Pete ni ka putoia lahi he gahua haau e manamanatu, malolō he tino, po ke tau mena ua ia, kia mailoga kua “fai mena [aoga] kua moua ai ke he tau gahua oti.” (Tau Fakatai 14:23) Puhala fe ka aoga ai? Taha mena, ko e gahua lahi kua lagomatai a tautolu ke leveki e tau manako fakatino ha tautolu. Mooli ai, ne mavehe he Atua ke leveki a lautolu kua tapuaki fakamooli ki a ia. (Mataio 6:31, 32) Ka e amanaki foki a ia ki a tautolu ke gahua fakamakamaka mo e fakamooli ma e palepale kua lata.​—2 Tesalonia 3:10.

Ati onoono a tautolu ke he gahua ha tautolu ko e puhala ke moua e mena kua lata. Ko e gahua ko e puhala fakalilifu ke leveki e tau matagahua ha tautolu. “Ko e kautūaga mooli ke leveki e koe a koe,” he talahau e Joshua ne 25 e tau. “Ka maeke a koe ke fakatau e tau koloa kua lata mo koe, ti kua aoga e gahua kua taute e koe.”

Lafi ki ai, kua moua e tautolu e fakalilifu fakatagata he gahua lahi. Mooli ai, ko e gahua lahi kua nakai mukamuka tumau. Ka eketaha a tautolu ke taute e gahua ha tautolu​—pete kua liga mateafu po ke uka​—maeke ia tautolu ke fiafia he iloa kua fakatumau a tautolu ke gahua fakamakamaka. Ne kautū a tautolu he hihiga ke fakatevateva. (Tau Fakatai 26:14) He puhala ia, kua makona mooli e gahua. “Ne logona e au e olioli he oti e gahua lahi he aho,” he talahau e Aaron, ne totoku he vala tala fakamua. “Liga mategūgū au​—ti liga nakai kitia he falu e gahua haaku​—ka e iloa ai kua kautū au he taute e gahua haaku.”

Ne nava e Tohi Tapu ke he “tagata mafiti ke he hana tau gahua” mo e fifine “kua gahua ai hana tau lima mo e fiafia.” (Tau Fakatai 22:29; 31:13) Mooli ai, nakai eke noa e taha mo tagata mafiti he gahua. Ti gahoa ia tautolu kua nakai fiafia ke taute e gahua kua nakai lotomatala ki ai. Liga ko e kakano ia kua nakai fiafia e tokologa ke he gahua ha lautolu; kua nakai fakamakamaka a lautolu ke fakamahani ki ai.

Ka e mooli, maeke e tagata ke fiafia ke he ha gahua ka taute ai e ia mo e onoonoaga mitaki​—ka hagaaki a ia ke fakaako ke taute fakamitaki e gahua ia. “Ka gahua lahi a koe he matagahua haau ti kitia e tau fua mitaki, kua loto fiafia ai,” he talahau e William ne 24 e tau he moui. “To nakai logona pihia e koe ka lali ke fakatote e gahua haau po ke kalo ai.”

Kalo mai he matahele he manamanatu ni ke he tau tupe haau ka moua. Ka e hūhū hifo ki a koe ni e tau hūhū nei: ‘Ko e ha kua lata e gahua nei? To fēfē ka nakai taute​—po ke nakai taute fakahako ai? Aoga fēfē e falu he gahua haaku?’

Ko e hūhū fakahiku kua aoga pauaki ke manamanatu ki ai, ha kua fiafia lahi e gahua ka kitia e tautolu e puhala ka aoga ai e falu. Ne pehē a Iesu: “Kua mua e monuina [fiafia] hana ke foaki atu, ke he monuina [fiafia] hana ke talia mai.” (Gahua 20:35) He lafi ki a lautolu kua aoga he tau gahua ha tautolu​—tuga e tau tagata fakatau koloa po ke tau takitaki gahua​—kua aoga e falu mai he gahua lahi ha tautolu. Putoia ai foki e tau tagata he magafaoa ha tautolu mo lautolu kua nonofogati.

Tau tagata he magafaoa ha tautolu. Ka gahua lahi e ulu magafaoa ke leveki e tau tagata he magafaoa haana, ne ua e puhala kua aoga a ia ki a lautolu. Fakamua, kua eketaha a ia ke moua e lautolu e tau mena kua lata mo e moui​—tau mena kai, tau mena tui, mo e mena ke nonofo ai. Kua fakamooli e ia e kotofaaga haana ne age he Atua ke “leveki e taha hana faoa.” (1 Timoteo 5:8) Uaaki, ko e leveki fakamakamaka kua fakaako e aoga he gahua lahi ha ko e fakafifitakiaga haana. “Ko e matua taane haaku ko e fakafifitakiaga mitaki lahi he tagata kua aga gahua mitaki,” he ui e Shane ne totoku he vala tala fakamua. “Ko ia ko e tagata fakamooli ne gahua lahi he moui katoa haana, laulahi ai ko e tagata kamuta. Ha ko e fakafifitakiaga haana, ne fakaako e au e uho he gahua mo e tau lima, ke ta e tau koloa aoga ke fakaaoga e falu.”

Ko lautolu kua nonofogati. Ne fakatonu e aposetolo ko Paulo ke he tau Kerisiano ke “fakamalolo a [lautolu] ke gahua . . . kia moua e [lautolu] e falu a mena ke age kia ia kua nofogati.” (Efeso 4:28) Mooli ai, ka gahua lahi a tautolu ke leveki a tautolu mo e tau magafaoa ha tautolu, liga maeke foki a tautolu ke lagomatai a lautolu kua nonofogati. (Tau Fakatai 3:27) Ti ha ko e gahua lahi, kua maeke ia tautolu ke moua e fiafia he foaki atu.

Ke he haana a Lauga he Mouga, ne pehē a Iesu: “Ka fakamakamaka taha ke o a mua ke he maila taha, ati o a a mua mo ia ke he na maila ua.” (Mataio 5:41) Fakagahua fēfē e koe e matapatu fakaakoaga he tau kupu ia ke he gahua haau? Kia gahua fakalahi ke he mena kua lata, ka e nakai taute ni e mena tote. Fakatoka e tau foliaga fakatagata; eketaha a koe ke taute fakamitaki atu po ke fakamafiti atu e gahua haau. Kia fiafia ke he tau fekau ikiiki he gahua haau.

Ka gahua fakalahi atu a koe, to mua atu e fiafia haau he gahua. Ko e ha? Ha ko koe kua fifili ke taute e gahua. Kua gahua fakalahi atu a koe ha kua loto ki ai, ka e nakai ha ko e fakaohooho he taha. (File. 14) Hagaao ke he mena nei, liga manatu e tautolu e matapatu fakaakoaga ne fakamau he Tau Fakatai 12:24: “To kautu he tau lima ha lautolu ne malolo ke gahua; ka ko e tagata teva, to eke a ia mo tagata ke ta age e poa.” Mooli, to tokogahoa a tautolu ka fakatupa pauaki po ke fakaohooho ke gahua lahi. Pete ia ko e tagata kua gahua tote to liga logona hifo kua fakatupa a ia, kua līlī tumau ke fekafekau ke he he falu. Ka ko e tagata kua gahua fakalahi atu​—gahua pihia ha kua loto a ia ki ai​—kua logona hifo e mauokafua fakatagata. Kua kautū a ia he haana tau gahua.

Kua uho e gahua lahi, ka e lata ke manatu e tautolu ko e moui kua nakai ni ko e gahua. Mooli ai, na fakamafana he Tohi Tapu ke gahua malolō. (Tau Fakatai 13:4) Ka e nakai fakamafana ai ke fakatupa ke he gahua. “Kua mua he mitaki taha e puke aloalolima mo e nofo fakatekiteki, ke he na puke aloalolima ua mo e mamahi he gahua, mo e kai e matagi,” he talahau he Fakamatalaaga 4:6. Ko e heigoa e manatu? Ko e tagata kua fakatupa ke he gahua to nakai fai magaaho mo e malolō ke fiafia ke he tau fua mitaki he gahua haana. Ko e manatu, kua teao e gahua haana tuga kua “kai e matagi.”

Maeke e Tohi Tapu ke lagomatai a tautolu ke feaki e onoonoaga lagotatai ke he gahua. Pete he pehē kua lata ke gahua fakamakamaka a tautolu, kua fakatonu mai foki a ia ke “mailoga ai e mutolu e tau mena [ne mua].” (Filipi 1:10) Ko e heigoa e tau mena ne mua? Putoia ai e magaaho ma e magafaoa mo e tau kapitiga. Ka e mua he aoga ko e tau matagahua fakaagaaga, tuga e totouaga he Kupu he Atua mo e manamanatu fakahokulo ki ai.

Ko lautolu kua fakalagotatai mitaki e moui to mua e fiafia ha lautolu ke he gahua. “Taha he tau takitaki gahua haaku fakamua ko e fakafifitakiaga mitaki lahi he aga gahua lagotatai,” he ui a William, ne totoku fakamua. “Ne gahua lahi a ia, mo e fakatumau e tau fakafetuiaga mitaki mo e tau tagata ha ko e tau gahua mitaki haana. Ka e he matahiku he aho, he oti e gahua, iloa e ia ke toka e gahua haana mo e hagaaki ke he magafaoa haana mo e tapuakiaga. Ti iloa nakai a koe? Ko ia ko e taha tagata ne iloa e au kua mua atu e fiafia!”