Cameron: Fiafia mooli au ma Jon ke he tau fakatutalaaga tumau ha taua ke he Tohi Tapu. * He tala fakahiku a taua, ne hūhū a koe hagaao ke he Kautu he Atua. Hūhū a koe ke he kakano ne talitonu e Tau Fakamoli a Iehova na kamata e Kautu ke pule he 1914.

Jon: Ē, taha e tohi ha mutolu ne totou e au, ti fakakite i ai na kamata e Kautu he Atua ke pule he 1914. Ti fia iloa au ha kua pehē a mutolu na fakavē e tau taofiaga oti ha mutolu ke he Tohi Tapu.

Cameron: Hako, taute pihia e mautolu.

Jon: Oti tuai e Tohi Tapu katoa he totou e au. Ka e nakai manatu e au he kitia ha kupu tohi ke he 1914. Ti fano au ke he Tohi Tapu he Initanete mo e kumi ke he “1914.” Ti mooli, nakai fai matutakiaga pihia i loto.

Cameron: Ua e mena ne nava au ia koe ma Jon. Fakamua, kua totou e koe e Tohi Tapu katoa. Liga fiafia mooli a koe ke he Kupu he Atua.

Jon: Ē mooli. Ai fai mena ke fakatatai ki ai.

Cameron: Talia foki au. Uaaki, manako au ke nava ki a koe he kumi ke he Tohi Tapu he lali ke moua e tali ke he hūhū haau. Ko e mena tonu ia ne taute e koe tuga ne fakamafana he Tohi Tapu ki a taua ke taute: ‘Kia kumi fakamakutu’ ma e maamaaga. * Mena mitaki a ia he eketaha a koe ke taute pihia.

Jon: Fakaaue. Manako mooli au ke matutaki e fakaako. Ti kumikumi foki au mo e moua falu vala tala ke he 1914 i loto he tohi nei ne fa e fakaako e taua. Talahau i ai e miti he patuiki​​—hagaao ke he akau lahi ne hio ki lalo ti liu tupu po ke taha mena pihia.

Cameron: Ē mooli. Ko e perofetaaga ia ne tohi ia Tanielu veveheaga 4. Putoia ai e miti he Patuiki ko Nepukanesa i Papelonia.

Jon: Ē, haia. Lagaloga e totou e au e perofetaaga. Ka ko e tala mooli, aila kitia ia e au e matutakiaga mo e Kautu he Atua po ke tau 1914.

Cameron: Nakai maama katoatoa foki he perofeta ko Tanielu e kakano he mena ne omoomoi a ia ke tohi, ma Jon!

Jon: Mooli?

Cameron: Ē. Ha e ia Tanielu 12:8, pehē a ia: “Ne logona foki e au, ka e nakai ni maama kia au.”

Jon: Ti nakai ko au ni ne pihia. Mitaki tuai au mogonei.

Cameron: Ko e tala mooli, ne nakai maama e Tanielu ha kua nakaila hoko e magaaho he Atua ma e tau tagata ke maama katoatoa e kakano he tau perofetaaga he tohi a Tanielu. Ka ko e  mogonei ha tautolu, maeke ia tautolu ke lahi atu e maamaaga.

Jon: Ko e ha ne tala pihia a koe?

Cameron: Mailoga e mena ka totou e taua he taha kupu foki. Pehē e Tanielu 12:9: “Kua puipui mo e fakamau fakamailoga ai e tau kupu ato hoko ke he vaha ke fakahiku ai.” Ti ko e tau perofetaaga nei to maama ni he magaaho fakamui, “ke he vaha ke fakahiku ai.” He mogo kū i mua to fakatutala ai he fakaakoaga Tohi Tapu ha taua, to fakakite he tau fakamooliaga oti ia kua nonofo a tautolu mogonei he vaha po ke magaaho ia. *

Jon: Ti maeke nakai a koe ke fakamaama e perofetaaga ha Tanielu ki a au?

Cameron: To lali au ke fakamaama.

Cameron: Ke kamata, to fakamaama fakakū atu e au e mena ne kitia he Patuiki ko Nepukanesa he miti haana. Ti tutala mogoia a taua ke he kakano he mena ia.

Jon: Haia.

Cameron: He miti, ne kitia e Nepukanesa e akau lahi mahaki ne hoko ke he lagi. Ti logona e ia e poakiaga he utafekau he Atua ke hio ki lalo e akau. Ka e pehē e Atua kia toka e tagutugutu ke he kelekele. Mole e magahala he “fitu e tau,” to liu e akau ke tupu hake. * Ne hagaao mua e perofetaaga nei ke he Patuiki ko Nepukanesa. Pete ko e patuiki talahaua a ia​​—tuga e akau ne hoko hake ke he lagi​​—ne hio hifo a ia ke “fitu e tau.” Manatu nakai e koe e mena ne tupu?

Jon: Naha, ai manatu e au.

Cameron: Ai kelea. Fakakite he Tohi Tapu ne maliu e loto ha Nepukanesa ke fitu e tau. Magaaho ia, nakai maeke a ia ke pule ko e patuiki. Ka e he matahiku he fitu e tau, ne liu a Nepukanesa matala e loto ti kamata foki ke liu patuiki. *

Jon: Haia, maama agaia e au e tala haau. Ka e matutaki fēfē e tau mena oti nei mo e Kautu he Atua mo e tau 1914?

Cameron: Ko e uho manatu, ua la e fakamooliaga he perofetaaga nai. Ko e fakamooliaga fakamua ne hoko ai he mogo ne tauhele e pule he Patuiki ko Nepukanesa. Ko e fakamooliaga ke uaaki ne tauhele e pule he Atua. Ti ko e fakamooliaga nei ke uaaki ne matutaki ke he Kautu he Atua.

Jon: Iloa fēfē e koe na fai fakamooliaga ke uaaki e perofetaaga ke he Kautu he Atua?

Cameron: Fakamua, kua fai mena ne kitia e taua he perofetaaga ia. Hagaao ke he Tanielu 4:17, ne tuku mai e perofetaaga ke “iloa ai he tau tagata momoui kua pule a ia ne Mua ue atu ke he kautu he tau tagata, kua tuku atu ai e ia kia lautolu kua finagalo ki ai a ia.” Mailoga nakai e koe e talahauaga “kautu he tau tagata”?

Jon: Ē, pehē ai “kua pule a ia ne Mua ue atu ke he kautu he tau tagata.”

Cameron: Hako. Ko hai “ne Mua ue atu” he manatu e koe?

Jon: Manatu au liga ko e tala hagaao ke he Atua.

Cameron: Tonutika. Ti talahau ai ki a taua kua nakai hagaao ni e perofetaaga nei ki a Nepukanesa. Kua putoia ai foki e “kautu he tau tagata”​​—kakano, kua pule e Atua ke he tau tagata. Ti hako e manatu ia ka onoono a taua ke he kakano he perofetaaga.

Jon: Kakano fēfē e manatu ia haau?

Cameron: Lagaloga e hagaao e tohi ha Tanielu he Tohi Tapu ke he matapatu manatu. Kua hagaaki tumau ke he fakatūaga he Kautu he Atua i lalo he pule he haana Tama ko Iesu. Ma e fakatai, liliu a taua ke he falu veveheaga i tua. Totou mai la fakamolemole e Tanielu 2:44?

Jon: Haia. Pehē ai: “Ko e vaha he tau patuiki ia to fakatu ai he Atua he lagi e kautu nakai fakaoti  tukulagi; ko e kautu foki ia nakai tuku atu ai ke he taha motu, to tuki malipilipi mo e fakaotioti e tau kautu oti ia, ka ko ia to tumau tukulagi a ia.”

Cameron: Fakaaue. Manatu nakai a koe to hagaao e kupu tohi nei ke he Kautu he Atua?

Jon: Hmm. Ai iloa au.

Cameron: Mailoga la, kua talahau ai “to tumau tukulagi” e Kautu nei. Ti mooli e mena ia ke he Kautu he Atua, ka e nakai talahau pihia e taua hagaao ke he ha fakatufono he tagata, pihia nakai?

Jon: Nakai, ai pihia.

Cameron: Ha e taha perofetaaga he tohi ha Tanielu ne hagaao ke he Kautu he Atua. Ko e perofetaaga ne fakamau ia Tanielu 7:13, 14. Hagaao ke he patuiki anoiha, pehē e perofetaaga: “Ti foaki age kia ia e pule, mo e fakahekeaga, mo e kautu, kia fekafekau kia ia e tau motu oti, mo e tau kautu, mo e tau vagahau kehekehe; ko e hana pule ko e pule tukulagi haia, nakai mole atu ia, ko e hana kautu foki nakai fakaoti ia.” Fai vala nakai he perofetaaga nei ne kua iloa e koe?

Jon: Talahau ai hagaao ke he kautu.

Cameron: Hako. Ti nakai ko e ha kautu noa ni. Mailoga ne pehē ai ko e Kautu nei to pule ke he “tau motu oti, mo e tau kautu, mo e tau vagahau kehekehe.” Kakano foki, to ha ha he Kautu nei e pule katoatoa.

Jon: Ai mailoga nukua e au ko e kakano a ia, ka e hako a koe. Talahau mai pihia.

Cameron: Mailoga foki e taha talahauaga he perofetaaga: “Ko e hana pule ko e pule tukulagi haia, nakai mole atu ia, ko e hana kautu foki nakai fakaoti ia.” Teitei ni ke tatai mo e perofetaaga ne totou laia e taua ia Tanielu 2:44, pihia nakai?

Jon: Ē, pihia.

Cameron: Liu tutala fakakū ke he tau mena ne kua fakatutala e taua. Ne tuku mai e perofetaaga ia Tanielu veveheaga 4 ke iloa he tau tagata “kua pule a ia ne Mua ue atu ke he kautu he tau tagata.” Fakakite he mena nei ko e perofetaaga kua lahi atu e fakamooliaga nakai hagaao ni ki a Nepukanesa. He tohi katoa ha Tanielu, kua moua e taua e perofetaaga hagaao ke he fakatū he Kautu he Atua i lalo he pule he Tama haana. Manatu nakai a koe kua lata mogoia ke pehē, ko e perofetaaga nei ia Tanielu veveheaga 4 kua fai matutakiaga foki mo e Kautu he Atua?

Jon: Liga pihia fakalata e au. Ka e nakaila kitia ia e au e matutakiaga ke he 1914.

Cameron: Liliu a taua ke he Patuiki ko Nepukanesa. Ko ia ne hukui he akau he fakamooliaga fakamua he perofetaaga. Ne tauhele e pule haana he mogo ne hio e akau ki lalo mo e toka ke fitu e tau​​—mogoia ne fai magaaho he maliu e loto haana. Ati fakahiku e magaaho ia he fitu e tau he mogo ne liu a Nepukanesa matala e loto haana ti matutaki e pule haana. He fakamooliaga ke uaaki he perofetaaga, to fai magaaho ka tauhele e pule he Atua​​—ka e nakai ha kua kelea e Atua.

Jon: Ko e heigoa e kakano he tala haau?

Cameron: He vahā Tohi Tapu, ne talahau ai ko e tau patuiki Isaraela ne pule i Ierusalema kua nonofo ke he “nofoaiki a Iehova.” * Ne hukui e lautolu e Atua he takitaki e tau tagata haana. Ti ko e pule he tau patuiki ia ko e fakakiteaga mooli he pule he Atua. Fai mogo he mole, laulahi he tau  patuiki ia ne nakai omaoma ke he Atua ti pihia foki e laulahi he tau tagata i lalo hifo ha lautolu. Ha ko e nakai omaoma he tau Isaraela, ne fakaatā he Atua a lautolu ke fofō he tau Papelonia he 607 F.V.N. Tali mai he mogoia, ne nakai liu ha patuiki hukui a Iehova i Ierusalema. Ati ko e kakano he mena ia, ne tauhele e pule he Atua. Maama agaia nakai e koe e tala haaku?

Jon: Ē.

Cameron: Ti ko e 607 F.V.N. ne fakamailoga e kamataaga he fitu e tau, po ke magahala ka tauhele e pule he Atua. Ka mole e fitu e tau, to fakatū he Atua e patuiki foou ke hukui a Ia​​—he mogonei, ko ia he lagi. Ko e mogo laia ka fakamooli e falu perofetaaga ne totou e taua ia Tanielu. Ti ko e hūhū aoga lahi: Magaaho fe ne fakaoti e fitu e tau? Ka tali e taua e hūhū ia, to iloa e taua e magaaho ne kamata e Kautu he Atua ke pule.

Jon: Mailoga e au. Ti fakaoti kia mogoia e fitu e tau he 1914?

Cameron: Hako tonu! Iloa tuai e koe.

Jon: Ka e iloa fēfē e taua e mena ia?

Cameron: He fekafekauaga ha Iesu he lalolagi, ne fakakite e ia kua nakaila fakakatoatoa ia e fitu e tau. * Ti liga ko e magaaho loa lahi mahaki. Ko e fitu e tau ne kamata he teau e tau tau ato hau a Iesu ke he lalolagi, ti matutaki ai ato fai magaaho he mole e liu atu a ia ke he lagi. Manatu foki, ko e kakano he tau perofetaaga ia Tanielu ne nakai maama katoatoa ato hoko “ke he vaha ke fakahiku ai.” * Ofoofogia ai, he matahiku he atu tau 1800, ne omoomoi e tau tagata fakaako Tohi Tapu fakamooli ke kumikumi fakamatafeiga ke he perofetaaga nei mo e falu perofetaaga foki. Ne kamata a lautolu ke maama ko e fitu e tau to fakaoti he tau 1914. Ti ko e tau mena tutupu lalahi he lalolagi tali mai he mogoia ne fakamooli ko e 1914 ko e tau ne kamata e Kautu he Atua ke pule he lagi. Ko e tau haia ne kamata e tau aho fakamui he lalolagi nei, po ke vahā he fakaotiaga. Iloa e au mogonei, liga loga e tau mena ke manamanatu ki ai . . .

Jon: Ē. Lata mooli au ke liu onoono ke he vala nei ke moua e maama mitaki.

Cameron: Ua tupetupe. Na fai magaaho foki au to maama e tau vala oti nei. Ka e amanaki au kua lagomatai he tutalaaga ha taua a koe ke kitia na fakavē he Tau Fakamoli a Iehova e tau taofiaga ha lautolu ke he Tohi Tapu hagaao ke he Kautu.

Jon: Ē mooli. Nava tumau au ke he puhala ne falanaki a mutolu ke he Tohi Tapu ma e tau taofiaga ha mutolu.

Cameron: Ti kitia e au kua pihia foki e manako haau. Tuga he ui e au, kua loga lahi e tau mena nei ke manamanatu ki ai he taha e mogo. Liga fai hūhū agaia foki a koe. Ma e fakatai, ne iloa e taua kua matutaki e fitu e tau ke he Kautu he Atua ti kamata ai he 607 F.V.N. Ka e iloa mooli fēfē e taua na fakaoti e fitu e tau he 1914? *

Jon: Ē, manamanatu foki au ke he mena ia.

Cameron: Kua lagomatai he Tohi Tapu a taua ke iloa e loa mooli he fitu e tau. Manako nakai a koe ke kumikumi ke he matakupu ia he taha mogo ka hau au? *

Jon: Ē, mitaki.