Ko e mate ko e matakupu nakai mafanatia. Tokologa e tagata ne nakai manako ke tutala ki ai. Ka e nakai noa to lauia ai a tautolu. Ti ko e huki he mate ko e mena matila mo e mamahi lahi.

Nakai fai mena ke mautali katoatoa a tautolu ki ai ka mate e matua, hoa, po ke tama. Liga tupu fakaofo e matematekelea po kua leva e lauia ai. Ko e heigoa ni, ko e mamahi he mate kua nakai maeke ke kalo kehe mai ai, ti ko e fakaotiaga kua momoko lahi mahaki.

Ko Antonio, ne mate e matua taane he pakia he motokā, ne fakamaama: “Kua tuga na fai tagata ne puipui e fale haau ti uta e tau kī. Nakai maeke a koe ke liu ki kaina, pete he magaaho kū ni. Ko e tau mena ni ne ha ha mo koe ko e tau mena haau ne manatu. Ko e tuaga foou anei. Pete he lali a koe ke fakatikai ai​—he tuga kua nakai lagotatai​—kua nakai maeke a koe ke taute ha mena.”

He fehagai mo e mate pihia, ne takape a Dorothy he 47 e tau he moui, ti lali fakalahi a ia ke moua e falu tali. Ha ko ia ko e faiaoga Aho Tapu, ne nakai manatu a ia na fakaoti he mate. Ka kua nakai fai tali mahino a ia. “Ko e heigoa ka tupu ki a tautolu ka mamate?” he hūhū e ia ke he akoako Anglican haana. “Nakai fai tagata ne iloa mooli,” he tali e ia. “Lata ni a tautolu ke fakatali to kitia.”

Kua talia noa kia a tautolu ke “fakatali to kitia”? Fai puhala foki nakai kua maeke ia tautolu ke iloa moolioli kua fakaoti ai ka mate?