KO E heigoa e maluaga kua lata e taane ke taute ma e hoana? Tokologa ne feaki ke talitonu, ko e matapatu foliaga he tau taane ke lagomatai e magafaoa haana ke hagahaga mitaki fakatupe. Pete ia, falu hoana ne maukoloa ne loto lolelole​—po ke matakutaku foki. Ma e fakatai, ko e fifine Sepania ko Rosa, ne talahau hagaao ke he taane haana, “Ne mahani mitaki a ia mo e tau tagata i fafo he magafaoa, ka ko e taane vale a ia he kaina.” Ne talahau a Joy mai i Nigeria, “Ka nakai talia au mo e taane haaku, ne pehē a ia, ‘Kua lata a koe ke omaoma katoatoa ki a au ha ko au ko e taane haau.’”

Maeke fēfē e taane ke taute haana matagahua ke he puhala fakaalofa? Ko e heigoa kua lata e taane ke taute ke eke e kaina haana mo maluaga, ko e “okiokihaga” ma e hoana haana?​—Ruta 1:9.

Pete kua tatai e taane mo e hoana ki mua he Atua, kua talahau he Tohi Tapu e tau matagahua pauaki he tau hoa takitaha he magafaoa. Talahau ia Roma 7:2 ko e hoana kua ha hā i lalo “he fakatufono he tane.” Tuga ni e loga he tau fakatokatokaaga ne kotofa e ulu ke leveki e tau matagahua i ai, ne kotofa he Atua e taane ke eke mo ulu he hoana. (1 Korinito 11:3) Lata e tau taane ke takitaki e tau magafaoa ha lautolu.

Ko e tau taane, lata ke fakagahua fēfē e mutolu e pule ha mutolu ne foaki atu he Atua? “Kia fakaalofa a mutolu ke he tau hoana ha mutolu,” he talahau he Tohi Tapu, “tuga e fakaalofa a Keriso ke he ekalesia.” (Efeso 5:25) E, pete ni ne nakai fai hoana a Iesu, ko e fakafifitakiaga mitaki agaia a ia ke lagomatai a koe ke eke mo taane mitaki. O mai la ke kitia.

Eketaha a Iesu ke okioki ai e falu mo e fakamāmā e kavega ha lautolu. Ne mavehe e Iesu ki a lautolu oti kua matematekelea mo e pehia he tau lekua fakatagata: “Kia o mai a mutolu kia au . . . ke okioki ai a mutolu.” (Mataio 11:28, 29) Fa fakatotoka e ia ha lautolu a tau matematekelea he tino mo e foaki e lagomatai fakaagaaga fakahauhau. Kakano ia ati fakatata e tokologa ki a Iesu, he mauokafua to fakamāmā e ia e tau kavega ha lautolu!

 Puhala kua maeke e tau taane ke fifitaki a Iesu. Kumi e tau puhala ke fakamāmā e kavega he hoana haau. Falu hoana ne logona hifo tuga a Rosa, ne tagi aue: “Ko au ni ko e tupa he taane haaku.” Kehe ai, ko e tagata ko Kweku, kua mitaki e fakamauaga, ne pehē: “Fa hūhū au ke he hoana haaku ko e maeke fēfē au ke lagomatai. Ha kua fakaalofa au ki a ia, fa makaukau au ke lagomatai a ia mo e tau fekau he kaina.”

Kua fakaalofa hofihofi a Iesu mo e manamanatu lahi ke he falu. Ke he 12 e tau, ko e fifine nofogati ne lauia lahi he gagao matematekelea. He logona hagaao ke he malolō mana ha Iesu, “kua pehe a ia, Kaeke ke piki atu au ke he hana tapulu hokoia, ti malolo ai au.” Ne hako a ia. Ti fano a ia ki a Iesu, piki atu ke he tau kala tapulu haana, ti malolō agataha. Pete liga manatu he falu kua fakatokoluga e fifine nei, ka e fioia e Iesu kua matematekelea mooli e fifine ia. a Ne vagahau totonu a Iesu ki a ia: “Haku tama fifine na e, . . . kia malolo a koe he hau a kafo mamahi.” Ne nakai fakafuafuakelea  po ke akonaki e Iesu a ia ka e mailoga e ia e gagao he fifine. Ti fakakite e ia e aga mooli haana​—ko e tagata fakaalofa hofihofi.​—Mareko 5:25-34.

Puhala kua maeke e tau taane ke fifitaki a Iesu. Ka nakai malolō e hoana haau, kia fakakite fakalahi e fakaalofa mo e fakauka. Lali ke iloa mo e maama e tuaga haana. Ma e fakatai, ko Ricardo ne fakamaama, “Ka mailoga e au kua mukamuka e hoana haaku ke hogohogomanava, ti lali pauaki au ke nakai talahau ha mena ke fakaauatu e kelea.”

Matutaki a Iesu mo e tau tutaki haana. Ne tutala tumau a Iesu ke he tau kapitiga haana. “Kua fakailoa atu e au kia mutolu e tau mena oti ne fanogonogo ai au ke he haku a Matua,” he ui e ia. (Ioane 15:15) Mooli ai, ne manako a Iesu he falu magaaho ke nofo tokotaha ke manamanatu mo e liogi. Ka e fa mahani a ia ke talahau e tau manatu hokulo lahi ke he tau tutaki haana. He pō ato mate a ia he fakahala tuga ko e tagata matahavala, ne talahau fakatonu e ia ki a lautolu kua “momoko lahi” a ia. (Mataio 26:38) Pete foki he hogohogomanava a ia he tau gahua ha lautolu, ne matutaki tumau a Iesu ke he tau kapitiga haana.​—Mataio 26:40, 41.

Puhala kua maeke e tau taane ke fifitaki a Iesu. Kia matutaki​—mai he loto katoa​—mo e hoana haau. Liga gūgū e hoana kua atāina mo e makaukau e taane ke tutala he toloaga tagata ka e fakanono i kaina. Ko e taha faahi, mailoga e tau manatu ha Ana he fakamaama age he taane haana ki a ia e tau logonaaga. “Mailoga e au kua fakaalofa mooli a ia ki a au,” he ui e ia, “ti tata lahi au ki a ia.”

Ua fakanonoiki ke fakahala e hoana haau. “Ka ita e taane haaku ki a au,” he talahau he taha fifine, “ne nakai tutala a ia ki a au ke he loga e aho. Ne taute e ia au ke logona hifo kua kelea au mo e fakavihiatia.” Ka kua lali a Edwin ke fifitaki a Iesu. “Ka hogohogomanava au, ai mafiti au ke tali atu, ka e kumi e au e magaaho tonu ke tutala tokoua hagaao ki ai.”

Ko Joy, ne totoku he kamataaga, ne kitia e tau hikiaga ke he taane haana tali mai he kamata a ia ke fakaako e Tohi Tapu mo e Tau Fakamoli a Iehova. Talahau e Joy, “Kua holo ki mua a ia mo e eketaha a ia ke eke mo taane mitaki he fifitaki a Iesu.” Totou miliona e tau hoa mau kua aoga mai he tau fakatonuaga Tohi Tapu ia foki. Fia loto nakai a koe ke taute pihia? Maeke a koe ke ole ke he taha he Tau Fakamoli a Iehova ma e fakaakoaga Tohi Tapu nakai totogi.