Ka fai lotu kua fakahogohogo manava a koe, to liga uka ia koe ke falanaki ke he ha lotu. Kia mafanatia na fai lotu kua maeke a koe ke mauokafua ki ai. He nofo a Iesu he lalolagi, ne fakapotopoto e ia e matakau he tau tutaki fakamooli mo e fakaako a lautolu ke momoui ke he tau tuaga he Atua. Ko e tau tutaki mooli he Keriso​—ko e tau tagata mataala kua eketaha ke moui fakatatau ke he tau tuaga faka-Kerisiano​—kua ha ha agaia. Moua e koe a lautolu i fe?

Ko Estelle ne totoku he vala tala fakamua, ne pehē: “Ko e hoko laia au ke iloa e Tohi Tapu he mogo ne kamata au ke fakaako mo e Tau Fakamoli a Iehova. Ne nakai leva ti maama e au e Ioane 8:32, ne totou: ‘To iloa foki e mutolu e mena moli, ko e mena moli foki ke toka noa ai a mutolu.’”

Ko Ray, ne totoku foki he mogo fakamua, ne pehē: “He fakaako e Tohi Tapu mo e Tau Fakamoli a Iehova, ne iloa e au ne nakai ko e Atua ne fakatupu e matematekelea he tagata. Ne loto fakaaue au ke kitia pete kua fai kakano aoga e Atua ke fakaatā e mahani kelea mogonei, kua mavehe mai foki e ia to nakai leva ti utakehe ai.”

Maaliali ai, kua uka ke totoko e fakaohoohoaga he tau mahani kelea he lalolagi nei. Ka kua maeke ai. Tokologa e tagata ne manako lagomatai ke maama e Tohi Tapu mo e fakagahua ai. Ko e kakano ia kua taute he Tau Fakamoli a Iehova e tau fakaako Tohi Tapu he kaina ne nakai fai totogi mo e tau miliona tagata he lalolagi katoa. He tau faahi tapu takitaha, tokologa kua iloa e tau mena ne fakaako mooli he Tohi Tapu. Ha ko e mena ia, kua fakatata atu a lautolu ke he Tufuga mo e feaki e tau momoui fiafia. a

Ka feleveia a koe mo e Tau Fakamoli a Iehova he mogo i mua, hūhū ki a lautolu ko e ha ne falanaki a lautolu ke he lotu ha lautolu? Kumikumi ke he tau fakaakoaga mo e tau tuaga ha lautolu. Ti fifili ma haau ni, kua fai lotu nakai ke falanaki a koe ki ai.