1. Ko e heigoa e liogi talahaua ka fakatutala a tautolu ki ai mogonei?

TOTOU miliona e tagata ne iloa e liogi talahaua ne fakahigoa ko e Ha Mautolu a Matua, po ke Liogi he Iki. Fakaaoga e Iesu e liogi nei ke fakaako e tau tutaki haana ke liogi. Ko e heigoa ne hagaao e liogi haana ki ai? Ti ko e ha kua aoga e liogi nei ma tautolu he vahā nei?

2. Ko e heigoa e tau mena tolu ia ne aoga kua fakaako e Iesu a tautolu ke liogi hagaao ki ai?

² Pehē a Iesu: “Hanai, kia liogi pehe a mutolu, Ha mautolu a Matua na e, ha ha he lagi, kia tapu hau a higoa. Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Totou Mataio 6:9-13.) Ko e ha ne fakaako e Iesu a tautolu ke liogi ma e tau mena tolu ia?​—Kikite Tala he Matahiku 19.

3. Ko e heigoa ha tautolu kua lata ke iloa hagaao ke he Kautu he Atua?

³ Kua fakaako e tautolu ko e higoa he Atua ko Iehova. Ti fakatutala foki ke he finagalo he Atua ma e tau tagata mo e lalolagi. Ka ko e heigoa e kakano ha Iesu he pehē: “Kia hoko mai hau a kautu”? To fakaako a tautolu ke he Kautu he Atua, ko e heigoa ka taute ai, mo e puhala ka fakatapu ai e higoa he Atua.

4. Ko e heigoa e Kautu he Atua, mo e ko hai e Patuiki?

⁴ Fakatū e Iehova e fakatufono he lagi ti fifili a Iesu ke eke ai mo Patuiki. Fakahigoa he Tohi Tapu e fakatufono nei ko e Kautu he Atua. Ko Iesu “ko e Patuiki he tau patuiki, mo e Iki he tau iki.” (1 Timoteo 6:15) Maeke a Iesu ke  loga atu e tau mena mitaki ka taute he fakatatai ke he ha tagata ne pule, ti mua atu e malolō haana ke he malolō he tau pule ka tuku fakalataha.

5. Pule mai i fe e fakatufono he Atua? To pule ai ke he heigoa?

⁵ He mole e 40 e aho he liu tu mai a Iesu, ne liu atu a ia ke he lagi. Fai magaaho he mole ti kotofa e Iehova a ia ko e Patuiki he Kautu. (Gahua 2:33) Ko e fakatufono he Atua to pule mai he lagi ke he lalolagi. (Fakakiteaga 11:15) Kakano haia ati fakahigoa he Tohi Tapu e Kautu he Atua ko e “kautu ha he lagi.”​—2 Timoteo 4:18.

6, 7. Ko e heigoa ati mua atu a Iesu ke he ha tagata ne patuiki?

⁶ Pehē e Tohi Tapu kua mua atu a Iesu ke he ha tagata ne patuiki, kakano “ko ia hokoia ne toka ai e moui tukulagi.” (1 Timoteo 6:16) Ko e tau tagata oti ne pule to mamate ni a lautolu, ka e to nakai mate a Iesu. Ko e tau mena mitaki oti kana ka taute e Iesu ma tautolu to tumau tukulagi.

⁷ Pehē e perofetaaga he Tohi Tapu to eke a Iesu mo Patuiki fakafili tonu mo e fakaalofa hofihofi noa: “To haele mau ia ia e Agaga a Iehova; ko e Agaga he iloilo mo e pulotu; ko e Agaga he fifiliaga mo e malolo; ko e Agaga he maama mo e matakutaku kia Iehova. To fiafia foki a ia ke he matakutaku kia Iehova; nakai fakafili ai e ia ke lata mo e kitekite atu he hana tau fofoga; to nakai akonaki [po ke, fakatonu] foki e ia ke lata mo e logona he hana tau teliga. Ka to fakafili ai e ia mo e tututonu e tau tagata lolelo[l]e [po ke, nonofogati].” (Isaia 11:2-4) Manako nakai a koe ke pihia e patuiki haau?

8. Iloa fēfē e tautolu to nakai pule tokotaha a Iesu?

⁸ Ne fifili he Atua falu tagata ke pule fakalataha mo Iesu he fakatufono he lagi. Ma e fakatai, tala age e aposetolo ko Paulo ki a Timoteo: “Kaeke kua fakauka a tautolu,  ti eke foki a tautolu mo tau patuiki fakalataha mo ia.” (2 Timoteo 2:12) Tokofiha ka pule fakalataha ko e tau patuiki mo Iesu?

9. Tokofiha ka pule mo Iesu? Magaaho fe ne kamata e Atua ke fifili a lautolu?

⁹ He fakaako e tautolu he Veveheaga 7, ne foaki ke he aposetolo ko Ioane e fakakiteaga hagaao ki a Iesu ko e Patuiki he lagi mo e falu patuiki ne 144,000. Ko hai a lautolu ia ne 144,000? Fakamaama e Ioane ko lautolu ia “kua tohi e higoa [ha Iesu mo e] hana Matua ke he tau matale ha lautolu.” Ti lafi e ia: “Ko lautolu ia kua mumui atu ke he Punua mamoe [ko Iesu] ke he tau mena oti kua fano a ia ki ai; ko lautolu ia ne fakafua mai he tau tagata.” (Totou Fakakiteaga 14:1, 4.) Ko lautolu e 144,000 ko e tau Kerisiano fakamooli ne fifili he Atua ke pule fakalataha mo Iesu ko e “tau patuiki ke he lalolagi.” Magaaho ne mamate a lautolu, ne fakaliu tu mai ai ke he lagi. (Fakakiteaga 5:10) Tali mai he magahala he tau aposetolo, hane fifili e Iehova e tau Kerisiano fakamooli ke eke mo vala he matakau ia he tau patuiki toko 144,000.

10. Ko e ha ati ko e fakaalofa ha Iehova ke fakatū a Iesu mo e 144,000 ke pule ke he tau tagata?

¹⁰ Fakaalofa mooli a Iehova ki a tautolu ti fakatoka e ia ma e tau tagata ke pule fakalataha mo Iesu. To eke a Iesu mo pule mitaki ha kua maama e ia a tautolu. Iloa e ia e tuaga he tagata mo e tau matematekelea ne fehagai ki ai. Pehē a Paulo ne fakaalofa a Iesu ki a tautolu ti kua “mamahi fakaalofa fakalataha mo tautolu ke he tau mena kua lolelole ai a tautolu,” mo e fitā he “kamatamata a ia ke he tau mena oti kana tuga a tautolu.” (Heperu 4:15; 5:8) Iloa he 144,000 e tuaga he tagata. Ne taufetului foki a lautolu he nakai mitaki  katoatoa mo e gagao. To mauokafua mogoia a tautolu kua maama e Iesu mo e 144,000 e tau logonaaga ha tautolu mo e tau lekua foki ne fehagai a tautolu ki ai.

11. Ko e ha ne fakaako e Iesu e tau tutaki haana ke liogi ma e finagalo he Atua ke eke ke he lagi?

¹¹ Fakaako e Iesu e tau tutaki haana ke liogi ma e finagalo he Atua ke eke ke he lagi. Ko e ha? Fakaako e tautolu he Veveheaga 3 ne totoko a Satani ko e Tiapolo ki a Iehova. He mole e totoko ha Satani, ne fai magaaho ne fakaatā e Iehova a ia mo e tau agelu nakai fakamooli, po ke tau temoni, ke nonofo he lagi. Ti nakai taute e lautolu oti he lagi e finagalo he Atua. He Veveheaga 10, to fakaako atu foki a tautolu hagaao ki a Satani mo e tau temoni.

12. Ko e heigoa e ua e mena aoga ne tupu kua fakamaama he Fakakiteaga 12:10?

¹² Fakamaama he Tohi Tapu ne nakai leva he eke a Iesu mo Patuiki he Kautu he Atua, to tau a ia ki a Satani. (Totou Fakakiteaga 12:7-10.) Fakamaama he kupu 10 na ua e mena aoga lahi ne tupu. Ne kamata e Kautu he Atua ke pule ti ko Iesu Keriso e Patuiki, mo e liti hifo a Satani mai he lagi ke he lalolagi. To fakaako e tautolu kua fitā e tau mena nei he tutupu.

13. Ko e heigoa ne tupu i luga he lagi he liti hifo a Satani?

¹³ Fakamaama he Tohi Tapu nukua fiafia e tau agelu fakamooli he mole e tolo hifo a Satani mo e tau temoni haana mai he lagi. Totou e tautolu: “Kia fiafia ai a koe ko e lagi, mo mutolu kua nonofo ai.” (Fakakiteaga 12:12) Kua mafola mo e kaufakalataha katoatoa e lagi he mogonei ha kua taute e lautolu oti i ai e finagalo he Atua.

14. Ko e heigoa kua tupu ke he lalolagi ha kua liti hifo a Satani mai he lagi?

 ¹⁴ Ka kua kehe mamao e moui he lalolagi. Kelea lahi mahaki e tau mena ne tutupu ke he tau tagata “ha kua hifo [mai] e tiapolo” ti “kua ita lahi, ha kua iloa e ia kua tote hana vaha.” (Fakakiteaga 12:12) Ita lahi mahaki a Satani. Ne liti hifo a ia mai he lagi, mo e iloa e ia to nakai leva ti utakehe a ia. Kua eketaha a ia ke fakatupu e tau lekua, mamahi, mo e matematekelea ke he lalolagi katoa.

15. Ko e heigoa e finagalo he Atua ma e lalolagi?

¹⁵ Ka e nakai hiki e finagalo he Atua ma e lalolagi. Manako agaia a ia ma e tau tagata mitaki katoatoa ke momoui tukulagi he lalolagi parataiso. (Salamo 37:29) To fakahoko fēfē he Kautu he Atua e mena nei?

16, 17. Ko e heigoa kua tala mai he Tanielu 2:44 ki a tautolu hagaao ke he Kautu he Atua?

¹⁶ Pehē e perofetaaga he Tanielu 2:44: “Ko e vaha he tau patuiki ia to fakatu ai he Atua he lagi e kautu nakai fakaoti tukulagi; ko e kautu foki ia nakai tuku atu ai ke he taha motu, to tuki malipilipi mo e fakaotioti e tau kautu oti ia, ka ko ia to tumau tukulagi a ia.” Ko e heigoa kua fakaako he perofetaaga nei ki a tautolu hagaao ke he Kautu he Atua?

¹⁷ Fakamua, tala mai ai ko e Kautu he Atua to kamata ke pule he “vaha he tau patuiki ia.” Kakano e mena nei kua ha ha agaia e falu fakatufono he lalolagi he magaaho ne kamata e Kautu ke pule. Uaaki, tala mai ai ko e Kautu he Atua to tumau tukulagi ti nakai hukui he taha fakatufono. Mo e toluaki, to tau e Kautu he Atua mo e tau fakatufono he lalolagi nei. To nakai kaumahala e Kautu he Atua ti ko e fakatufono ia ni ka pule ke he  lalolagi. Mo e to moua mogoia he tau tagata e fakatufono kua mua e mitaki.

18. Ko e heigoa e higoa he tauaga fakahiku he Kautu he Atua mo e tau fakatufono he lalolagi nei?

¹⁸ Puhala fe ka pule katoatoa e Kautu he Atua ke he lalolagi? Ato hoko e tauaga fakahiku ne fakahigoa ko Amaketo, to fakahehē he tau temoni e “tau patuiki he lalolagi, mo e lalolagi oti kana, kua fakapotopoto a lautolu ke tau ke he aho lahi he Atua [“Malolō Ue Atu,” NW].” Ē, to tau atu e tau fakatufono he tagata ke he Kautu he Atua.​—Fakakiteaga 16:14, 16; kikite Tala he Matahiku 10.

19, 20. Ko e ha ne manako a tautolu ke he Kautu he Atua ke pule ke he lalolagi?

¹⁹ Ko e ha ne manako a tautolu ke he Kautu he Atua? Tolu e kakano. Fakamua, ko e tau tagata agahala a tautolu, mo e kua gagao ti mamate. Ka e pehē e Tohi Tapu, i lalo hifo he Kautu he Atua to momoui tukulagi a tautolu. Pehē e Ioane 3:16: “Pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne [fakagahuahua e] tua kia ia, ka kia moua e ia e moui tukulagi.”

²⁰ Ko e kakano ke uaaki ati manako a tautolu ke he Kautu he Atua ha kua takatakai a tautolu he tau tagata kelea. Tokologa ne pikopiko mo e nakai fakamooli ti kua mahani kelea. Nakai maeke a tautolu ke utakehe e tau mena ia, ka e maeke e Atua. Ko e tau tagata ne matutaki ke taute e tau mena kelea to utakehe i Amaketo. (Totou Salamo 37:10.) Kakano ke toluaki ati manako a tautolu ke he Kautu he Atua ha ko e tau fakatufono he tagata kua lolelole, favale, po ke matahavala. Nakai manamanatu a lautolu ke lagomatai e tau tagata ke omaoma ke he Atua.  Pehē e Tohi Tapu “kua pule ai e taha tagata ke he taha, ke kelea ai e ia ni.”​—Fakamatalaaga 8:9.

21. Ko e heigoa ka taute he Kautu ke fakahoko mooli e finagalo he Atua ke he lalolagi?

²¹ He mole a Amaketo, to eketaha e Kautu he Atua ke fakahoko mooli e finagalo he Atua ke he lalolagi. Ma e fakatai, to utakehe a Satani mo e haana tau temoni. (Fakakiteaga 20:1-3) To hoko e magaaho ti nakai fai tagata ka gagao po ke mate. Ha ko e lukutoto, to maeke e tau tagata oti ne fakamooli ke momoui tukulagi he Parataiso. (Fakakiteaga 22:1-3) To fakatapu he Kautu e higoa he Atua. Ko e heigoa e kakano he mena nei? Kakano ai ko e magaaho ka pule e fakatufono he Atua ke he lalolagi, to fakaheke he tau tagata oti kana e higoa ha Iehova.​—Kikite Tala he Matahiku 20.

22. Iloa fēfē e tautolu ne nakai Patuiki a Iesu he nofo he lalolagi po ke he magaaho ia ni ne fakaliu tu mai a ia?

²² Fakaako e Iesu e tau tutaki haana ke liogi: “Kia hoko mai hau a kautu.” Ti kitia maaliali ai ko e fakatufono he Atua to hoko mai he vahā i mua. To fakatū fakamua e Iehova e fakatufono haana mo e eke a Iesu mo Patuiki. Ti eke kia a Iesu mo Patuiki he magaaho ia  ni ne liu atu ke he lagi? Nakai, ne lata a ia ke fakatali. Fai magaaho he mole e liu tu mai ha Iesu, fakakite fakamaali e Peteru mo Paulo e mena nei he fakaaoga e laua e perofetaaga he Salamo 110:1 ke hagaao ki a Iesu. He perofetaaga ne pehē a Iehova: “Kia nofo a koe ke he haku a lima matau, ato eke e au a lautolu kua fai fi kia koe mo fakatuaga hui hāu.” (Gahua 2:32-35; Heperu 10:12, 13) Fiha e leva ka fakatali a Iesu ato eke e Iehova a ia mo Patuiki?

23. (a) Magaaho fe ne kamata a Iesu ke pule ko e Patuiki he fakatufono he Atua? (e) Ko e heigoa ha tautolu ka fakaako he veveheaga ka mui mai?

²³ Ke he loga e tau tau ato hoko ke he 1914, ko e matakau he tau Kerisiano fakamooli ne iloa to aoga lahi e tau ia he perofetaaga he Tohi Tapu. Kua fakakite he tau mena tutupu he lalolagi tali mai he 1914 kua hako a lautolu. Ne kamata a Iesu ke pule ko e Patuiki he tau ia. (Salamo 110:2) Nakai leva ai, ne liti hifo a Satani ke he lalolagi, ti mogonei “kua tote hana vaha.” (Fakakiteaga 12:12) He veveheaga ka mui mai, to kitia e tautolu falu fakamooliaga kua nonofo a tautolu he magahala ia. To fakaako foki a tautolu to nakai leva ti eketaha e Kautu he Atua ke fakahoko mooli e finagalo he Atua ke he lalolagi.​—Kikite Tala he Matahiku 21.