FĒFĒ e logonaaga haau ka tukupau ai ko koe ne taute e matahavala ne nakai taute e koe? Ti ka e kua ka fakatupu he mena matahavala ia e matematekelea lahi ke he falu, ti tokologa e tagata noa kua lauia ai? Mooli, kua manako a koe ke fakameā haau a higoa! Iloa nakai e koe kua fehagai a Iehova mo e paleko pihia? He vahā nei kua hepe e tokologa he tukupau e Atua ha ko e nakai fakafili tonu mo e matematekelea he lalolagi nei. Tupetupe kia a Iehova ke fakameā e higoa haana? E, tupetupe a ia! Mailoga la e talahauaga he tohi a Esekielu.​—Totou Esekielu 39:7.

“To nakai mafai foki au ke holitu ai haku a higoa tapu,” he talahau e Iehova. Magaaho ka tukupau he tau tagata a ia ma e nakai fakafili tonu, kua holitu e lautolu e higoa haana. Ke he puhala fe? I loto he Tohi Tapu, ko e “higoa” kua fa fakakite e mahani. Taha e tohi ne pehē ko e higoa he Atua kua hagaao ke he “tau mena kua iloa ki a ia​—ko e fakakiteaga ki a ia ni, fakakite ai foki e talahaua haana, ti ko e lilifu haana.” Kua putoia ke he higoa a Iehova e mahani haana. Ko e heigoa kua iloa ki a Iehova hagaao ke he nakai fakafili tonu? Kua vihiatia ai e ia! Kua fakaalofa hofihofi foki a ia ki a lautolu kua lauia noa ai. * (Esoto 22:22-24) Ka tukupau he tau tagata ko e Atua ne fakatupu e tau mena ia ne vihia­tia lahi e ia, kua takiva e lautolu e higoa haana. Kua taute e lautolu ke “fakalialia [haana] higoa.”​—Salamo 74:10.

Mailoga ai kua lagaua e fakaaoga e Iehova e talahauaga “haku a higoa tapu.” (Kupu 7) I loto he Tohi Tapu, ko e higoa ha Iehova kua matutaki lagaloga ke he tau kupu “tapu” mo e “tapuina.” Ko e kakano he kupu “tapu” ke vevehe kehe; ha ha i ai foki e kakano he tuaga meā mo e tapuina. Kua tapu e higoa ha Iehova kakano ko e Atua tapu a ia​—vevehe katoatoa mai he ha mena agahala mo e nakai meā. Maeke nakai a koe ke kitia e kakano ha lautolu ne tukupau a Iehova ma e tau mena kelea kua tuku e lautolu e ekefakakelea muitui ke he haana “higoa tapu”?

Ko e finagalo ha Iehova ke fakameā e higoa haana puhala he Kautu ko e matapatu manatu he Tohi Tapu. Ko e matapatu ia kua peehi mai he tohi a Esekielu, ne fatiaki lagaloga e manatu “to iloa ai e lautolu ko au ni ko Iehova.” (Esekielu 36:23; 37:28; 38:23; 39:7) Mailoga ai to nakai fifili he tau motu ke iloa po ke nakai iloa a Iehova. Ka e “to iloa ai.” Ke he taha puhala foki, ne finagalo a Iehova ke taute taha mena ke omoomoi e tau motu he lalolagi ke mailoga ko ia moolioli a ia ne talahau e ia ni​—ko Iehova ko e Iki Pule Katoatoa kua hukui he higoa haana e tau mena oti nukua tapu, tapuina mo e meā.

Ko e maveheaga ne fatiaki tumau “to iloa foki he tau motu kehe ko au ni ko Iehova” ko e tala mitaki ki a lautolu kua amaamanaki lahi ke he fakaotiaga he nakai fakafili tonu mo e matematekelea. To nakai leva ti fakamooli e Iehova e ­maveheaga ia mo e fakameā haana higoa mai he tau ekefakakelea oti kana. To utakehe e ia e mahani kelea mo lautolu ne fakaohooho ai ka e to fakamoui a lautolu ne mailoga mo e fakalilifu e haana higoa mo e kakano he higoa. (Tau Fakatai 18:10) Kua manako nakai a koe ke fakaako e puhala kua maeke ia koe ke fakatata atu fakalahi ki a Iehova ko e Atua tapu, ha kua “fiafia a Iehova ke he fakafiliaga [tonu]”?​—Salamo 37:9-11, 28.