KAEKE ko e matua a koe, maama nakai ia koe e tau logonaaga ne fakakite he tau talahauaga he kamataaga? Ka feleveia a koe mo e tau tuaga pihia, manamanatu nakai a koe ko e puhala fe po ke lata nakai ia koe ke akonaki e tama haau? Hepe kia ke akonaki e tau tama haau?

I loto he Tohi Tapu, ko e kupu ma e “tau kupu fakaako” po ke akonaki, kua nakai ko e taha kupu ma e fakahala. Ko e akonaki kua matutaki lahi ke he fakailoilo, fakaako, mo e fakahako. Nakai matutaki ai ke he ekefakakelea po ke favale.​—Tau Fakatai 4:1, 2.

Liga maeke e akonakiaga fakamatua ke tuga e gahua katene. Ne kelikeli he tagata gahua katene e kelekele, fakamalū mo e fagai e akau, ti puipui mai he tau moko mo e tau pupu. He tupu hake e akau, liga lata e tagata gahua katene ke hele e tau lālā he akau ke lagomatai ai ke tupu hako. Ne mailoga he tagata gahua katene kua lata a ia ke fakaaoga e tau puhala kehekehe ke lagomatai a ia ke taute e akau ke tupu olaola. Pihia foki, kua loga e puhala ne leveki he tau matua e tau fanau ha lautolu. Ka e he falu magaaho kua lata ia lautolu ke foaki e akonakiaga​—tuga e helehele he tau lālā akau, ke liga fakahako e tau manatu hepe he kamata laia, ke lagomatai e tau fanau ha lautolu ke tutupu hake fakahako. Ka e lata e akau ke helehele fakaeneene neke lauia kelea e moui he akau. Ti lata foki e akonakiaga fakamatua ke foaki mo e levekiaga fakaalofa.

Ko e Atua he Tohi Tapu, ko Iehova, ne fakatoka e fakafifitakiaga mitaki lahi ma e tau matua he tuaga nei. Ko e akonakiaga ne foaki e ia ke he tau tagata tapuaki haana ne omaoma he lalolagi, kua lauia mitaki lahi mo e manako ki ai ti ko lautolu ia kua “fiafia ke he fakaakoaga” po ke akonakiaga. (Tau Fakatai 12:1) Ko lautolu ia kua “taofi . . . ke mau e tau kupu ne fakaako atu” mo e “aua neke tiaki.” (Tau Fakatai 4:13) Maeke ia koe ke lagomatai e tama haau ke talia e akonakiaga  he muitua fakatata ke he tolu e puhala akonaki he Atua: Ko e (1) fakaalofa, (2) fakalatalata, mo e (3) fakatumau.

Ko e fakaalofa e fakavēaga mo e omoomoiaga he akonakiaga he Atua. Pehē e Tohi Tapu: “Ko ia kua ofania e Iehova, kua akonaki e ia a ia; tuga he akonaki he matua tane e tama tane kua fiafia ki ai a ia.” (Tau Fakatai 3:12) Lafi ki ai, ko Iehova kua “fakaalofa hofihofi, mo e fakaalofa noa; kua fakatuai hana ita.” (Esoto 34:6) Ko e kakano nei ati nakai fakaai a Iehova ke ekefakakelea atu po ke favale. Ti nakai vagahau vale a ia, tuhituhi tumau, po ke vaiga fakahukia, ko e tau mena oti ia kua maeke ke fakamamahi “tuga ne tuina ai . . . he pelu.”​—Tau Fakatai 12:18.

Ka kua nakai maeke he tau matua ke mumuitua katoatoa ke he fakafifitakiaga mitaki katoatoa he manako fakalatalata he Atua. Falu magaaho to uka lahi a koe ke fakauka, ka e mua atu he tau magaaho vihi lahi mahaki, manatu tumau ko e fakahala ha ko e ita kua fa mamahi, molea lahi, mo e nakai fai fua mitaki. Lafi ki ai, ka fakahala ha ko e ita po ke hogohogomanava ne nakai ko e akonakiaga a ia. Ko e nakai maeke a ia ke fakalatalata.

Ka e he taha faahi, ka akonaki e koe mo e fakaalofa mo e fakalatalata, to liga moua e koe e tau fua mitaki. Manamanatu la ke he puhala ha George mo Nicole, ko e tau matua ne totoku he kamataaga, ne fehagai ke he tau mena ne tutupu.

“He hoko mai a Jordan, kua ita lahi mahaki au mo e hoana haaku, ka kua mahani fakalatalata a maua he fanogonogo ke he fakamaamaaga haana. Ha kua mule lahi mahaki, ne fifili a maua ke fakatutala ki ai he mogo pogipogi. Ne liogi auloa a mautolu ti ō ke momohe. He aho hake, kua maeke ia maua ke tutala fakatotoka ke he mena ne tupu ti hokotia ke he loto he tama taane ha maua. Ne makai a ia ke omaoma ke he tau fakakaupāaga ha maua mo e talia e fua he mahani haana. Fakaaue ai, ne mailoga e maua ko e tali mafiti ka hogohogomanava e tau tagata to nakai moua ha fua mitaki. Kaeke ko e lakaaga fakamua ha maua ke fanogonogo, kua fa mitaki lahi e fua ka moua.”​—George.

“Ne ita lahi au he kitia e au e tama taane haaku ne fakamamahi noa ni e mahakitaga haana. He nakai taute ha mena he mogoia ni, ne fekau e au a ia ke fano ke he poko haana ha kua ita lahi au ke taute ha fifiliaga tonu. Fai magaaho he mole, he fakatotoka au, ne fakamaama age e au kua nakai mitaki e mahani vale mo e fakakite age kua fakamamahi e ia e mahakitaga haana. Kua lauia mitaki e puhala nei ki a ia. Ne fakamolemole a ia ke he mahakitaga haana ti peka atu ki ai.”​—Nicole.

 Ē, ko e akonaki fakamitaki, pete ka putoia e fakahala, kua omoomoi tumau he fakaalofa.

Ko e akonakiaga ha Iehova kua foaki tumau mo e “fakalata.” (Ieremia 30:11; 46:28) Kua manamanatu a ia ke he tau tuaga oti, putoia e tau mena ne nakai maaliali. Maeke fēfē e tau matua ke taute pihia? Ko Stephen ne totoku he kamataaga, ne fakamaama: “Pete he hukia lahi a maua mo e nakai maama e kakano ne fakamakamaka a Natalie ke fakatikai hagaao ke he mama, ne lali a maua ke manamanatu ke he tau tau moui mo e lotomatala haana.”

Ko e taane ha Nicole ko Robert, ne lali foki ke manamanatu ke he tau tuaga oti. Ka ai omaoma e tau tama, ne hūhū hifo lagaloga a ia: ‘Lagataha ni kia e tupu e mena nei po ke ko e mahani tupu tumau? Kua lolelole po ke ai malolō kia e tama? Ko e mahani nei kia ko e fakamailoga he taha lekua foki?’

Ko e tau matua ne fakalatalata kua tokaloto foki ko e tau fanau kua nakai ko e tau tagata lalahi. Ko e aposetolo Kerisiano ko Paulo ne fakamooli ke he talahauaga ia he mogo ne tohi e ia: “Ko e vaha tote au ne vagahau au poke tama tote, ne manamanatu au poke tama tote.” (1 Korinito 13:11) Pehē a Robert: “Taha e mena ne lagomatai au ke manamanatu fakamitaki mo e kalo mai he hogohogomanava ko e fakamanatu ki a au ni hagaao ke he tau mena haaku ne fa taute he mogo ne tama tote au.”

Kua aoga lahi ke mooli e tau amaamanakiaga haau, he magaaho taha, kia nakai lalago po ke tokanoa e tau puhala hepe po ke tau mahani nakai mitaki. Ka manamanatu a koe ke he tau lotomatala, kaupāaga, mo e falu tuaga he tama haau, to mauokafua a koe ko e akonakiaga haau to lagotatai mo e fakalatalata.

“Ko au ko Iehova nakai ni hiki e au haku mahani,” he talahau he Malaki 3:6. Falanaki e tau fekafekau he Atua ke he kupu mooli nei ti mauokafua he iloa ai. Lata foki e tau fanau ke mauokafua he akonakiaga fakatumau. Ka hikihiki e tau tuaga haau he fakatatau ni ke he puhala haau, to liga fakagogoa mo e hogohogomanava e tama haau.

Manatu na pehē a Iesu: “Kia pehe ha mutolu a kupu, E, e; nakai, nakai.” Kua lauia mitaki e tau kupu ia ke he feaki tama. (Mataio 5:37) Manamanatu fakamitaki ato talahau e tau poakiaga ne nakai amanaki a koe ke fakamooli. Ka hataki e koe e tama haau to akonaki a ia ka nakai mahani mitaki, ti eketaha ke taute pihia.

Ko e matutakiaga mitaki he feaki tama kua aoga lahi ma e akonakiaga fakatumau. Fakamaama e Robert: “Ka lali e tau tama ha maua ke talia e au e taha mena ne tala age he hoana haaku ki ai ke nakai taute, ka iloa ai e au, ne hiki e au e fifiliaga haaku ke lalago e hoana haaku.” Ka nakai fetaliaaki e tau matua ke he puhala ke taute aki taha tuaga, kua mitaki ni ke fakatutala a laua ke he tau fekehekeheaki ia hoko laua ni mo e ke talia tokoua ke he fifiliaga ka taute.

Ka muitua a koe ke he puhala akonaki ha Iehova ne fakaalofa, fakalatalata, mo e fakatumau, to mauokafua a koe ko e tau laliaga haau to aoga ke he tau tama haau. Ko e takitakiaga fakaalofa haau ka liga lagomatai e tau fanau haau ke tutupu hake ke eke mo tau tagata lalahi kua motua e tau loto, falanaki ki ai, mo e lagotatai. Tuga ne talahau he Tohi Tapu: “Kia fakaako a e tama ke lata mo e hana puhala; ka hoko foki ke he vaha ke motua ai a ia, nakai ni fano kehe ai a ia.”​—Tau Fakatai 22:6.