Tau Hūhū Tohi Tapu kua Tali
Na fēfē e Atua?
Ko e mena moui fakaagaaga e Atua ti nakai kitia. Ne tufuga e ia e lagi, lalolagi, mo e tau mena momoui oti kana. Nakai fai tagata ne tufuga e Atua—ti nakai fai kamataaga a ia. (Salamo 90:2) Manako e Atua ke he tau tagata ke kumi a ia mo e ke iloa e tala mooli hagaao ki a ia.—Totou Gahua 17:24-27.
Maeke ia tautolu ke iloa e higoa he Atua. Maeke foki ia tautolu ke iloa e falu aga haana he manamanatu ke he tau mena ne tufugatia e ia. (Roma 1:20) Ka e ke iloa mitaki e Atua, kua lata ia tautolu ke fakaako haana Kupu ko e Tohi Tapu. Kua lagomatai a tautolu ke iloa e tau aga fakaalofa he Atua.—Totou Salamo 103:7-10.
Fēfē e logonaaga he Atua ke he nakai fakafili tonu?
Ne vihiatia he Tufuga ha tautolu ko Iehova e nakai fakafili tonu. Ti tufugatia e ia e tau tagata ke he haana fakatai. (Teutaronome 25:16) Kakano haia ti vihiatia he tokologa ia tautolu e nakai fakafili tonu. Ko e tau nakai fakafili tonu ne viko takai ia tautolu kua nakai taute he Atua. Na foaki age he Atua ke he tagata e atāina ke fifili. Momoko ai, tokologa e tagata ne fakaaoga fakahehē e atāina ha lautolu ke fifili ti taute e nakai fakafili tonu. Kua ‘mamahi e finagalo’ ha Iehova.—Totou Kenese 6:5, 6; Teutaronome 32:4, 5.
Fiafia a Iehova ke he fakafili tonu, ti nakai toka leva e ia e nakai fakafili tonu. (Salamo 37:28, 29) Mavehe e Tohi Tapu to nakai leva ti fakaotioti he Atua e nakai fakafili tonu.—Totou 2 Peteru 3:7-9, 13.
Mavehe he Tohi Tapu to nakai leva ti tamai he Atua e fakafili tonu ma e tau tagata oti