“MAEKE au ke totoko e tau mena oti ka e nakai ko e kamatamata.” Ko e tala vaiga nei kua fakamaama e onoonoaga he falu ke he kamatamata​​—⁠hokulo hifo, kua fiafia a lautolu ki ai. Ka e onoono falu ke he kamatamata ko e matafī tumau ne loto lahi a lautolu ke kautū ki ai. Fēfē e manatu haau? Ka fehagai mo e kamatamata, lata kia a koe ke mui ki ai po ke totoko?

Mooli, nakai takitaki atu oti e tau kamatamata ke he tau lekua lalahi. Ma e fakatai, ko e kai fufū he taha paka keke foki to nakai kelea muitui ke he moui haau. Ka ko e kaumahala ke he falu kamatamata​​—⁠mua atu ka takitaki atu ke he mahani feuaki⁠​—​ka tamai e tau fua matematekelea lahi. Kua hataki he Tohi Tapu: “Ko ia kua faivao . . . kua noa a ia mo e manamanatu; ko ia kua eke e mena ia, kua fakaoti ai e ia hana moui.”​​—⁠Tau Fakatai 6:32, 33.

Ka fakataupā mo e kamatamata ke mahani feuaki, to fēfē e tali haau? Tali he Tohi Tapu: “Ko e finagalo foki he Atua hanai, kia fakatapu a mutolu, kia fakamamao a mutolu mo e feuaki; Kia takitokotaha a mutolu mo e iloa ke moua e ia ni hana [tino] mo e fakatapu mo e lilifu.” (1 Tesalonia 4:3, 4) Feaki fēfē e koe e malolō ia ke fifili? Manamanatu ke he tolu e puhala ka lagomatai.

Ka onoono a tautolu ke he tau fakatino feuaki to fakalagalaga ni e tau manako feuaki. Ke fakamooli e matutakiaga he kitia mo e manako, ne hataki e Iesu: “Ka kikite atu taha ke he fifine kia manako ki ai, kua faivao tuai a ia ke he hana loto.” He fakaaoga e fakatai malolō fakalaulahi, peehi e ia: “Kaeke foki ke tupetupe a koe he hau a mata matau, ati kape kehe a, mo e tiaki e koe.” (Mataio 5:28, 29) Ko e manatu? Ke totoko e kamatamata, kua lata ia tautolu ke fakamafiti ke nakai fagai e tau mata ha tautolu ke he tau fakatino fakaohooho feuaki.

 Ke fakatai: Manamanatu la ke he mogo ka kitia e koe e kikila he pili hila. To onoono fakatonutonu tumau kia a koe ki ai? Nakai pihia! To haga kehe a koe po ke uufi e tau mata haau neke pouli. Pihia foki, ka kitia e koe e tau fakatino telefua​​—⁠he tau pepa, he televisoni, po ke tino​​—⁠fakamafiti ke ono kehe. Puipui e loto haau neke pikitia. Ko Juan, ne hufia a ia ke he tau fakatino telefua he mogo fakamua, ne pehē: “Ka kitia e au e fifine fulufuluola, ne fia liu au ke ono lagaua mo e lagatolu foki ki a ia. Ti eketaha katoatoa au ke ono kehe, mo e pehē hifo ki a au ni: ‘Liogi ki a Iehova! Kua latatonu ni a koe ke liogi mogonei!’ He oti e liogi haaku, nakai leva ti galo e manako ia.”​​—⁠Mataio 6:9, 13; 1 Korinito 10:13.

Manamanatu foki ke he tagata tua fakamooli ko Iopu, ne pehē: “Ne eke e au e maveheaga mo e tau mata haku, ko e heigoa foki e mena ke manatu ai au ke he tamafine tote?” (Iopu 31:1) Ko e ha ne nakai fifili pihia foki?

Lali pehē: Ka kitia e koe e tau fakatino feuaki, fakamafiti ke ono kehe. Fifitaki e tagata tohia Tohi Tapu ne liogi: “Kia fakamafoki kehe e koe hoku mata neke kitekite ke he tau mena nakai aoga.”​​—⁠Salamo 119:37.

Ha kua nakai mitaki katoatoa a tautolu oti, kua taufetului a tautolu he falu mogo mo e tau manako kelea. Pehē e Tohi Tapu: “Ka e takitokotaha mo e kamatamata a ia ka toho mo e hele a ia he hana tau manako lahi; Ka fatu e manako lahi ti fanau mai ai e ia, ko e hala.” (Iakopo 1:14, 15) Kalo fēfē a koe neke apitia he tuaga kelea ia?

Ka logona e koe e tau manako kelea, manatu na maeke ia koe ke fifili e puhala ke fehagai ki ai. Totoko fakamalolō e tau manako ia. Huo kehe mai he manamanatuaga haau. Ua takele he tau manako feuaki nakai mooli. Ko e tagata taane ko Troy, ne hufia he tau fakatino telefua he Initanete, ne pehē: “Ne tau eketaha au ke utakehe e tau manatu kelea he manamanatuaga haaku he hagaaki ke he tau manatu mitaki. Nakai mukamuka. Lagaloga e kaumahala haaku. Ka e fakahiku ne iloa e au ke tautaofi e manamanatuaga haaku.” Ko e fifine ko Elsa, ne taufetului mo e kamatamata feuaki he mogo ne  fuata mui, ne liu manatu, “He lavelave tumau mo e liogi ki a Iehova, ne maeke au ke tautaofi e tau manatu hepe.”

Lali pehē: Ka matematekelea a koe he tau manatu feuaki, fakamafiti ke liogi he mogoia ni. Totoko e tau manatu kelea he fakapuke e manamanatuaga haau aki e “tau mena oti kua moli, ko e tau mena oti kua gali, ko e tau mena oti kua tonu, ko e tau mena oti kua mea, ko e tau mena oti kua fulu­fuluola, ko e tau mena oti kua talahaua mitaki.”​​—⁠Filipi 4:8.

Ka lafi e manako, kamatamata, mo e tuaga, to mukamuka e lekua ke tupu mai. (Tau Fakatai 7:6-23) Kalo fēfē a koe neke kaumahala he kamatamata?

Kua fakatonu fakailoilo mai he Tohi Tapu: “Kua kitia he tagata lotomatala e kelea, mo e fakamumuli ai a ia; ka ko e tau tagata goagoa, kua o age ai a lautolu, ti fakahala ai a lautolu.” (Tau Fakatai 22:3) Ti puipui e tau lakaaga haau. Manamanatu tuai ke he tau tuaga ka liga fakalagā e tau lekua, ti kalo mai i ai. (Tau Fakatai 7:25) Ko e tagata taane ko Filipe ne kautū ke he hufia haana ke he tau fakatino telefua, ne pehē: “Ne toka e au e komopiuta he magafaoa he mena ke kitia he tau tagata oti mo e tuku e tau polokalama ke puipui e Initanete. Ti fano ni au ke he Initanete ka fai tagata he fale.” Pihia foki a Troy ne totoku he kamataaga, pehē a ia: “Ne kalo au he kitekite ke he tau kifaga fakataki ti nakai lafi mo e tau tagata ne tala kiva hagaao ke he mahani fakataane mo e fifine. Nakai manako au ke tuku au he tuaga hagahaga kelea.”

Lali pehē: Kia onoono fakamooli ke he tau lolelole haau, ti fakatokatoka tuai ke kalo mai he tau tuaga ka fakatapakupaku a koe ke he kamatamata.​​—⁠Mataio 6:13.

Ka e kua ka eketaha a koe ka e lolelole agaia ni mo e mahala ke he kamatamata? Ua loto lolelole mo e fiu. Pehē e Tohi Tapu: “Ha ko e lagafitu he veli e tagata tututonu, ka e liu tu a ia.” (Tau Fakatai 24:16) Ē, kua fakamalolō he ha tautolu a Matua he lagi a tautolu ke “liu tu.” To talia nakai e koe e lagomatai fakaalofa haana? Ti ua mategūgū he fuluhi atu ki a ia ke he liogi. Atihake e tua haau he fakaako haana Kupu. Fakamalolō e mauokafua haau he fina atu he tau feleveiaaga Kerisiano. Tokaloto e maveheaga he Atua: “Kua fakamalolo e au a koe; ko e moli, kua lagomatai au kia koe.”​​—⁠Isaia 41:10.

Ko Cody, ne totoku he kamataaga ne pehē: “Eketaha fakamakamaka au ke tiaki e tau aga onoono fakatino telefua haaku. Lagaloga e kaumahala haaku, ka ko e lagomatai he Atua ati kautū au.” Ko Dylan, ne totoku foki he kamataaga, ne pehē: “Na mukamuka au ke mahani feuaki mo e kapitiga gahua haaku. Ka e mauokafua au ti tala age ki a ia ‘Nakai!’ Ko e mitaki ha ia ke meā e loto manamanatu. Mua atu, iloa e au kua fakamatalahi e au a Iehova.”

Ka tumauokafua a koe mo e totoko e kamatamata, to iloa e koe kua matalahi foki e Atua ha ko koe!​​—⁠Tau Fakatai 27:11.