Ko e Heigoa e Finagalo he Atua ma Tautolu?
MAGAAHO ka totou e koe e nusipepa, kitekite ke he televisoni, po ke fanogonogo ke he letiō, kua kitia mo e logona e koe loga e tau tala matahavala, latau, mo e fakamatakutaku. Liga matematekelea a koe ha kua lauia he gagao po ke mate e taha fakahele haau.
Hūhū ki a koe ni:
-
Ko e manako kia he Atua anei ma haaku mo e magafaoa haaku?
-
Moua e au i fe e lagomatai ke fahia ke he tau lekua haaku?
-
To maeke nakai ke moua e mafola mooli?
Foaki mai he Tohi Tapu e tau tali mauokafua ke he tau hūhū ia.
FAKAAKO HE TOHI TAPU TO TAUTE HE ATUA E TAU MENA OFOOFOGIA KE HE LALOLAGI.
-
To nakai liliu e tau tagata ke mamahi, fuakau, po ke mamate.—Fakakiteaga 21:4
-
To “hopohopo ai e tagata kulikuli tuga ne aila.”—Isaia 35:6
-
To “fakaala ai e tau mata he tau tagata mata pouli.”—Isaia 35:5
- Ko lautolu ne mamate to liliu ke momoui.—
-
To nakai fai tagata ka gagao.—Isaia 33:24
-
To loga e tau mena kai ma e tau tagata oti he lalolagi.—Salamo 72:16
AOGA MAI HE TAU MENA NE FAKAAKO HE TOHI TAPU
Kua mukamuka ke manatu ko e tau mena ne totou e koe he tau lau fakamua he tohi nei ko e miti noa. Ka kua mavehe mai e Atua to nakai leva ti taute e tau hikihikiaga ia ke he lalolagi, ti fakamaama he Tohi Tapu e puhala ka taute pihia e ia.
Lahi atu e mena kua taute he Tohi Tapu. Tala mai ai e tau mena kua lata a tautolu ke iloa ke moua e fiafia mooli mo e olioli e moui mogonei. Manamanatu fakakū la ke he tau mena ne tupetupe a koe ki ai. Liga putoia ai e tau tuaga fakatupe po ke magafaoa, nakai malolō e tino, po ke mate e fakahele haau. Maeke e Tohi Tapu ke lagomatai a koe ke fahia ke he tau lekua ia, ti maeke ke fakamafana a koe he tali e tau hūhū tuga anei:
-
To liliu nakai a tautolu ke kitia e tau fakahele ha tautolu ne mamate?
-
Ko e ha kua mauokafua a tautolu to fakamooli he Atua e tau mena oti ne mavehe e ia?
Ha kua totou a koe ke he tohi nei kua fakakite na manako a koe ke iloa e tau mena ne fakaako he Tohi Tapu. To lagomatai he tohi nei a koe. Ha ha i ai e tau hūhū ma e tau paratafa ka lagomatai a koe ke maama mitaki e Tohi Tapu. Tokologa lahi e tau tagata kua fiafia he fakatutala ke he Tohi Tapu mo e Tau Fakamoli a Iehova. Amanaki a mautolu to fiafia foki a koe. Kia fakamonuina he Atua a koe he iloa fakahaga e tau mena ka fakaako he Tohi Tapu ki a koe!