1-3. Ko e heigoa e tau hūhū he tau tagata hagaao ke he mate, ti tali fēfē he falu lotu?

KO E maveheaga he Tohi Tapu ki a tautolu to hoko mai e aho “ti nakai tuai fai mate.” (Fakakiteaga 21:4) He Veveheaga 5, fakaako e tautolu ko e lukutoto ati maeke a tautolu ke moua e moui tukulagi. Ka e mamate agaia e tau tagata. (Fakamatalaaga 9:5) Ti taha he tau hūhū aoga lahi ha tautolu, Ko e heigoa ka tupu ki a tautolu ka mamate?

² Ko e tali ke he hūhū ia kua aoga pauaki ka mate e fakahele ha tautolu. Liga manamanatu a tautolu: ‘Kua fano a ia ki fe? Hane onoono mai kia a ia ki a tautolu? Maeke nakai a ia ke lagomatai a tautolu? To liu nakai a tautolu ke kitia a ia?’

³ Kehekehe e tali he tau lotu ke he tau hūhū ia. Falu ne fakaako kaeke ko e tagata mitaki a koe, to fano a koe ke he lagi ti kaeke ko e tagata kelea a koe, to tugi a koe he afi tote. Falu ne pehē ka mate a koe to eke a koe mo mena moui fakaagaaga ti fakalataha mo e tau tagata he magafaoa haau ne fitā he mamate. Mo e falu ne pehē ka mate a koe ti fakafili, to liu a koe fanau mai, po ke liu moui he taha tino kehe foki, liga ko e tagata kehe po ke manu.

4. Ko e heigoa ne fakavē e fakaakoaga he tau lotu hagaao ke he mate?

⁴ Tuga na kehekehe lahi e tau mena ne fakaako he tau lotu. Ka e teitei ni ke taha e fakavēaga. Fakaako ai ka mate e tagata, fai vala a ia ne matutaki ke moui. Mooli nakai e mena ia?

5, 6. Ko e heigoa ka tupu ki a tautolu ka mamate?

⁵ Iloa e Iehova e mena ka tupu ki a tautolu ka mamate, ti tala mai e ia ka mate e tagata kua fakaoti tuai haana moui. Ka mate e taha tagata, ko e tau logonaaga mo e tau manatu haana kua nakai moui agaia he taha matakavi foki. * Ka mamate a tautolu kua nakai maeke ke kitia, nakai logona, ti nakai maeke foki ke manamanatu.

⁶ Tohi he Patuiki ko Solomona “ko lautolu ne mamate nakai iloa e lautolu ha mena.” Nakai maeke a lautolu ne mamate ke fakaalofa po ke vihiatia, “ha kua nakai fai gahua, po ke manamanatu, po ke mena kua iloa, po ke iloilo ke he tukuaga.” (Totou Fakamatalaaga 9:5, 6, 10.) He Salamo 146:4, tala mai e Tohi Tapu ki a tautolu ka mate e tagata, kua mate ai “hana tau manatu.”

7. Ko e heigoa ne talahau e Iesu hagaao ke he mate?

⁷ Magaaho ne mate e kapitiga mitaki ha Iesu ko Lasalo, pehē a ia ke he tau tutaki haana: “Kua mohe tuai ha tautolu a kapitiga ko Lasalo.” Ka e nakai kakano a Iesu kua mohe a Lasalo ke okioki he mategūgū. Pehē foki a Iesu: “Kua mate tuai a Lasalo.” (Ioane 11:11-14) Ne fakatatai e Iesu e mate ke he mohe. Nakai pehē a ia ko Lasalo he lagi po ke haia mo e tau tagata he magafaoa haana ne fitā he mamate. Nakai pehē foki a Iesu ko Lasalo kua matematekelea he afi tote po ke liu fanau mai ko e taha tagata kehe po ke manu. Ka kua tuga ne mohe pulumohea a Lasalo. Fakatatai foki he falu kupu Tohi Tapu e mate ke he mohe pulumohea. Talahau he Tohi Tapu ke he magaaho ne tamate a Setefano, “ati mohe ai a ia” he mate. (Gahua 7:60) Tohi foki he aposetolo  ko Paulo ko e falu Kerisiano ne kua “momohe” he mamate.​—1 Korinito 15:6.

8. Iloa fēfē e tautolu ko e mena nakai tufuga he Atua e tau tagata ke mamate?

⁸ Tufuga kia he Atua a Atamu mo Eva ke mamate he magaaho fakamui? Nakai! Tufuga e Iehova a laua ke momoui tukulagi mo e mitaki katoatoa e malolō tino. Magaaho ne tufuga e Iehova e tau tagata, ne tuku e ia ki a lautolu e manako ke momoui tukulagi. (Fakamatalaaga 3:11) Nakai manako e tau matua ke kitia e tau fanau ha laua kua fuakau ti mamate, pihia foki e logonaaga ha Iehova ki a tautolu. Ka  tufuga mogoia he Atua a tautolu ke momoui tukulagi, ko e ha ne mamate a tautolu?

9. Ko e ha ne nakai uka ke omaoma ke he poakiaga ne age e Iehova ki a Atamu mo Eva?

⁹ He kaina ko Etena, ne tala age a Iehova ki a Atamu: “Ko e tau akau oti kana ha he kaina ke kai ai ni e koe. Ka ko e akau ke iloa ai e mitaki mo e kelea, aua neke kai ai e koe; ha ko e aho ka kai ai e koe to mate ai ni a koe.” (Kenese 2:9, 16, 17) Nakai uka e poakiaga maaliali ia ke omaoma ki ai, ti tonuhia a Iehova ke tala age ki a Atamu mo Eva e mena mitaki mo e mena kelea. He omaoma ki a Iehova, nukua fakakite e fakalilifu ha laua ke he pule haana. Fakakite foki e laua e loto fakaaue ke he tau mena oti ne foaki age e Iehova ki a laua.

10, 11. (a) Fakahehē fēfē e Satani a Atamu mo Eva? (e) Ko e ha ne nakai mitaki e mena ne taute e Atamu mo Eva?

¹⁰ Momoko ai, ne fifili a Atamu mo Eva ke nakai omaoma ki a Iehova. Pehē a Satani ki a Eva: “Ko e moli kia kua pehe mai e Atua, aua neke kai e mua ke he tau akau oti he kaina?” Tali atu a Eva: “Mena kai e maua e tau fua he tau akau he kaina. Ka ko e fua he akau ha he vaha loto he kaina, ne pehe mai e Atua, Aua neke kai ai e maua, po ke pipiki a maua ki ai, neke mamate a maua.”​—Kenese 3:1-3.

¹¹ Ti pehē a Satani: “Nakai ni mamate a mua; Ha kua fioia he Atua ko e aho ka kai ai e mua, ti fakaala ai ha mua a tau mata; ti eke ai ni a mua ke tuga ne tau atua ke iloa ai e mitaki mo e kelea.” (Kenese 3:4-6) Manako a Satani ke manatu a Eva na maeke ia Eva ke fifili e mena mitaki mo e mena kelea. He magaaho taha, ne pikopiko a ia ke he mena ka tupu ka nakai omaoma a Eva. Pehē a Satani to nakai mate a Eva, ti kai e Eva e fua he akau mo e age foki ke he taane haana. Iloa e Atamu mo Eva na tala age a Iehova ke aua neke kai e fua he akau. Magaaho ne kai ai e laua, ne fifili a  laua ke nakai omaoma ke he poakiaga maaliali mo e aoga. He kai e fua he akau, fakakite e laua e nakai fakalilifu ke he Matua fakaalofa ha laua he lagi. Nakai mitaki e mena ne taute e laua!

12. Ko e ha ne fakamamahi ai he nakai omaoma a Atamu mo Eva ki a Iehova?

¹² Ko e mena fakamamahi ha ia he nakai fakalilifu he tau matua uluaki ha tautolu e Tufuga ha laua! Fēfē e logonaaga haau ka fakamakamaka a koe ke feaki e tama taane mo e tama fifine ti totoko a laua ki a koe mo e taute ni e tau mena kua manako a laua ki ai? Nakai kia mamahi e loto haau?

13. Ko e heigoa e kakano ha Iehova he pehē a ia “to liu foki a koe ke he efuefu”?

¹³ He nakai omaoma a Atamu mo Eva, ne galo ia laua e amaamanakiaga ke momoui tukulagi. Ne tala age a Iehova ki a Atamu: “Ha ko e efuefu ni a koe, to liu foki a koe ke he efuefu.” (Totou Kenese 3:19.) Kakano ai to liu a Atamu ke he efuefu, tuga kua nakai tufugatia a ia. (Kenese 2:7) He mole e agahala a Atamu, ne mate a ia ti kakano kua nakai moui.

14. Ko e ha ne mamate a tautolu?

¹⁴ Ane mai omaoma a Atamu mo Eva ke he Atua, to momoui agaia a laua mogonei. Ka ko e magaaho ne nakai omaoma a laua ke he Atua, ne agahala ai ti fakahiku ke mamate. Ko e agahala kua tatai mo e gagao kelea lahi ne moua mai e tautolu he tau matua uluaki. Fanau a tautolu oti ko e tau tagata  agahala, ti ko e kakano ia ne mamate a tautolu. (Roma 5:12) Ka e nakai pihia e finagalo he Atua ma e tau tagata. Nakai manako e Atua ke mamate e tau tagata, ti fakahigoa he Tohi Tapu e mate ko e “fi.”​—1 Korinito 15:26.

15. Fakatokanoa fēfē a tautolu ha ko e kupu mooli hagaao ke he mate?

¹⁵ Ko e kupu mooli hagaao ke he mate kua fakatokanoa a tautolu mai he loga e tau manatu hepe. Fakaako he Tohi Tapu ki a tautolu ko e tau tagata mamate ne nakai logona ha mamahi po ke momoko. Nakai maeke a tautolu ke tutala ki a lautolu, ti nakai maeke a lautolu ke tutala ki a tautolu. Nakai maeke a tautolu ke lagomatai e tau tagata mamate, ti nakai maeke e tau tagata mamate ke lagomatai a tautolu. Nakai maeke a lautolu ke fakamatematekelea a tautolu, ti nakai lata a tautolu ke matakutaku ia lautolu. Ka e loga e lotu ne tala mai ko e tau tagata mamate kua momoui he taha matakavi ti maeke a tautolu ke lagomatai atu ka totogi tupe ke he tau akoako po ko lautolu ne onoono ki ai ko e tau tagata tapu. Ka ko e magaaho ne iloa e tautolu e kupu mooli hagaao ke he mate, nakai fakahehē he tau pikopiko ia a tautolu.

16. Ko e heigoa e pikopiko ne fakaako he loga he tau lotu hagaao ke he tau tagata mamate?

¹⁶ Fakaaoga e Satani e lotu fakavai ke pikopiko ki a tautolu ti taute ke manamanatu a tautolu na momoui agaia e tau tagata mamate. Ma e fakatai, fakaako he falu lotu ka mamate a tautolu na fai vala a tautolu ne moui agaia he taha matakavi. Pihia nakai e fakaakoaga he lotu haau ki a koe, po ke fakaako ki a koe e talahauaga he Tohi Tapu hagaao ke he tau tagata mamate? Fakaaoga e Satani e tau pikopiko ke fuluhi kehe e tau tagata mai ia Iehova.

17. Ko e ha e talahauaga ke tugi e tau tagata he afi tote kua ekefakakelea ki a Iehova?

¹⁷ Ko e fakaakoaga he tau lotu loga ko e mena ke ofo ai.  Ma e fakatai, fakaako falu to tugi tukulagi e tau tagata kelea he afi tote. Ko e pikopiko ia kua ekefakakelea ki a Iehova. Nakai fakaai a ia ke fakaatā e tau tagata ke mamahi pihia! (Totou 1 Ioane 4:8.) Fēfē e logonaaga haau ke he tagata ne fakahala e tama he tugi e tau lima he tama he afi? Liga manatu a koe kua lahi e mahani vale he tagata ia. Ti nakai fia iloa a koe i ai. Pihia tonu e manako ha Satani ma tautolu ke logona hifo hagaao ki a Iehova!

18. Ko e ha kua nakai lata a tautolu ke matakutaku ke he tau tagata mamate?

¹⁸ Falu lotu ne tala mai ka mamate e tau tagata, ne eke a lautolu mo tau mena momoui fakaagaaga. Fakaako he tau lotu ia na lata a tautolu ke fakalilifu mo e matakutaku foki ke he tau agaaga pihia ha kua maeke a lautolu ke eke mo tau kapitiga mitaki po ke tau fī kelea lahi. Tokologa e tagata ne talitonu ke he pikopiko ia. Matakutaku a lautolu ke he tau tagata mamate, ti tapuaki ki ai ka e nakai ki a Iehova. Manatu kua nakai fai logonaaga e tau tagata mamate, ti nakai lata a tautolu ke matakutaku ia lautolu. Ko Iehova e Tufuga ha tautolu. Ko ia e Atua mooli ti lata a tautolu ke tapuaki ki a ia ni hokoia.​—Fakakiteaga 4:11.

19. Lagomatai fēfē ki a tautolu he iloa e kupu mooli hagaao ke he mate?

¹⁹ Magaaho ka iloa e tautolu e kupu mooli hagaao ke he mate, kua fakatokanoa a tautolu mai he tau pikopiko fakalotu. Ti lagomatai he kupu mooli nei a tautolu ke maama e tau maveheaga mitaki lahi ha Iehova hagaao ke he tau momoui ha tautolu mo e vahā anoiha ha tautolu.

20. Ko e heigoa ha tautolu ka fakaako he veveheaga ka mui mai?

²⁰ He vahā i tuai, ko e fekafekau he Atua ko Iopu ne hūhū: “Ka mate e tagata to liu moui mai kia a ia?” (Iopu 14:14) Maeke mooli kia e tagata ne mate ke liu moui? Ko e tali ne tuku mai he Atua i loto he Tohi Tapu kua mafanatia lahi. To kitia e tautolu he veveheaga ka mui mai.