Iloa nakai e koe ko e heigoa e Kautu kua tutala a tautolu ki ai?— E, ko e Kautu he Atua, ko e Kautu ka eke e lalolagi mo parataiso. Manako nakai a koe ke iloa atu foki hagaao ke he Kautu nei?—

Kua igatia e kautu mo e patuiki. Ti pule e patuiki ke he tau tagata he motu haana. Iloa nakai e koe ko hai e Patuiki he Kautu he Atua?— Ko Iesu Keriso. Nofo a ia he lagi. Nakai leva to Patuiki a ia ke he tau tagata oti kana he lalolagi! Manatu nakai a koe to fiafia a tautolu ka Patuiki a Iesu ke he lalolagi katoa?—

To fiafia lahi a tautolu! He Parataiso, to nakai latau e tau tagata po ke liu ke felakutaki. To fakafeofanaki e tau tagata oti. To nakai fai tagata ka gagao po ke mate. To fakaala e tau mata he tau tagata matapouli, to logona foki e tau tagata teliga tuli, mo e tau tagata kulikuli to tafepoi mo e hopohopo. To loga e tau mena kai ma e tau tagata oti. Mo e to fekapitigaaki e tau manu ti nonofo mafola foki mo e tau tagata. Ko e tau tagata ne kua mamate to liliu ke momoui. Tokologa he tau tagata taane mo e fifine ne fakaako a koe hagaao ki ai he porosua nei tuga a Repeka, Raava, Tavita, mo Elia to liliu ke momoui foki! Manako nakai a koe ke feleveia mo lautolu ka liliu momoui mai?—

 Kua fakaalofa a Iehova ki a koe ti manako ke fiafia a koe. Ka fakatumau a koe ke fakaako hagaao ki a Iehova mo e omaoma ki a ia, to maeke a koe ke moui tukulagi he lalolagi parataiso fulufuluola! Manako nakai a koe ke pihia?—