FAKATATA ATU KE HE ATUA
“Kitiala, Kua Fakafou Tuai e Au e Tau Mena Oti”
Manako nakai a koe ke mitaki e malolō tino mo e moui loa a koe mo e magafaoa haau? Manako nakai a koe ke moui he lalolagi ka nakai fai mamahi, matematekelea, mo e mate? Ko e lalolagi pihia, nakai ko e tau manatu fakataitai noa. Kehe ai, nakai leva ko e lalolagi tututonu foou to eke mo mena mooli, ko e finagalo haia ha Iehova ko e Atua. Mailoga e puhala kua fakamaama e fakamooliaga he finagalo haana he Fakakiteaga 21:3-5.—Totou.
“To holoholo kehe he Atua e tau hihina mata oti mai he tau mata ha lautolu.” (Fakakiteaga 21:4) Ko e tau hihina mata fe ka holoholo kehe e ia? Nakai ko e tau hihina mata he fiafia po ke tau hihina mata ne puipui e tau mata ha tautolu. Ko e maveheaga he Atua kua hagaao ke he tau hihina mata ne tupu mai ha ko e matematekelea mo e momoko. To nakai fakamōmō noa ni he Atua e tau hihina mata pihia; to holoholo kehe katoatoa e ia he utakehe e tau mena ne fakatupu e tau hihina mata pihia—ko e matematekelea mo e momoko.
“Nakai tuai fai mate.” (Fakakiteaga 21:4) Ko e heigoa foki ne fakatupu e tau hihina mata loga ka ko e fī ko e mate? To fakatokanoa e Iehova e tau tagata omaoma mai he liliaga he mate. He puhala fe? He utakehe e kakano mooli he mate: ko e hala ne moua mai ia Atamu. (Roma 5:12) To liuaki e Iehova e tau tagata omaoma ke he tuaga mitaki katoatoa he fakavē ke he poa lukutoto ha Iesu. * Ti ko e fī fakamui, ko e mate, to “fakaotioti ai.” (1 Korinito 15:26) To maeke e tau tagata tua fakamooli ke moui he puhala ne finagalo e Atua ki ai—tukulagi mo e malolō tino mitaki katoatoa.
“Nakai tuai fai matematekelea.” (Fakakiteaga 21:4) Matematekelea fe ka utakehe? Ko e tau matematekelea oti he manamanatuaga, tau logonaaga, mo e he tino ne tupu mai he hala mo e nakai mitaki katoatoa mo e kua fakamatematekelea lahi e tau momoui he totou miliona to utakehe ai.
Ko e moui ka nakai fai hihina mata, mate, mo e matematekelea to nakai leva ti fakamooli. ‘Ka e i fe?’ he liga hūhū e koe. ‘Kua liga hagaao kia e maveheaga he Atua ke he moui he lagi?’ Nakai. Ko e ha la ne nakai pihia ai. Fakamua, ko e maveheaga ia ne kamata aki e tau kupu “kua fakalataha mo e tau tagata e fale uta fano he Atua,” ti kua nonofo e tau tagata he lalolagi. (Fakakiteaga 21:3) Uaaki, ko e maveheaga ia ne fakamaama e lalolagi ka “nakai tuai fai mate”—ko e lalolagi ne haia e mate he taha magaaho ka kua fakaoti tuai. Nakai fai mate he lagi, ka kua leva lahi e haia ke he lalolagi. Mooli ai, ko e maveheaga he Atua ke he moui mitaki to fakamooli ai ke he lalolagi.
To fakamōmō he Atua e tau hihina mata oti kana ne tafe ha ko e matematekelea mo e momoko
Manako a Iehova ke talitonu e tautolu e maveheaga haana ma e lalolagi tututonu foou. He mole e fakamaama he tau monuina ka hoko mai, kua peehi e ia to mooli e maveheaga haana he talahau: “Kitiala, kua fakafou tuai e au e tau mena oti.” Ti lafi e ia: “Ko e tau kupu nai kua moli mo e fakamoli ia.” (Fakakiteaga 21:5) Ko e ha he nakai fakaako fakalahi atu ai ke he puhala kua maeke a koe mo e tau fakahele haau ke fakalataha mo e tau tagata tapuaki fiafia ka kitia e lilifu he maveheaga he Atua kua fakamooli?
Totou Tohi Tapu ne Fakatoka
1 Peteru 1-5; 2 Peteru 1-3; 1 Ioane 1-5; 2 Ioane 1-13; 3 Ioane 1-14; Iuta 1-25–Fakakiteaga 1-22
^ para. 3 Ke iloa atu foki e poa lukutoto he Keriso, kikite e veveheaga 5 he tohi Ko e Heigoa ne Fakaako Moli he Tohi Tapu? ne taute fakailoa he Tau Fakamoli a Iehova.
