KO E liu tu mai ha Iesu ne nakai ko e mena tupu ni ke he mogo fakamua ne kua tote e kakano ma tautolu he vahā nei. Ne fakakite he aposetolo ko Paulo e aoga he tohi e ia: “Kua fakatu mai a Keriso ia lautolu kua mamate, kua uta a ia mo fua uluaki kia lautolu kua momohe. Ha ko e tagata ne hoko mai ai e mate, ti ko e tagata foki kua hoko mai ai e liu foki tutu mai a lautolu kua mamate. Ha ko e mena tuga he mamate e tau tagata oti kia Atamu, to pihia foki e fakamomoui mai oti kia Keriso.”​​—1 Korinito 15:20-22.

Ne fakaliu tu mai a Iesu ia Nisana 16, 33 V.N., ko e aho he tau ne foaki he tau Iuta e tau fua uluaki he tau fua he fonua ha lautolu ki mua ha Iehova ko e Atua he faituga i Ierusalema. He ui a Iesu ko e fua uluaki, ne hagaao a Paulo to ha ha i ai foki falu ka liuaki mai he mate.

Ko e tau kupu nai foki ha Paulo ne fakamaama e mena kua maeke e liu tu mai ha Iesu. “Ha ko e tagata ne hoko mai ai e mate,” he ui e Paulo, “ti ko e tagata foki kua hoko mai ai e liu foki tutu mai a lautolu kua mamate.” Ha kua fakatoka mai e Atamu ki a tautolu e agahala mo e nakai mitaki katoatoa, ne mamate oti a tautolu. Pete ia, he foaki e Iesu e tino mitaki katoatoa haana mo lukutoto, ne fakaatā e ia e tau tagata ke vevete kehe mai he tupaaga he agahala mo e mate puhala he liu tu mai. He fakahiku fakamitaki e manatu, ne tohi e Paulo ia Roma 6:23: “Ha ko e mate ko e palepale ia he hala; ka ko e moui tukulagi ko e mena foaki noa mai he Atua haia, ke he Iki ha tautolu ko Keriso lesu.”

Ne fakamaama e Iesu e kakano he mate mo e liu tu mai haana ma tautolu. Hagaao ki a ia, ne pehē a ia: “Kia ta hake pihia e Tama he tagata ke lata ai; Kia nakai mate taha ne tua kia ia, ka kia moua e moui tukulagi. Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.”​​—Ioane 3:14-16.

Manamanatu ke he moui tukulagi kua nakai fai mamahi, matematekelea, po ke momoko! (Fakakiteaga 21:3, 4) Ko e amaamanakiaga fiafia mooli! Taha e pulotu ne tuku e manatu ke he puhala nei: “He liga fakamanatu he tau makatumau ke he tagata e kū he moui, kua fakamooli he liu tu mai e kū he mate.” E, ko e liu tu mai ha Iesu ko e puhala he moui!