Tau Hūhū Tohi Tapu kua Tali
Maeke nakai a tautolu ke iloa e kupu mooli hagaao ke he Atua?
Ko e ha ne manako e Atua ke iloa e tautolu e kupu mooli? Totou Ioane 17:3
Ne matutaki e Atua mo e tau tagata. Fakaaoga e ia e haana agaaga tapu, po ke malolō gahuahua, ke tuku haana tau manatu ke he tau loto he tau tagata tohia Tohi Tapu. (2 Peteru 1:20, 21) Maeke a tautolu ke iloa e kupu mooli hagaao ke he Atua he totou e Tohi Tapu.—Totou Ioane 17:17; 2 Timoteo 3:16.
I loto he Tohi Tapu, kua fakakite mai he Atua e tau mena loga hagaao ki a ia. Talahau mai e ia e kakano ne tufuga e ia e tagata moui, ko e heigoa e finagalo haana ma e tau tagata, mo e puhala ne manako a ia ke momoui a tautolu. (Gahua 17:24-27) Manako a Iehova ko e Atua ke iloa e tautolu e kupu mooli hagaao ki a ia.—Totou 1 Timoteo 2:3, 4.
Ko e ha kua talia he Atua a lautolu kua fiafia ke he kupu mooli?
Ko Iehova ko e Atua he kupu mooli, ti fakafano mai e ia haana Tama ko Iesu ke fakaako e tau tagata ke he kupu mooli. Ti ko lautolu ne fiafia ke he kupu mooli ne kua mumui atu ai ki a Iesu. (Ioane 18:37) Manako e Atua ke he tau tagata pihia ke tapuaki ki a ia.—Totou Ioane 4:23, 24.
Kua puipui e Satani ko e Tiapolo e tau tagata tokologa neke iloa e Atua he talahau e tau fakaakoaga fakavai hagaao ke he Atua. (2 Korinito 4:3, 4) Ko e tau tagata ne nakai fiafia ke he tau mena mitaki, kua mumui atu ke he tau fakaakoaga fakavai ia. (Roma 1:25) Ka kua totou miliona e tau tagata fakamooli kua iloa e kupu mooli hagaao ke he Atua he fakaako e Tohi Tapu.—Totou Gahua 17:11.