Ko e heigoa e mena fakaalofa mua ue atu ka age e koe ke he tau fanau haau? Loga e mena ne lata mo lautolu, putoia haau a fakaalofa, takitakiaga, mo e puipuiaga. Ka ko e mena fakaalofa uho lahi ka foaki e mua ki a lautolu ko e iloilo ha Iehova mo e kupu mooli ne moua he haana Kupu, ko e Tohi Tapu. (Ioane 17:3) Ko e iloilo ia ka lagomatai e fanau haau ke tupu e fakaalofa ki a Iehova mo e fekafekau loto katoa ki a ia, pete he ikiiki a lautolu.​—Mataio 21:16.

Loga e matua ne mailoga ko e fanau ikiiki kua fanogonogo fakamitaki ke he tau lesoni mo e tau gahua kūkū. Ko e mena ia kua fiafia a mautolu ke foaki e tohi nei, Tau Fakaakoaga Tohi Tapu Haaku. Ko e tau lesoni takitaha kua talaga ke fakaako ke he puhala mukamuka. Ko e fakatino ne ha ha i ai e tau vala tala ne tauteute pauaki ma e tau fanau ne tolu e tau ki lalo. Ha ha i ai foki e tau manatu ke lata mo e tau gahua. Ko e Tau Fakaakoaga Tohi Tapu Haaku ne nakai ko e toi mo fefeua he tau fanau. Ka kua talaga ai ma haau ke totou auloa mo e fanau haau, ti fakaholo ki mua e matutakiaga.

Logona hifo mooli e mautolu ko e tohi nei to lagomatai he fakaako e koe e fanau haau ke he kupu mooli he Tohi Tapu “tali mai foki he vaha tote.”​—2 Timoteo 3:14, 15.

Ha mutolu a tau matakainaga,

Kau Fakatufono he Tau Fakamoli a Iehova