TAU VALA TALA I MUA | MOOLI NAKAI A SATANI?
Moui Nakai a Satani?
Ko e fakatino i Madrid, Spain, ke he agelu kelea ko Satani ne liti hifo ki lalo
“Moui hake au ko e tama taane tote i El Salvador. Ka nakai omaoma au ti pehē e matua fifine haaku, ‘Ko e Tiapolo ka hau ke uta a koe!’ Ti tali atu au, ‘Tala age ke hau!’ Na talitonu au ke he Atua, ka e nakai ko Satani.”—ROGELIO.
Talia nakai a koe ke he tala he fuata ko Rogelio? Ha e fē e tau manatu i lalo ka talia e koe?
-
Nakai mooli a Satani; ko e fakataiaga noa ni he kelea.
-
Na fai Satani, ka e fiafia tote a ia ke he tau tagata.
-
Ko Satani ko e agaaga malolō ne fakaohooho lahi e tau tagata.
Tokologa e tau tagata ne lalago e tau manatu takitaha ia, totou miliona a lautolu. Ka e aoga nakai ko e manatu fe ne hako? Ka nakai fai Satani, ko lautolu ne hagaao ki a ia kua fakahehē mooli. Ka fai Satani ka e nakai fiafia ke he tau tagata, kua tokologa mogoia ne fakaeneene po ke matakutaku noa. Pete ia, kaeke ko Satani ko e fakaohooho hehē, kua hagahaga kelea lahi mogoia a ia ke he mena kua manamanatu e falu ki ai.
O mai a tautolu ke kumikumi e puhala ka tali he Tohi Tapu e tau hūhū nei: Ko e heigoa po ko hai a Satani—ko e fakamailoga he kelea muitui po ke mena moui fakaagaaga? Kaeke ko Satani ko e mena moui fakaagaaga, kua hagahaga kelea nakai a ia ki a koe? Ka pihia, puipui fēfē e koe a koe?
