Manatu nakai e koe e aho ne fanau e tama haau? Ne makai mooli a koe ke totō e tama mukemuke. Ka ko e tau matua tuga a Carlo mo Mia, ne fio e fiafia mo e fakaatukehe he mogo ne tala age ki a laua kua gagao po ke fai matulituli e tama ha laua.

Fai tama nakai a koe ne matulituli? Ti liga manamanatu a koe to fahia nakai a koe. Ka pihia, ua matakutaku. Ko e tau matua tuga a koe kua kautū he fehagai mo e tau lekua pihia. Fakatutala ke he tolu e paleko mahani mau ne liga fehagai mo koe mo e puhala he pulotu ne moua i loto he Tohi Tapu ka lagomatai a koe.

Tokologa e matua ne malipilipi e tau logonaaga he iloa kua gagao e tama ha laua. “Mogo ne pehē e ekekafo kua moua e tama taane ha maua ko Santiago he gagao cerebral palsy, ne nakai talitonu e au,” he ui e Juliana ko e matua fifine i Mesikō. “Ne logona hifo e  au tuga kua tō e lalolagi ki luga ia au.” Liga logona hifo pihia foki e falu tuga e matua fifine Italia ne higoa ko Villana. “Fifili au ke fai tama pete ne tau hagahaga kelea he tau fifine he atu haaku,” he ui e ia. “Mogonei, ka fehagai e tama taane haaku mo e tau lekua he Down syndrome haana, ne tokihala e logonaaga haaku.”

Ka taufetului a koe mo e tau logonaaga he fakaatukehe po ke tokihala, mailoga ko e aga pauaki a ia haau. Ko e gagao ne nakai ko e vala he fakatokaaga fakamua he Atua. (Kenese 1:27, 28) Nakai tufuga e ia e tau matua aki e maamaaga ke talia mafiti e mena ne matakehe. He kakano, liga lata a koe ke “momoko” ke he mena kua galo​​—ko e malolō tino he tama ha mua. To fai magaaho ke fahia mai he tau logonaaga haau mo e hikihiki ke he tuaga foou haau.

Ka e kua ka tukupau e koe a koe aki e matulituli he tama haau? Manatu kua nakai fai tagata ne maama katoatoa e puhala he tupu maiaga, takatakaiaga, mo e falu puhala ne lauia e malolō tino he tama. He taha faahi, liga hihiga a koe ke tukupau e hoa haau. Totoko e peehiaga ia. To mitaki ka kaufakalataha a koe mo e hoa haau mo e hagaaki ke he levekiaga he tama haau.​​—Fakamatalaaga 4:9, 10.

PUHALA: Fakaako ke he tuaga he tama haau. “Lata e pulotu ke maeke ke moua e magafaoa mitaki,” he talahau he Tohi Tapu, “ti lata e maama ke fakamalolō aki.”​​—Tau Fakatai 24:3, New Century Version.

Maeke ia koe ke fakaako fakalahi hagaao ke he tau pulotu fakaekekafo mo e tau tohi lagomatai. Maeke a koe ke fakatatai e fakaholoaga he fakaako ke he tuaga he tama haau ke he iloa mitaki he vagahau foou. He mogo fakamua, to uka ai ka e maeke a koe ke fakaako ai.

Ko Carlo mo Mia, ne fatiaki he kamataaga, ne kumi e tau vala tala mai he ekekafo ha laua mo e he fakatokatokaaga ne pulotu pauaki ke he tuaga he tama taane ha laua. “Lagomatai he mena nei a maua ke maama e tau lekua ka amanaki ki ai a maua ti pihia foki mo e tau puhala ‘aoga’ he Down syndrome,” he ui e laua. “Kitia e maua na maeke e tama taane ha maua ke moua e moui ne tuga kua mahani mau ai. Fakamafana lahi he mena nei a maua.”

Liga logona hifo e koe ko e leveki he tama gagao haau kua lahi e malolō haau ne mole. Ko Jenney, ko e matua fifine i Niu Silani, ne pehē, “Fai tau he mole he gagao spina bifida e tama taane haaku, ne fa mategūgū mo e tagi au ka lali ke taute foki e falu gahua kaina.”

Ko e taha paleko foki ne liga logona hifo e koe e vevehe kehe. Ko e tama taane ha Ben ne matematekelea mai he gagao muscular dystrophy mo e Asperger syndrome. Pehē a Ben, “Laulahi he tau tagata to nakai maama mitaki e moui ha maua.” Liga manako lahi a koe ke tutala mo e taha tagata. Ka e laulahi he tau kapitiga haau ne malolō e tau tama. Ti fakauaua a koe ke tutala mo lautolu.

PUHALA: Ole ma e lagomatai. Ti talia ka foaki mai ai. Ko Juliana ne fatiaki he mogo fakamua, ne pehē, “He falu mogo ne fuafuakelea e taane haaku mo au ke ole lagomatai.” Ka e, lafi e ia, “Fakaako e maua kua lata ke moua e lagomatai. Ka lagomatai he falu a maua, nakai logona hifo e maua e matimati lahi.” Ka foaki he kapitiga tata po ke tagata he magafaoa ke leveki e tama ha mua ke he tau magaaho fakafiafia po ke feleveiaaga Kerisiano, talia fiafia ai. “Kua fakaalofa e kapitiga ke he tau aho oti kana,” he talahau he fakatai he Tohi Tapu, “kua fanau foki e matakainaga ke lata ai mo e aho matematekelea.”​​—Tau Fakatai 17:17.

Kia leveki e malolō tino ni haau. Tuga e emepelene ne lata tumau ke utu kaeke ke fakatumau ke uta e tau tagata gagao ke he fale gagao, kua lata foki ia koe ke fakafoou e malolō haau aki e tau mena kai mitaki, faofao, mo e okioki ke maeke a koe ke matutaki ke foaki ke he tama haau e levekiaga kua lata mo ia. Ko Javier ne kulikuli e tama taane, ne pehē: “Nakai maeke e tama taane haaku ke fano e tau hui, ti logona hifo e au kua lata ia au ke lali ke kai fakamitaki. Mole ia, ko au ne uta viko a ia. Ko e tau hui haaku e tau hui haana!”

Maeke fēfē a koe ke moua e magaaho ke leveki e malolō tino haau? Falu matua ne fakafetokaki he leveki e tama ha laua. Taha matua ne okioki po ke leveki falu manako fakatino. Lata ia koe ke fakaaoga e magaaho mai he tau mena nakai aoga lahi, ti ko e paleko ke fakatumau e lagotatai. Ka ko Mayuri, ko e matua fifine i Initia, ne pehē, “Fakahiku to mahani a koe mo e fakaholoaga.”

Tutala ke he kapitiga ne falanaki a koe ki ai. Maeke foki e tau kapitiga ne nakai gagao e tau tama ke eke  mo tau tagata fanogonogo mitaki. Maeke foki a koe ke liogi ki a Iehova ko e Atua. To lagomatai mooli nakai e liogi? Ko Yazmin ne ua e tama ne gagao cystic fibrosis, ne talahau e ia, “Ha ha i ai e tau mogo ne peehi lahi mahaki ne logona hifo e au kua tuga ke looa au ke mate.” Ka e lafi e ia: “Ne liogi au ki a Iehova ma e totokaaga mo e malolō. Ti logona hifo e au kua maeke ia au ke matutaki.”​​—Salamo 145:18.

Ko e gagao he tama kua liga lauia e tau mena ne kai he magafaoa, mena ne ō ki ai e magafaoa, mo e lahi he magaaho kua fakaaoga he tau matua mo e tau tama takitaha. Ti ko e fua, ko e falu tama kua liga logona e fakaheu. Lafi ki ai, kua lavelave lahi e tau matua he leveki e tama gagao ha laua ti matematekelea e fakamauaga ha laua. “Falu magaaho ne pehē e hoana haaku ko ia ne hahamo e laulahi he kavega ti nakai manamanatu au ke he tama taane ha maua,” he ui e Lionel, ko e matua taane i Liperia. “Logona hifo e au e tote maka, ti falu mogo ne tali vale au.”

PUHALA: Ke iloa mooli he tau tama oti ha mua e fiafia ha mua ki a lautolu, fakatokatoka e tau matagahua kua fiafia a lautolu ki ai. “He falu mogo, taute e maua e tau mena uho lahi ma e tama taane uluaki ha maua,” he ui e Jenney, ne totoku fakamua, “he kai laā a mautolu he fale kai mahuiga haana.”

Ke puipui e fakamauaga haau, tutala mo e liogi mo e hoa haau. Ko Aseem, ko e matua taane i Initia ne matematekelea e tama taane he tau fakafitikia, ne pehē: “Pete ne lolelole lahi mo e okaoka e hoana haaku mo au he falu mogo, ne fakatoka e maua e magaaho ke nonofo, tutala, mo e liogi tokoua. He tau pogipogi takitaha, ato aala e tau tama ha maua, ne fai magaaho a maua tokoua ke tutala ke he kupu mai he Tohi Tapu.” Ne tutala tokoua falu hoa to momohe. Ko e tutala tokoua ni ha mua mo e liogi fakamooli ka fakamalolō e fakamauaga ha mua he tau mogo tupetupe lahi mahaki. (Tau Fakatai 15:22) Pehē taha hoa, “falu he tau mogo fiafia lahi mahaki he tau momoui ha maua ko e tau magaaho uka.”

Ne mavehe he Tohi Tapu to nakai leva ti utakehe he Atua e tau gagao mo e tau matulituli oti kana ne fakamatematekelea a lautolu ne ikiiki mo e momotua. (Fakakiteaga 21:3, 4) He aho ia, “to nakai pehe mai foki taha kua nofo ai, Kua gagao au.” b​​—Isaia 33:24.

He mogonei, maeke a koe ke kautū he eke mo matua he tama ne fai matulituli. “Ua loto lolelole ka tuga kua hepe oti e tau mena,” he ui e Carlo mo Mia, ne fatiaki fakamua. “Hagaaki ke he tau mena ofoofogia hagaao ke he tama ha mua, ha kua loga lahi ai.”