Ko e tau manatu noa ni kia ko lautolu ne mamate to liu momoui foki? Nakai manatu pihia e aposetolo ko Paulo. Tohi e ia he omoomoi he agaaga tapu: “Kaeke kua ha ha he mouiaga nai hokoia e tau mena kua amaamanaki a tautolu ki ai kia Keriso, po kua mua ha tautolu a malaia ke he tau tagata oti kana. Ka ko e hanai, kua fakatu mai a Keriso ia lautolu kua mamate, kua uta a ia mo fua uluaki kia lautolu kua momohe.” (1 Korinito 15:​19, 20) Mailoga e Paulo ko e liu tu mai ko e mena mooli. Ti kua fakamooli ai ke he fakaliu tu mai ha Iesu. * (Gahua 17:31) Ko e mena ia ne fakahigoa e Paulo a Iesu ko e “fua uluaki”​—⁠ko ia ne fakatu mai fakamua ke he moui tukulagi. Ti kaeke ko Iesu e fakamua, kakano ai to fai ka fakaliu tu mai foki.

Ha ē e taha kakano ke mauokafua a koe ke he amaamanakiaga he liu tu mai. Ko Iehova ko ia ko e Atua fakamooli. “[Ko e] Atua kua nakai maeke ke pikopiko.” (Tito 1:⁠2) Ne nakai lagataha e pikopiko a Iehova, ti to pihia tukulagi a ia. Maeke nakai a ia ke taute e maveheaga to fai fakaliu tu mai, mo e kua fitā he taute pihia e ia, ka mole ia ti nakai fakamooli e tau maveheaga ia? Nakai, ai pihia!

Ko e ha ne fakatoka e Iehova e liu tu mai ma e anoiha? Ha ko e haana a fakaalofa. “Ka mate e tagata to liu moui mai kia a ia?” he hūhū e Iopu. “Kia ui mai a koe, ti tali atu au kia koe; kia finagalo fakaalofa a koe ke he gahua he hau a tau lima.” (Iopu 14:​14, 15) Talitonu mooli a Iopu ko e haana a Matua fakaalofa he lagi ne tatali ke fakaliu tu mai a ia. Kua hiki kia e Atua? “Ko au ko Iehova nakai ni hiki e au haku mahani.” (Malaki 3:⁠6) Manako agaia e Atua ke fakamomoui a lautolu ne mamate, mo e liu ke  malolō e tau tino mo e fiafia. Pihia foki e manako lahi he tau mamatua ka mate e ha laua a tama. Ko e kehekehe, kua ha hā he Atua e malolō ke taute e tau mena ne finagalo a ia ki ai.​—⁠Salamo 135:⁠6.

To foaki e Iehova e malolō ke he haana Tama ke tamai e fiafia mo e olioli ki a lautolu ne maanu ha kua galo e tau fakahele. Fēfē e logonaaga ha Iesu ke he liu tu mai? Ato fakaliu tu mai a Lasalo, ne kitia e Iesu e fakaatukehe he lafu mahakitaga mo e tau kapitiga ha Lasalo, ti “tagi a Iesu.” (Ioane 11:35) He taha magaaho foki, ne feleveia a Iesu mo e fifine takape i Naina, ne kua mate e tama taane fuataha haana. Ne “fakaalofa hohofi ai a ia [Iesu] kia ia, mo e tala age kia ia, Ua tagi a koe.” He magaaho ia ni ne fakaliu tu mai e Iesu e tama taane he fifine takape. (Luka 7:13) Kua lauia mooli a Iesu ha ko e maanu mo e mate. To fiafia lahi mahaki a ia he magaaho ka hiki e ia e momoko ke he fiafia mo e olioli, ke he lalolagi katoa!

Kua fehagai nakai a koe mo e maanu? Liga logona hifo e koe kua nakai fakaai ke utakehe e mate. Ka kua maeke ke utakehe ai​—⁠ko e magaaho ia ka fakahoko he Atua e fakaliu tu mai, puhala he Tama haana. Manatu na manako e Atua ke kitia e koe e tuaga mitaki ia. Manako a ia ki a koe ke ha ha i ai ke liu kukukuku mai e tau fakahele haau. Manamanatu ke he magaaho ka pulega auloa ke lata mo e moui tukulagi he vahā i mua, mo e to nakai liu ke mavehe foki!

Ko Lionel, he kamataaga, ne pehē: “He magaaho fakamui, ne fakaako au hagaao ke he liu tu mai. Fakamua, uka ia au ke talitonu, mo e nakai falanaki ke he tagata ne tala mai e tau mena nei ki a au. Ka e fakakia e au ki loto he Tohi Tapu ti kitia ko e mooli ni! Amaamanaki lahi au ke liu kitia foki e matua tupuna taane haaku.”

Manako nakai a koe ke iloa atu foki? Kua fiafia lahi e Tau Fakamoli a Iehova ke fakakite ki a koe, i loto he Tohi Tapu haau e kakano ne talitonu mauokafua a lautolu ke he liu tu mai he vahā i mua. *