KO PANAYIOTA ne tupu hake he aelani he Metiteraneani. He fuata mui, ne fiafia lahi a ia ke he tau mena politika. Magaaho fakamui ne eke a ia mo tohikupu ma e matakau politika he maaga ne nofo ai a ia. Fano foki a ia he taha fale ke he taha fale ke kumi tupe ma e matakau. Fai magaaho he mole, ne fakauaua a Panayiota. Ko e fili tagata, fia pule, fekovikoviaki mo e mahekeheke ne putoia tumau e tau tagata he matakau, pete kua feiloaaki ko e tau kapitiga.

Ne tupu hake a Daniel he magafaoa ō tapu tumau i Ireland. Momoko ai, ne manatu maaliali e ia e tau fakavaia he tau akoako ne inu lahi e kava, pelē tupe mo e kaiha e tau tupe ne oko he fale tapu, ka e ko e magaaho taha ia hane lauga ki a ia to vela a ia he afi tote ka agahala.

Ko Jeffery ne leva e gahua ofisa ma e kamupanī lahi he tau toga ne fai ofisa i Peritania mo Amerika. Ne loga e magaaho ne manatu e ia e tau tagata gahua mo e tau tagata pisinisi, ne taute kaiha e tau maveheaga mo e tau tagata gahua fakatufono. Ti talahau e lautolu e tau tala fakavaivai ke moua aki e konotuleke gahua.

Nakai ko e tupu laia e tau mena pehenei. Ko e tau mahani fakatupua po ke mahani fakavai kua kitia mau he vahā nei ke he tau gahua oti he tagata​—fakapolitika, fakalotu mo e puhala fakafua koloa. Ko e kupu peritania ma e “fakatupua” kua moua mai he kupu Heleni ne hagaao ke he tagata taute tala ne tui e tau pa mata. He mole ai, ko e kupu nei kua hagaao ia ke he ha tagata ne fakatupua ke fakavaia po ke taute falu mena ke moua e tau foliaga lotokai.

Ko e mahani fakatupua ka fakalagā e tau logonaaga malolō ke vale, ita mo e fakafualoto. He hogohogomanava, ko lautolu ne lauia ai ne talahau pehe: “Mahani fakatupua! To fakaoti nakai?” Fakaaue ai, kua foaki mai he Kupu he Atua ki a tautolu e tau kakano ke talitonu to fakaoti ai.

I loto he Tohi Tapu, ne kamata mai e mahani fakatupua he mena moui fakaagaaga ne nakai kitia. Mai he vahā fakamua, ne fakaaoga he Tiapolo ko Satani e gata mo fakagalogalo aki a ia ke tuga ko e foaki lagomatai ke fakahehē aki e fifine fakamua ko Eva. (Kenese 3:1-5) Tali mai he magaaho ia, tokologa e tagata ne taute foki a lautolu ke tuga kua mua atu ai, ke maeke ia lautolu ke fakahehē e falu ha ko e tau aga lotokai ha lautolu.

He magaaho ne putoia e motu ko Isaraela i tuai he tapuakiaga fakavai mo e fakatupua fakaagaaga, ne hataki tumau he Atua a lautolu ke he tau mena ka tupu. Puhala he perofeta ko Isaia, ne fakapuloa e Iehova ko e Atua: “Kua fakatata mai kia au e motu nai  ke he tau gutu ha lautolu, mo e fakaheke mai kia au ke he tau laugutu ha lautolu, ka ko e tau loto ha lautolu kua fakamamao a ia ia au.” (Isaia 29:13) Magaaho ne nakai tokihala e motu, ti fakaatā he Atua e tau motu kehe ke moumou e lotouho he tapuakiaga ha Isaraela​—ko Ierusalema mo e faituga​—moumou mua he tau Papelonia he 607 F.V.N. mo e fakaoti tukumalagi he tau kautau Roma he 70 V.N. Kitia maaliali ai, nakai fakaatā tukulagi he Atua e mahani fakatupua.

He taha faahi, ko e Atua mo e Haana Tama ko Iesu, ne fiafia lahi ke he tau tagata ne mahani fakamooli. Ma e fakatai, he kamataaga he fekafekauaga ha Iesu, ne fina atu e tagata taane ko Natanielu ki a ia. He kitia atu e Iesu, ne pehē a ia: “Kitiala, ko e Isaraela moli, nakai pikopiko a ia.” (Ioane 1:47) Ko Natanielu, ne iloa foki ko Patolomaio, ne eke mo taha he tau aposetolo toko 12 ha Iesu.​—Luka 6:13-16.

Ne fakalataha a Iesu mo e tau tutaki haana ti fakaako a lautolu ke he puhala manamanatu he Atua. Nakai mahani fakatupua e tau tutaki ha Iesu. Ko e hatakiaga malolō ha Iesu ke totoko ke he tau gahua fakatupua he tau takitaki lotu he magaaho ia. Manamanatu ke he falu puhala ha lautolu.

Kua age ha lautolu a “tau mena fakaalofa” ke kitia mai he falu. Tala age a Iesu ke he tau tagata fanogonogo haana: “A mutolu, neke age ha mutolu e tau mena fakaalofa ki mua he tau tagata kia kitia ai e lautolu; . . . tuga ne eke he tau tagata fakavai.” Tala age foki a ia ke foaki age e koe e tau mena fakaalofa “ke he mena galo” po ke fakalotomatala. Lata a lautolu ke liogi he poko, ke nakai kitia mai he falu. Ti ko e tapuakiaga mooli ha lautolu to talia he Matua haana.​—Mataio 6:1-6.

Ne mafiti a lautolu ke tuhituhi. Pehē a Iesu: “Ko koe na ko e fakavai, ati tiaki a fakamua e koe e akau fakalava he mata hau, ati kitia mitaki ai e koe ke kape kehe e mala akau he mata he hau a matakainaga.” (Mataio 7:5) Ko e tagata ne onoono ke he tau kelea he falu ka e nakai ono hifo ki a ia ni ne mua atu e kelea, kua taute pihia e ia he fia mitaki. Ha ko e mena mooli anei, “nukua hala e tau tagata oti kana, to nakai hoko ke he fakahekeaga mai he Atua.”​—Roma 3:23.

Toka ia lautolu e tau fatuakiloto kelea. He taha magaaho, ne o atu ki a Iesu e tau tutaki he tau Farasaio mo lautolu ne mumui ki a Herota mo e hūhū ki a ia hagaao ke he tau tukuhau. Ti fakaaoga e lautolu e tau kupu fakahakehake fakavai he pehē ki a Iesu: “Ko e akoako na e, kua iloa e mautolu kua fakamoli a koe, kua fakaako foki e koe e puhala he Atua mo e fakamoli.” Ti fakatoka e lautolu e matahele he hūhū: “Po ke heigoa e taofi hāu? po ke lata kia ke uta e telu kia Kaisara, po ke nakai.” Tali e Iesu: “Ko e tau tagata fakavai na e, ko e heigoa e mena kua kamatamata mai ai e mutolu au?” Ne hako a Iesu he fakahigoa a lautolu ko e tau tagata fakavai ha kua nakai manako a lautolu ke iloa e tali ke he hūhū ka kua lali ke “tauhele fefe e lautolu a ia ke he hana tau kupu.”​—Mataio 22:15-22.

He fakatu e fakapotopotoaga Kerisiano he Penetekoso 33 V.N., ko e magaaho ia ne maeke e mahani fakamooli ke tupu lahi. Ne eketaha e tau Kerisiano mooli ke utakehe e tau mahani fakavai mai ia lautolu. Ma e fakatai, ko Peteru ko e taha he tau aposetolo toko 12 ne fakamafana e tau Kerisiano ke “omaoma a mutolu ke he kupu moli, ke he Agaga, kua hoko ke he fakaalofa [faka]moli ke he tau matakainaga.” (1 Peteru 1:22) Ne hataki he aposetolo ko Paulo e tau matakainaga haana ke fakagahua e “fakaalofa ia mai he loto mea, mo e loto manamanatu hifo mitaki, mo e tua fakamoli.”​—1 Timoteo 1:5.

Ko e tau fakaakoaga ha Iesu mo e he tau aposetolo i loto he Tohi Tapu, kua malolō agaia he vahā nei tuga ni he senetenari fakamua. Hagaao ke he mena nei, ne tohia he aposetolo ko Paulo: “Ko e kupu he Atua kua moui ia, mo e gahua malolo, kua mua foki hana matila ke he tau pelu oti kana kua matila fakafahiua, kua tuina foki ato vevehe tuai ai e loto mo e agaga, ko e tau fatia mo e tau uho hui, kua fakafili foki e tau  manatu mo e tau fakafiliaga he tau loto.” (Heperu 4:12) He iloa e tau fakaakoaga he Tohi Tapu mo e fakamalolō ke gahua fakalataha ki ai, kua lagomatai e tokologa ke liliuina mai he mahani fakatupua ka e tutuli ke he falanakiaga mooli. Manatu e tau mena ne tutupu ki a lautolu tokotolu ne totoku he kamataaga.

Ko Panayiota ne hiki e moui he talia e uiina ke fina atu ke he tau feleveiaaga he Fale he Kautu he Tau Fakamoli a Iehova. Nakai kitia e ia e ha mahani fia tututonu ke fakafiafia e falu. Pehē a ia: “Kitia e au e fakaalofa mo e fiafia mooli ma e tau matakainaga, ko e mena ne nakai kitia e au he tau tau loga ne fakalataha au ke he tau gahua politika.”

Kamata a Panayiota ke fakaako Tohi Tapu, ti hokotia ke he papatisoaga. Ko e 30 e tau ia kua mole. Pehē a ia mogonei: “Kua moua e au e kakano mooli he moui, nakai ko e fano ke he taha fale mo e taha fale ke fakatolomaki he matakau polotika, ka ko e magaaho ne kamata au ke fakamatala hagaao ke he Kautu he Atua​—ko e puhala ni a ia ke moua e tautolu e lalolagi fakafilitonu.”

Ko Daniel ne holo ki mua he fakapotopotoaga Kerisiano ti moua falu kotofaaga. Fai tau ne mole, ti hehē e fifiliaga haana mo e tupetupe e loto manamanatu haana. “He liu manatu e mahani fakatupua ne kitia e au he lotu he tau tau fakamua,” he pehē a ia, “logona hifo e au kua nakai fai puhala foki ka e liuaki age e tau kotofaaga haaku. Ai maeke au ke fakaatā e tau matakainaga Kerisiano ke manatu ko au mo lautolu, ka e nakai mahani fakamooli au.”

Fiafia ai, fai magaaho ne mole, logona hifo e Daniel kua maeke a ia ke liu ke he haana tau kotofaaga mo e loto manamanatu mitaki, ti liu a ia talia fiafia e tau kotofaaga he fakapotopotoaga. Ko e fakamooli maaliali nei ha lautolu ne fekafekau ke he Atua mo e nakai fai mahani fakatupua. Fakaako a lautolu ke “tiaki a fakamua . . . e akau fakalava” he tau mata ha lautolu to fano ke “kape kehe e mala akau” he mata he matakainaga.

Ko Jeffery ne gahua pisinisi ne pehē: “He holo ki mua e iloilo haaku ke he Tohi Tapu, mailoga e au kua nakai maeke ia au ke eke mo tagata sela koloa ne mahifi mo e fakavaivai he tutala ke moua e konutuleke. Kua lauia e loto manamanatu haaku he tau kupu Tohi Tapu tuga e Tau Fakatai 11:1, ne talamai ko e tau ‘fua tautau fakavai, ko e mena vihiatia kia Iehova.’” E, he nakai tuga a lautolu ne hūhū ki a Iesu hagaao ke he tukuhau, kua fakaako a Jeffery ke nakai mahani fakagalogalo ke he haana a tau gahua mo e tau matakainaga Kerisiano ti pihia ki a lautolu ne nakai tua.

Ko e miliona he Tau Fakamoli a Iehova he lalolagi katoa ne fakamakamaka ke fakagahua e tau mena ne fakaako e lautolu mai he Tohi Tapu. Lali fakalahi a lautolu ke “tapulu . . . ke he tagata fou kua eke ke lata mo e Atua, ke he tututonu mo e mahani mitaki ke fakamoli ai.” (Efeso 4:24) Fakamafana atu ki a koe ke iloa ko hai e Tau Fakamoli a Iehova, tau mena ne talitonu a lautolu ki ai, mo e puhala ke lagomatai e lautolu a koe ke fakaako ke he maveheaga he Atua ma e lalolagi foou. To “nofo ai e tututonu” mo e nakai fai mahani fakatupua.​—2 Peteru 3:13.