Ne fanau au i Moundsville, ko e taone mamanofua he kaukau Vailele Ohio he faahi tokelau ha West Virginia i U.S.A. Ko au e tama ke uaaki he tau fanau tokofā, tolu la e tama taane, ti lavea e magaaho ahumate he kaina ha mautolu. Na gahua malolō e tau mamatua haaku, ti ko e tau tagata mahani fakamooli ne fakaalofa ke he falu. Nakai loga lahi e tupe ha mautolu, ka e moua tumau e mautolu e tau koloa kua lata. Ha ko e Tau Fakamoli a Iehova, ne taute he tau mamatua haaku e tau mena oti ke tuku i loto ha mautolu e tau matapatu fakaakoaga he Tohi Tapu he mogo ne ikiiki a mautolu.

Ka ko e mogo ne lahi hake au, ne fitā e loto haaku he tafea kehe mai he tau mena ne fakaako e au. Ne tuahā au ke he puhala moui kua takitaki he tau matapatu fakaakoaga he Tohi Tapu ko e mena fai kakano po ke makona mooli. Ne manatu au ko e atāina katoatoa ko e puhala ni a ia ke fiafia mooli. Nakai leva, ne oti e fano haaku ke he tau feleveiaaga Kerisiano. Tokoua he tau lafu haaku ne fakalataha mo au he puhala totoko pihia. Ne taute he tau mamatua ha mautolu e tau mena oti he lali a laua ke lagomatai a mautolu, ka e tiaki e mautolu e tau laliaga ha laua.

Ka e nakai mailoga e au ko e atāina pihia ne manako au ki ai to takitaki au ke he hufia he tau fakaohoohoaga. Taha e aho ne fano au ki kaina he aoga, ne mai he kapitiga e kā tapaka ki a au. Ne talia e au. Tali mai he aho ia, ne talia e au e tau matagahua hagahaga kelea loga foki. Nakai leva, ne fakaaoga hehē e au e tulaki mo e kaikava ti moui mahani feuaki. Ke he falu tau loga i mua, ne holo ki mua e fakaaoga hehē e au e tau tulaki ti fakatupa ke he loga ai. He hufia lahi mahaki au ke he tau tulaki, ne kamata au ke sela e tau tulaki ke lalago e puhala moui haaku.

He lali fakalahi au ke fakaheu e loto manamanatu haaku, kua fakamanatu tumau ai ki a au e puhala ne moui au kua hepe. Ka e, logona hifo e au e kelea ne taute e au ti nakai liutua. Pete he viko takai he tau tagata he tau fakafiafiaaga mo e tau konesete, ne fa logona hifo e au e matimati mo e fakaatukehe. He falu mogo, manatu e au ko e tau mamatua haaku kua lilifu mo e mitaki ti manamanatu ko e tafea kehe fēfē au.

Pete he nakai fai amaamanakiaga au, ne nakai tiaki he falu au. He tau 2000, ne uiina he tau mamatua haaku au ke fano ke he fonoaga faahimotu he Tau Fakamoli a Iehova. Ne fano noa ni au. Ofo lahi au, kua ō foki e lafu tokoua haaku ne tafea kehe.

He fonoaga, ne mailoga e au kua haia au he matakavi taha ne taute e konesete roko (rock) kavi ke he mataulu he tau. Ko e keheaga ne kitia e au ne aamotia e tau logonaaga hokulo haaku. He konesete, ha ha i ai e tau veve mo e tau otaota ne puke he tau ahu tapaka. Laulahi he tau tagata o atu ke he konesete ne nakai kapitiga, ti ko e tau kupu he tau leo kofe ne fakaatukehe. He fonoaga, ne viko takai au he tau tagata fiafia mooli​​—ko e tau tagata ne fakafeleveia mafanatia au, pete he nakaila kitia e au a lautolu ke he tau tau loga. Ne meā e fale, ti ko e fekau ne fakatoka mai ko e amaamanakiaga. He kitia e lauiaaga mitaki he kupu mooli he Tohi Tapu ne taute au ke manamanatu e kakano ne tiaki ai e au!​​—Isaia 48:17, 18.

He oti agataha e fonoaga, ne fifili au ke liu ke he fakapotopotoaga Kerisiano. Ne omoomoi foki e tau lafu haaku ke he mena ne lauia a laua he fonoaga, ti fifili foki ke liliu mai. Igatia a mautolu tokotolu mo e talia e fakaakoaga Tohi Tapu.

Ko e kupu tohi he Tohi Tapu ne omoomoi pauaki au ko e Iakopo 4:8, ne pehē: ‘Kia fakatata atu ke he Atua, ti fakatata mai ai a ia kia mutolu.’ Mailoga e au ka manako au ke fakatata atu ke he Atua, lata ia au ke fakameā e moui haaku. He falu hikiaga foki, ne lata au ke oti e ula tapaka mo e oti e fakaaoga hehē he tau tulaki mo e tau kava.​​—2 Korinito 7:1.

Ne mumutu e au e tau kapitiga tuai haaku mo e fakafoou a lautolu aki e tau kapitiga foou​​—mai he tau tagata tapuaki ha Iehova. Ko e motua Kerisiano ne fakaako mo au e Tohi Tapu ne mua atu e lagomatai ki a au. Ne hea telefoni tumau a ia ki a au mo e ahiahi mai ke kitia ko e fēfē au. Hoko mai ke he aho nei, ko ia taha he tau kapitiga tata lahi mahaki haaku.

He vahā tau tupu he 2001, ne fakamailoga e au e tukuleleaga haaku ke he Atua he papatiso ke he vai, pihia mo e lafu tokoua haaku. Manamanatu la ke he fiafia he tau mamatua haaku mo e tehina tote haaku ne tua fakamooli he mogo ne liu e magafaoa ha mautolu fakalataha ke he tapuakiaga ki a Iehova.

Ne fa manamanatu au kua pāpā maō lahi e tau matapatu fakaakoaga he Tohi Tapu, ka e mogonei kua onoono au ki ai ko e puipuiaga ne mua e aoga. Ne fakamalolō he Tohi Tapu au ke oti e fakaaoga mo e sela he tau tulaki ti eke mo tagata aoga he kaufakalatahaaga.

Ne moua e au e lilifu he eke mo vala he tau matakainaga he tau tagata tapuaki a Iehova he lalolagi katoa. Ko e tau tagata nei kua feofanaki mooli e taha ke he taha, ti kaufakalataha a lautolu he fekafekau ke he Atua. (Ioane 13:34, 35) Mai he tau matakainaga ia ne moua e au e fakamonuinaaga uho lahi​​—ko e hoana haaku ko Adrianne, ne ofania mo e tokiofa lahi mahaki e au. Ne tamai ki a maua tokoua e fiafia lahi mahaki ke fekafekau ke he Tufuga ha tautolu.

He nakai tutuli e puhala lotokai he moui, ne foaki noa e au au mogonei ko e fekafekau gahua mau, he fakaako e tau tagata ke he puhala ke aoga foki a lautolu mai he Kupu he Atua. Ko e gahua nei ne tamai ki a au e fiafia lahi mahaki. Maeke ia au ke pehē mogonei mo e mauokafua katoatoa kua hiki he Tohi Tapu e moui haaku. Ne moua tuai e au e atāina mooli.