Ko Repeka ko e fifine ne fakaalofa ki a Iehova. Ko Isaako e taane haana. Ne fakaalofa foki a ia ki a Iehova. Feleveia fēfē a Repeka mo Isaako? Fakakite fēfē e ia kua manako a ia ke fakafiafia a Iehova? O mai la ke fakaako atu foki hagaao ki a ia.

Ko e tau matua ha Isaako ko Aperahamo mo Sara. Ne nonofo a lautolu he motu ko Kanana, ne nakai tapuaki e tau tagata ki a Iehova. Ka e manako a Aperahamo ke mau e tama taane haana mo e fifine ne tapuaki ki a Iehova. Ti fakafano e ia e fekafekau haana, liga ko Elisara, ke kumi e hoana ma Isaako he matakavi ko Karana, ne nonofo i ai e falu magafaoa ha Aperahamo.

Ne tuku fenoga atu a Elisara mo e falu fekafekau ha Aperahamo. Ko e fenoga loa lahi. Ne uta e lautolu hogofulu e kamela ne tuku ai e tau kai mo e tau mena fakaalofa. Iloa fēfē e Elisara ko e fifine fe ka fifili ma Isaako? Magaaho ne hohoko a Elisara mo e falu fekafekau ki Karana, ti tutū a lautolu he vai keli ha kua iloa e Elisara kua tata tuai ke o atu e tau tagata ke utu vai. Ne liogi a ia ki a Iehova mo e pehē: ‘Kaeke ke ole e au ke he fifine fuata ke foaki mai taha vai ma haaku ti ka tuku mai e ia mo e fakainu haaku tau kamela, ti iloa ai e au ko e fifine nei ne kua fifili e koe.’

Ti fina atu ai a Repeka ke he vai keli. Ne talahau he Tohi Tapu ko e fifine mata mitaki lahi a ia. Ne ole e Elisara ki a ia ma e taha  mena ke inu ti pehē a Repeka: ‘E mitaki. To atu e au e vai ma haau, ti tamai e vai ma e tau kamela foki haau.’ Manamanatu la! Na inu lahi e tau kamela ka fia inu, ti poi atu lagaloga a Repeka ke he vai keli. Kitia nakai e koe a ia i loto he fakatino hane gahua lahi?— Ne ofo lahi a Elisara he puhala ne tali e Iehova e liogi haana.

Ne foaki age e Elisara loga e tau mena fakaalofa fulufuluola ma Repeka. Kua uiina e ia a Elisara mo e haana tau fekafekau foki ke he kaina he magafaoa haana. Ne fakamaama e Elisara e kakano ne fakafano atu e Aperahamo a ia ki ai mo e puhala ne tali e Iehova e liogi haana. Ne fiafia e magafaoa ha Repeka ke mau a ia mo Isaako.

Ka e fēfē e manatu haau, manako nakai a Repeka ke mau mo Isaako?— Ne iloa e Repeka ko Iehova ne fakafano age a Elisara. He magaaho ne hūhū age e magafaoa ha Repeka ko e fia fano nakai a ia ki Kanana ke mau mo Isaako, pehē a ia: ‘E, to fano au.’ He mogoia ni, ne fano a ia mo Elisara. He magaaho ne hohoko a lautolu ki Kanana, ne mau a ia mo Isaako.

Ha kua taute e Repeka e tau mena ne manako a Iehova ki a ia ke taute, ne fakamonuina e Iehova a ia. He loga e tau tau ne mole, ti fanau mai a Iesu he magafaoa haana! Kaeke kua tatai a koe mo Repeka mo e fakafiafia a Iehova, to fakamonuina foki e Iehova a koe.