Ne fanau au i Santo Domingo he Repapiliki a Tominika, ko e tama fakahiku he tau tama tokofā. Ko e tau matua haaku ko e tau tagata fakaako tokoluga ti manako ke feaki e tau tama ha laua ke he puhala fakamooli mo e mahani mitaki. Fā e tau ato fanau au, ne feleveia e tau matua haaku mo e tau misionare Mamoga. Nava ai he meā mo e mahani mitaki he tau fuata taane, ne nakai leva ti fifili e tau matua haaku ke eke e magafaoa ha mautolu mo taha he tau magafaoa fakamua he aelani ke fakalataha ke he Church of Jesus Christ of Latter-day Saints, po ke Tapu Mamoga.

He lahi hake au, ne fiafia au ke he tau feua fakafiafia he tapu mo e fakalilifu e onoonoaga he Mamoga ke he moui magafaoa mo e tau mahani mitaki. Ne matalahi au ha ko e Mamoga ti eke ai e gahua misionare mo foliaga haaku.

He 18 e tau haaku he moui, ne hiki atu e magafaoa haaku ke he tau Faahi Kaufakalataha mo e foliaga ke fakalaulahi e tau fakaakoaga tokoluga haaku. Kavi ke he taha e tau he mole, ko e Tau Fakamoli a Iehova e anitī mo e agikolo haaku, ne o mai ke ahiahi ki a mautolu i Florida. Ne uiina e laua a mautolu ke ō ke he fonoaga Tohi Tapu mo laua. Nava au ha ko e tau tagata ne takatakai ia au kua kumi e tau kupu tohi mo e fakamaumau hifo e tau manatu. Ti ole au ke he pene mo e laupepa mo e kamata ke taute pihia foki.

He mole e fonoaga ko e anitī mo e agikolo haaku ne pehē, ha kua fiafia au ke eke mo misionare to maeke a laua ke lagomatai au ke fakaako hagaao ke he Tohi Tapu. Manamanatu au kua mitaki e manatu, ha ko e magaaho ia kua lahi mahaki e iloa haaku ke he Tohi Molomona ke he Tohi Tapu.

He fakatutala Tohi Tapu ha mautolu he telefoni, ne fakamalolō tumau he anitī mo e agikolo haaku au ke fakatatai e tau taofiaga haaku mo e tau fakaakoaga he Tohi Tapu. Manako  a laua ki a au ke kitia mitaki e au e kupu mooli.

Loga e tau mena hagaao ke he tua faka-Mamoga ne talia e au, ka e nakai maama mitaki e au e puhala ne fakatatai e tau Tohiaga Tapu mo e tau manatu ia. Ne fakafano mai he anitī haaku ki a au e mekasini Awake! ia Novema 8, 1995, ne taute fakailoa he Tau Fakamoli a Iehova, putoia e tau vala tala he tua faka-Mamoga. Ofo au ha kua nakai mahani au ke he loga he tau fakaakoaga faka-Mamoga. Ne omoomoi he mena ia au ke kumikumi e Kupega Hila pauaki he Mamoga ke fakakite kua mooli e mena ne talahau he Awake! Mooli e tau mena oti ia, ti kitia fakalaulahi foki e au he fina atu ke he fale toka koloa tuai Mamoga i Utah.

Ne talitonu tumau au ko e Tohi Molomona mo e Tohi Tapu ne felagotataiaki. Ka ko e mogo ne kamata au ke totou fakamatafeiga e Tohi Tapu, ne mailoga e au e fekehekeheaki he tau fakaakoaga faka-Mamoga mo e tau talahauaga he Tohi Tapu. Ma e fakatai, ia Esekielu 18:4, pehē e Tohi Tapu kua mate e agaga, po ke solu. Ka ko e Tohi Molomona, ia Alma 42:9, ne pehē: “To nakai mate e solu.”

Lafi ke he nakai fetataiaki he tau fakaakoaga, ne lekua au he tau manatu papale fakamotu ne fakaako he tau Mamoga. Ma e fakatai, ne fakaako he tau Mamoga na haia e katene ko Etena he Jackson County, Missouri i U.S.A. Ti talahau he tau perofeta tapu he mogo ka “pule e Kautu he Atua, ko e matini he tau Faahi Kaufakalataha to fakatoka mai e pule ke lata mo e ta tatai e tonuhia.”

Manamanatu au ke he puhala he motu ne fanau au, po ke ha motu, ka felauaki mo e manatu nei. Ne tahake mai e au e matakupu nei he fakatutalaaga he taha afiafi he tutala telefoni haaku mo e tama fuata Mamoga ne fakaako mo misionare. Hūhū fakahako atu au to makai kia a ia ke tau atu ke he tau Mamoga ka felakutaki e motu haana mo e ha lautolu. Ofo au he pehē a ia ē! Ne kumikumi hifo fakalahi au ke he tau fakaakoaga he tua haaku ti fakatutala mo e tau takitaki lalahi he Tapu Mamoga. Ne tala mai ki a au ko e tau tali ke he tau hūhū haaku kua putoia e tau mena galo, ti to moua e tali ke he taha aho he maama fakahaga ai.

He nakai fiafia ke he fakamaamaaga ha lautolu, ne onoono fakalahi au ki a au mo e kakano haaku he manako mo misionare Mamoga. Ne mailoga e au kua futiaki au ke he manatu he eke mo misionare tuga ni he manako au ke lagomatai e tau tagata. Taha kakano foki ne manako au ke eke mo misionare ke fakalilifu mai he tau tagata au. Ka ke he manako he Atua, ne nakai iloa lahi e au a ia. Pete he totou lagaloga e au e Tohi Tapu he mogo fakamua, nakai fai aoga mooli ai ki a au. Nakai fai iloaaga au ke he finagalo he Atua ma e lalolagi po ke tau tagata.

He fakaako haaku ke he Tohi Tapu mo e Tau Fakamoli a Iehova, ne fakaako e au e tau mena tuga e higoa he Atua, mena ka tupu ka mate, mo e matagahua ha Iesu he fakamooli e finagalo he Atua. Fakahiku ai ne mahani au mo e tohi fulufuluola nei, ti fiafia au ke tala age ke he falu e kupu mooli ne fakaako e au. Iloa tumau e au na moui e Atua, ka e mogonei maeke ia au ke tutala ki a ia he liogi ko e Kapitiga uho haaku. Ne papatiso au ko e taha he Tau Fakamoli a Iehova ia Iulai 12, 2004, ti ono e mahina he mole ne kamata au ke gahua mau ke he fekafekauaga faka-Kerisiano.

Lima e tau ne gahua au he matapatu he lalolagi he Tau Fakamoli a Iehova i Brooklyn, New York. Ne fiafia lahi au he maeke ke lagomatai e tauteaga he tau Tohi Tapu mo e tau tohi ne fakavē ke he Tohi Tapu ne aoga ke he tau tagata tokologa he lalolagi katoa, ti matutaki au ke fiafia he lagomatai e falu ke fakaako hagaao ke he Atua.