Ko Naoko ne totoku he vala tala he kamataaga, ne talahau ke he kautū haana mai he ula tapaka, “Maeke au ke hiki e moui haaku ha ko e fakaako e kupu mooli ke he tau mahani mo e finagalo he Atua.” Ko e tau mena ne fakaako e ia mai he Tohi Tapu. Pete he nakai totoku e tapaka i loto he Tohi Tapu, ne lagomatai a tautolu ke maama e onoonoaga he Atua ke he ula tapaka. * Ma e tokologa, ko e iloilo ia ne foaki e malolō kua lata ma lautolu ke totoko mo e oti e ula. (2 Timoteo 3:16, 17) Fakatutala la tautolu ke he tolu e lauiaaga hagahaga kelea talahaua he ula mo e kitia e talahauaga he Tohi Tapu hagaao ke he tau mena ia.

Ha ha i loto he tapaka e taha he tau tulaki ne hufia lahi mahaki, ko e nikotini. Kua eke ai mo mena ke fakaohooho ti pihia mo e fakaatukehe. Ta atu mafiti mo e fakatumau he ula e nikotini ke he uho niu. Ko e tau kukuo takitaha he tapaka kua ta atu e nikotini ke he tino, ko e evalesi he kukuo he taha e pēkete tapaka kua kavi ke he 200 e ula he aho, kua loga lahi e tau magaaho ia ka fakatatai ke he falu tulaki. Ko e kukuo lagaloga nei he nikotini kua taute ai ke hufia lahi mahaki. Ka hufia ai, to fakaatukehe e tagata ula tapaka ka nakai fakamakona e manako ia haana ke he nikotini.

Lagomatai he Tohi Tapu a tautolu ke moua e onoonoaga hako ke he mena nei he pehē ai: “Nakai kia iloa e mutolu, ko ia kua tuku atu ki ai e mutolu a mutolu ko e tau fekafekau ke omaoma ki ai, ko e hana tau fekafekau a mutolu kua omaoma a mutolu ki ai?” (Roma 6:16) Ka matapatu e manamanatuaga mo e tau gahua he tagata ke he manako lahi ke he tapaka, to nakai leva ti eke a ia mo fekafekau ke he gahua kelea ia. Pete ia, ko e Atua ne higoa ko Iehova, kua manako ke atāina a tautolu, nakai ni mai he tau gahua ke fakamatemate kelea e tau tino ha tautolu ka e pihia foki mo e tau gahua kua fakakelea e aga ha tautolu, ko e manamanatuaga malolō ha tautolu. (Salamo 83:18; 2 Korinito 7:1) Ko e mena ia, he lahi fakahaga e loto fakaaue mo e fakalilifu he tagata ki a Iehova, to mailoga e ia kua lata a ia ke tuku atu ki a Iehova e tau mena mitaki oti haana mo e kua nakai maeke a ia ke age katoatoa ki a Iehova ka e fekafekau agaia ke he aga kelea nei. Ko e mailoga e mena ia kua lagomatai e tagata ke totoko e tau manako fakamamahi.

Ko Olaf ne nofo i Sihamani, ne fakaoti e hufiaaga kelea haana ke he tapaka ne 16 e tau, kamata ai he mogo ne 12 ai e tau. “Ko e ka tapaka fakamua kua tuga e tau valavala sinō nakai hagahaga kelea,” he ui e ia. “Ka e he loga e tau kua mole ne hokotia atu ai ke he mena makimaki. Taha e mogo ne oti e tapaka haaku, ne hogohogo manava lahi au ti oko mai oti e au e tau potu tapaka he tokaaga efuefu tapaka, kapekape mai e tapaka, ti viko he lau nusipepa. He manamanatu ki ai, maeke au ke kitia ko e mena fakamā lahi mooli.”  Fakamamutu fēfē e ia e aga kelea he ula? “Ko e mena lahi mahaki ko e manako ke fakafiafia a Iehova,” he ui e ia. “Ko e fakaalofa ha Iehova ke he tau tagata mo e amaamanakiaga ne foaki e ia kua moua e au e malolō ke fakamamutu katoatoa e ula.”

“Ko e ula tapaka . . . ne fakakite fakasaiene kua teitei fakakelea ke he tau vala oti he tino mo e malikiti e gagao mo e mate,” he talahau he The Tobacco Atlas. Ne iloa lahi ai ko e ula tapaka kua nakai moua e tau gagao pikitia tuga e kenesā, gagao ate, mo e kelea e tau māmā. Ka e hagaao ke he World Health Organization (WHO), kua mua hake e numera ne mamate ha ko e ula tapaka ke he mamate he tau gagao pikitia tuga e māmā pala.

Puhala he haana Kupu ko e Tohi Tapu, kua fakaako e Iehova ko e Atua a tautolu ke hako e onoonoaga ke he moui, tau tino, mo e tau manamanatuaga ha tautolu. Ko e haana Tama ko Iesu ne fakakite e manatu nei he pehē: “Ti pehe atu a Iesu kia ia, Kia fakaalofa a koe ke he Iki hau a Atua mo e hau a loto katoa, mo e hau a agaga katoa, mo e hau a manatu katoa.” (Mataio 22:37) Maaliali ai, kua manako e Atua ki a tautolu ke fakaaoga fakamitaki mo e fakalilifu e tau momoui mo e tau tino ha tautolu. He fakaako a tautolu hagaao ki a Iehova mo e tau maveheaga haana, kua ofania mo e uho ki a tautolu e tau mena oti haana ne taute ma tautolu. Kua omoomoi he mena nei a tautolu ke atāina mai he ha mena kua fakakelea aki e tau tino ha tautolu.

Ko Jayavanth, ko e ekekafo i Initia, ne 38 e tau ne ula ai. Pehē a ia: “Ne iloa e au mai he tau senolo fakaekekafo e hagahaga kelea he ula tapaka. Iloa e au na hepe ai, ti fekau e au e tau tagata gagao ne o mai ki a au ke oti e ula. Ka e nakai maeke ia au ke oti e ula, pete he laga lima po ke laga ono e lali.” Ko e heigoa ne lagomatai a ia ke fakaoti e ula? Talahau e ia: “Ne oti e ula haaku ha ko e fakaako e Tohi Tapu. Ko e manako ke fakafiafia a Iehova ne omoomoi au ke oti e puhala kelea ia he mogoia ni.”

Ko e fafagu hake he tau ahua tapaka kua kona. Ko e fafagu hake he tau tagata ne nakai ula ka maeke ke moua he kenesā mo e falu gagao ti 600,000 e tau tagata nakai ula tapaka ne mamate he tau tau takitaha  ne laulahi ke he tau fifine mo e tau fanau. Ko e hokotaki he WHO ne hataki: “Nakai fai tuaga haohao mitaki e tau ahua tapaka ke he tau tagata ne nakai ula.”

Hagaao ki a Iesu, ko e fakaalofa ke he katofia​—ha tautolu a tau magafaoa, tau kapitiga, mo e falu ne takatakai viko ia tautolu​—ko e mena ke uaaki a ia ke he fakaalofa ke he Atua. “Kia fakaalofa atu a koe kia ia ne katofia a mua, kia tuga foki na koe kia koe,” he ui e ia. (Mataio 22:39) Ka tutuli e tautolu e aga ne fakamamahi e falu ne tata ki a tautolu, kua nakai fakakite e tautolu e fakaalofa fakamatakainaga. Ko e fakaalofa mooli ka omoomoi a tautolu ke muitua e tomatoma he Tohi Tapu: “Aua neke kumi e taha e mitaki hana ni, ka kia takitokotaha mo e kumi e mitaki he falu.”​—1 Korinito 10:24.

Ko Armen ne nofo i Armenia, ne liu manatu: “Ha kua lauia a lautolu i ai, ne olelalo e magafaoa haaku ki a au ke oti e ula. Ka e nakai manako au ke talahau na maeke ai ke lauia kelea a lautolu.” Fakamaama e ia e mena ne hiki e onoonoaga haana: “Ko e iloa haaku ke he Tohi Tapu mo e fakaalofa ki a Iehova ne lagomatai au ke oti e ula tapaka mo e talahau kua hagahaga kelea ai ki a au mo lautolu ne agaagai ia au.”

Ko e iloa e Tohi Tapu ne lagomatai a Olaf, Jayavanth, mo Armen ke fakamamutu he aga kelea ia ne fakamamahi a lautolu mo e falu. Ne kautū a lautolu he nakai ha ko e iloa hokoia na kelea e ula tapaka ka ko e ha lautolu a fakaalofa ki a Iehova mo e manako ke fakafiafia a ia. Ko e matagahua he fakaalofa ne peehi he 1 Ioane 5:3, kua pehē: “Ko e fakaalofa ke he Atua hanai, kia omaoma a tautolu ke he tau poaki hana; nakai mamafa foki hana tau poaki.” Mooli, ko e muitua ke he tau matapatu fakaakoaga he Tohi Tapu kua nakai mukamuka tumau, ka e ka omoomoi e tagata ha ko e fakaalofa lahi ke he Atua, to nakai mamafa e omaoma.

Puhala he matagahua fakaako he lalolagi katoa, kua lagomatai e Iehova ko e Atua e tau tagata totou miliona mogonei ke fakamamutu kehe mo e atāina mai he fakatupa ke he tapaka. (1 Timoteo 2:3, 4) Nakai leva to puhala he haana Kautu​—ko e fakatufono he lagi i lalo hifo he haana Tama ko Iesu Keriso​—to fakaotioti e Iehova e tau fakatokaaga pisinisi ne fakatupa e tau miliona ke he tapaka. To fakaoti katoatoa e ia e lekua he ula mo e tuku atu ke he tau tagata omaoma e tino mo e manamanatuaga mitaki katoatoa.​—Isaia 33:24; Fakakiteaga 19:11, 15.

Ka taufetului a koe ke oti e ula, ua fakalolelole. He iloa ke fakaalofa ki a Iehova mo e loto fakaaue ke he haana onoonoaga ke he ula, maeke foki ia koe ke omoomoi ke kautū. To fiafia e Tau Fakamoli a Iehova ke foaki atu e tau lagomatai ki a koe ke iloa mo e fakagahua e tau matapatu fakaakoaga he Tohi Tapu. Kia mafanatia ka manako a koe ke lagomatai e Iehova ke atāina mai he hufia lahi ke he tapaka, to foaki atu e ia ki a koe e malolō kua lata mo koe.​—2 Korinito 4:7.