Ko e mekasini hane totou e koe mogonei kua kamata ke lomi ia Iulai 1879. Ha kua hiki e tau magaaho tali mai he mogoia​​—ti pihia foki e senolo nei. (Kikite e tau ata i luga.) Kamata he fufuta nei, to mailoga e koe e falu hikiaga he fakatokaaga he Ko e Kolo Toko. Ko e heigoa e kehekehe?

He tau motu loga, ha ha i ai e tau tagata tokologa kua moua e tau vala tala he Initanete ti manako ke he puhala nei. He kiliki mafiti ki ai, kua moua e lautolu e tau vala tala aoga ne haia ni he Initanete. Loga e tau tohi, tau mekasini, mo e tau nusipepa ka totou he Initanete.

He tokaloto e puhala mitaki nei, kua liu talaga e mautolu mogonei e faahi Kupega Hila www.pr418.com, he taute ai ke futiaki mo e mukamuka lahi ke fakaaoga. Ko e tau tagata ne ahiahi ke he faahi ia ka totou e tau tohi i ai ne molea e 430 e vagahau. Ka e kamata he mahina nei, ko e tau tagata ahiahi ke he ha mautolu a faahi Kupega Hila ka totou foki e tau vala ne fifili ne hau tumau he tau mekasini ha mautolu ne lomi ka e hau ni he ha mautolu a faahi Kupega Hila. a

To ha ha i ai foki e tau vala tala ka tuku ni he Initanete, ko e fufuta ma e fonua he Ko e Kolo Toko to fakatote hifo mai he 32 e lau ke he 16 e lau ka kamata mo e fufuta nei. Kua fitā e lomi he Ko e Kolo Toko ke he 204 e vagahau. Mo e fakatokaaga kū lahi, kua liga maeke mogonei ke fakaliliu e senolo nei ke he loga foki e vagahau.

Ko e amaamanakiaga ha mautolu ko e tau hikiaga nei to maeke ke hokotia ke he tau tagata tokologa e fekau fakahao moui he Tohi Tapu. Kua eketaha a mautolu ke fakatumau ke foaki e fakaholoaga lahi he tau vala tala atihake mo e futiaki​​—ke he puhala ne lomi mo e he Initanete​—​ke aoga e tokologa he tau tagata totou ha mautolu kua fakalilifu e Tohi Tapu mo e manako ke iloa mooli e mena ne fakaako i ai.

Tau Fakailoa