAMAULU E IESU E TAU TAGATA KULIKULI.​—MATAIO 11:5, 6; IOANE 5:3-9.

MAVEHEAGA:

“Ti hopohopo ai e tagata kulikuli tuga ne aila.”​—ISAIA 35:6.

KAKANO MA TAUTOLU:

TO FAKAMAULU E TAU KAFOKIA OTI KANA.

MANA:

FAKAMALOLŌ E IESU E TAU GAGAO KEHEKEHE.​​—​MAREKO 1:​32-34; LUKA 4:​40.

MAVEHEAGA:

“To nakai pehe mai foki taha kua nofo ai, Kua gagao au.”​—ISAIA 33:24.

KAKANO MA TAUTOLU:

TO UTAKEHE E TAU GAGAO HOLOLOA OTI KANA. TO MITAKI KATOATOA E MALOLŌ TINO HA TAUTOLU.

MANA:

TAUTAOFI E IESU E TAU MENA TUGA E MATAGI.​—MATAIO 8:23-27; LUKA 8:22-25.

MAVEHEAGA:

“To ta fale e lautolu, mo e nonofo ai a lautolu; to to e lautolu e tau ulu vine, mo e kai ai e lautolu ha lautolu a tau fua. Nakai gahua teao a lautolu.”​—ISAIA 65:21, 23.

“To mamao mo koe e favale, ha ko e mena nakai matakutaku a koe; to mamao foki a koe mo e moumou ha ko e mena nakai fakatata mai ia kia koe.”​—ISAIA 54:14.

KAKANO MA TAUTOLU:

TO NAKAI LIU KE FAI MATEMATEKELEA TUTUPU PAUAKI.

MANA:

FAKALIU TU MAI E IESU A LAUTOLU NE ­MAMATE.​—MATAIO 9:18-26; LUKA 7:11-17.

MAVEHEAGA:

“[Ko] lautolu katoa ha he tau tukuaga, [to] o mai ai.”​—IOANE 5:28.

“Kua ta atu he tahi a lautolu kua mamate ha i ai, kua ta atu foki he mate mo e Hate a lautolu kua mamate ha i ai.”​—FAKAKITEAGA 20:13.

KAKANO MA TAUTOLU:

TO FAKALIU TU MAI E TAU FAKAHELE HA TAUTOLU NE MAMATE.