1. Ko hai ne tufugatia e tau mena momoui oti kana?

“KO IEHOVA ko e Atua moli,” he talahau he perofeta ko Ieremia. “Ko ia ni ko e Atua moui.” (Ieremia 10:10) Lafi ki ai, ko Iehova ko e Atua e Tufuga he tau mena momoui oti kana. Ne tala age e tau mena moui he lagi ki a ia: “Kua eke e koe e tau mena oti, ha ko e hau a finagalo foki ne ha ha i ai a lautolu; mo e eke ai a lautolu.” (Fakakiteaga 4:11) He lologo fakaheke ke he Atua, ne talahau e Patuiki ko Tavita: “Ko e mena ha ha ia koe e puna he moui.” (Salamo 36:9) Ti, ko e moui ko e mena fakaalofa mai he Atua.

2. Ko e heigoa ne taute he Atua ke fakatumau aki e tau momoui ha tautolu?

² Kua leveki foki e Iehova e tau momoui ha tautolu. (Gahua 17:28) Ne foaki e ia e tau mena kai ne kai e tautolu, vai ne inu e tautolu, ko e matagi ne fafagu e tautolu, mo e fuga kelekele ne nonofo ai a tautolu. (Totou Gahua 14:15-17.) Kua taute e Iehova e mena nei ke he puhala ke fiafia e tau momoui. Ka e ke fiafia katoatoa e moui, kua lata ia tautolu ke ako hagaao ke he tau fakatufono he Atua mo e omaoma ki ai.—Isaia 48:17, 18.

3. Fēfē e onoonoaga he Atua ke he kelipopo ha Apelu?

³ Kua manako e Atua ki a tautolu ke fakalilifu e moui—ko e moui ha tautolu mo e he falu. Ke fakatai, he vahā i tuai ha  Atamu mo Eva, ne ita lahi ha laua a tama taane ko Kaino ke he tehina haana ko Apelu. Ne hataki e Iehova a Kaino to takitaki atu e ita haana ke he hala kelea lahi. Ne fakaheu e Kaino e hataki ia. Ne “oho atu ai a Kaino kia Apelu hana matakainaga, mo e kelipopo a ia.” (Kenese 4:3-8) Ne fakahala e Iehova a Kaino he kelipopo e matakainaga haana.—Kenese 4:9-11.

4. He Fakatufono faka-Mose, peehi fēfē he Atua e onoonoaga tonu ke he moui?

⁴ He tau tau afe fakamui, ne foaki e Iehova ke he tau tagata Isaraela e tau fakatufono ke lagomatai a lautolu ke fekafekau fakamitaki ki a ia. Ha kua foaki e tau fakatufono nei puhala he perofeta ko Mose, ne ui ai he falu magaaho ko e Fakatufono faka-Mose. Ne talahau he taha vala he Fakatufono faka-Mose: “Aua neke kelipopo tagata a koe.” (Teutaronome 5:17) Ne fakakite he mena nei ke he tau Isaraela kua fakalilifu he Atua e moui he tagata ti lata ia lautolu ke fakalilifu e tau momoui he falu.

5. Lata ke fēfē e onoonoaga ha tautolu ke he fakatotama?

⁵ Ka e kua e moui he tama nakaila fanau? Hagaao ke he Fakatufono faka-Mose, kua hepe ke fakatupu e mate he tama muke i loto he manava he matua fifine. Ē, kua uho foki e moui pihia ki a Iehova. (Totou Esoto 21:22, 23; Salamo 127:3.) Kakano ai kua hepe e fakatotama.

6. Ko e ha kua nakai lata ia tautolu ke vihiatia e katofia ha tautolu?

⁶ He fakalilifu e moui kua lata foki ke moua e onoonoaga kua hako ke he tau katofia tagata. Ne pehē e Tohi Tapu: “Ko lautolu oti kua vihiatia e tau matakainaga ha lautolu, ko e tau tagata kelipopo tagata a lautolu; kua iloa foki e mutolu ko lautolu oti kua kelipopo tagata kua nakai toka mau ia lautolu e moui tukulagi.” (1 Ioane 3:15) Kaeke manako a tautolu ke moua e moui tukulagi, kua lata ia tautolu ke huo kehe he tau loto ha tautolu ha vihiatia ma e katofia ha tautolu, ha ko e vihiatia ne puna mai e laulahi he tau aga vale. (1 Ioane 3:11, 12) Kua aoga lahi ke ako a tautolu ke fefakaalofaaki.

7. Ko e heigoa falu mahani ne fakakite e nakai fakalilifu ma e moui?

⁷ Ka e kua he fakakite e fakalilifu ma e moui ni ha tautolu? Kua nakai manako pauaki e tau tagata ke mamate, ka e  fakahagahagakelea he falu e tau momoui ha lautolu ke moua e fiafia. Ke fakatai, tokologa ne fakaaoga e tapaka, gau e tau fua pitolo, po ke fakaaoga e tau tulaki ma e tau fakafiafiaaga. Kua fakahagahagakelea he tau mena pihia e tino mo e fa tamate ai a lautolu ne fakaaoga. Ko e tagata ne fa fakaaoga tumau e tau mena nei kua nakai onoono ke he moui ko e mena fakatapu. Kua nakai meā e tau mahani nei ke he fofoga he Atua. (Totou Roma 6:19; 12:1; 2 Korinito 7:1.) Ke fekafekau fakamitaki ke he Atua, kua lata ia tautolu ke tiaki e tau mahani pihia, pete ni kua liga uka lahi ke tiaki. Kua maeke ia Iehova ke foaki ki a tautolu e lagomatai kua lata, ti fakaaue a ia ke he laliaga ha tautolu ne taute ke fakalilifu e moui ko e mena fakaalofa uho mai ia ia.

8. Ko e ha kua lata ia tautolu ke manamanatu tumau ke he haohao mitaki?

⁸ Kaeke kua fakalilifu e tautolu e moui, to manamanatu tumau a tautolu ke he haohao mitaki. To nakai fakahanoa a tautolu mo e taute e tau mena hagahagakelea ke moua aki e fakafiafiaaga. To kalo kehe a tautolu he fakaholo fakahanoa mo e he tau sipote vale po ke hagahagakelea. (Salamo 11:5) Ne tohi he Fakatufono he Atua ma Isaraela i tuai: “Ka ta ai e koe e fale fou [ne ha i ai e tua fale lautatai], ti eke e koe e pa ke puipui aki takai hau a tua fale ki luga, neke fakamaligi ai e toto ha ko e fale hau, ka to hifo ai taha.” (Teutaronome 22:8) Ke felauaki mo e tau matapatu fakaakoaga ne fakatoka he matafakatufono ia, lata ke taute fakamitaki e tau mena tuga e tau sitepe he kaina haau kua mau ai neke taututupe, veli, ti pakia lahi e taha tagata. Ka fai motokā a koe, kia tauteute ke mau mitaki ke fakaholo. Kia nakai toka e kaina po ke motokā haau ke fakahagahagakelea aki a koe po ke falu.

9. Kaeke fakalilifu e tautolu e moui, to fehagai fēfē a tautolu mo e tau manu huifā?

⁹ Ka e kua e moui he manu huifā? Kua tapu foki e moui ha lautolu ke he Tufuga. Ne fakaatā he Atua ke tamate e tau manu ma e tau mena kai mo e tau mena tui po ke puipui e tau tagata mai he hagahagakelea. (Kenese 3:21; 9:3; Esoto 21:28) Pete ia, kua hepe ke favale ke he tau manu po ke tamate noa a lautolu  ma e sipote ti kua fakakite he mena ia e fakateaga ma e fakatapuaga he moui.—Tau Fakatai 12:10.

10. Fakakite fēfē he Atua kua ha ha ai e matutakiaga he moui mo e toto?

¹⁰ He mole e kelipopo e Kaino e tehina haana ko Apelu, ne tala age a Iehova ki a Kaino: “Ko e leo he toto he matakainaga hau, kua tagi mai ia kia au mai he kelekele.” (Kenese 4:10) He vagahau e Atua hagaao ke he toto ha Apelu, kua vagahau a ia hagaao ke he moui ha Apelu. Ne tamate e Kaino a Apelu, ti kua lata a Kaino mogonei ke fakahala. Ti tuga ko e toto ha Apelu, po ke moui, kua tagi ki a Iehova ma e fakafili tonu. Ko e matutakiaga he vahāloto he moui mo e toto kua liu fakakite he mole e Fakapuke he vahā ha Noa. Fakamua to Fakapuke, kua kai ni e tau tagata he tau fua lakau, tau laukou kai, tau fua saito, mo e tau tega akau. He mole e Fakapuke, ne tala age a Iehova ki a Noa mo e fanau taane haana: “Ko e tau mena momoui oti kua o fano, to eke ia mo mena kai ma mutolu.” Pete ia, ne taute he Atua e fakakaupāaga nei: “Ko e kakano manu ha i ai hana moui, ko e hana toto haia, aua neke kai ai e mutolu.” (Kenese 1:29; 9:3, 4) Kitia maali ai, ne fakakite e Iehova e matutakiaga tata lahi he moui mo e toto he tau mena momoui.

11. Ko e heigoa e fakaaogaaga he toto ne fakatapu he Atua tali mai he vahā ha Noa?

¹¹ Kua fakakite e tautolu e fakalilifu ke he toto he nakai kai ai. He Fakatufono ne foaki e Iehova ke he tau Isaraela, ne poaki e ia: “Ko e tagata foki he fanau a Isaraela . . . ka moua e ia e manu he vao he tutuli, po ke manu lele kua kai; kia liligi ai e ia hana toto, mo e ufiufi ai ke he kelekele. . . . Ne pehe atu ai au ke he fanau a Isaraela, Aua neke kai e mutolu e toto he tau mena momoui.” (Levitika 17:13, 14) Ko e poaki he Atua ke nakai kai e toto he manu, ne foaki fakamua ki a Noa he kavi ke 800 tau fakamua atu, ne gahuahua agaia. Kua mahino ai e onoonoaga ha Iehova: Maeke he tau fekafekau haana ke kai e kakano he manu ka e nakai ko e toto. Lata ai ia lautolu ke liligi e toto ke he kelekele—ke tuga, kua liuaki e moui he mena moui ke he Atua.

12. Ko e heigoa e poaki hagaao ke he toto ne foaki he agaaga tapu he senetenari fakamua ti kua gahuahua agaia he vahā nei?

 ¹² Kua pihia foki e poakiaga ke he tau Kerisiano. Ne fakalataha auloa e tau aposetolo mo e falu tagata taane ne takitaki e tau tutaki ha Iesu he senetenari fakamua ke fifili ko e tau poaki fe ne kua lata ke omaoma e lautolu oti he tau fakapotopotoaga Kerisiano. Ne hohoko a lautolu ke he fakahikuaga nei: “Ko e mena kua mitaki ke he [a]gaga [t]apu mo mautolu nai, aua neke tuku atu taha kavega kia mutolu, ko e tau mena nai hokoia ke lata; kia fakamamao a mutolu mo e tau mena kua ekepoa ai ke he tau tupua, mo e toto, mo e tau mena fofota [nakai fakatafe e toto], mo e feuaki.” (Gahua 15:28, 29; 21:25) Ti kua lata ia tautolu ke ‘fakamamao mai he toto.’ Ke he fofoga he Atua, ka taute e tautolu e mena ia kua aoga ai ke tuga ni e kalo kehe a tautolu mai he tapuaki tupua mo e mahani feuaki.

13. Fakataitai e kakano he poaki ke fakamamao mai he toto kua putoia foki e fagai toto.

¹³ Ko e poaki ke fakamamao mai he toto kua putoia foki kia e fagai toto? Ē. Ke fakataitai: Liga tala atu e toketā ki a koe ke fakamamao mai he kava. Kua kakano kia e mena ia kua nakai lata ia koe ke inu kava ka e maeke ia koe ke huki ai ki loto he tau hokohoko haau? Nakai pihia! Ti, ko e kakano ke fakamamao mai he toto ke nakai uta ki loto he tau tino ha tautolu he ha puhala ni. Ti ko e poaki ke fakamamao mai he toto kua kakano ke nakai fakaatā ha tagata ke huki e toto ki loto he tau hokohoko ha tautolu.

14, 15. Kaeke talahau e tau toketā kua lata ke fagai toto e Kerisiano, to liga fēfē e tali haau, mo e ko e ha?

¹⁴ Ka e kua ka pakia lahi e Kerisiano po kua lata ke iihi lahi? Ne tala age fakalata e tau toketā kua lata a ia ke fagai toto neke mate. Mooli, kua nakai manako e Kerisiano ke mate. He lali ke puipui e mena fakaalofa uho he Atua ko e moui, to talia e ia e falu tuluiaga ne nakai putoia ki ai e fakaaoga hehē he toto. Ti, to kumi a ia ke he tau puhala fakaekekafo pihia kaeke kua fai mo e to talia e tau vai tului kehekehe ne nakai ha i ai e toto.

¹⁵ To moumou kia he Kerisiano e fakatufono he Atua ke fakaloa fakatote aki e moui haana he fakatokaaga nei? Ne pehē  a Iesu: “Ko ia ne fia kuku hana moui, to moumou ai kia ia; ka ko ia ke moumou hana moui ha ko au, to moua ai e ia.” (Mataio 16:25) Kua nakai manako a tautolu ke mamate. Ka e, kaeke lali a tautolu ke fakahao e tau momoui ha tautolu he vahā nei he moumou e matafakatufono he Atua, to liga nakai moua e tautolu e moui tukulagi. Ti kua pulotu a tautolu ke falanaki ke he hakotika he matafakatufono he Atua, katoa mo e mauokafua katoatoa kaeke mamate a tautolu ha ko e ha kakano ni, to manatu he Foaki Moui a tautolu ke he liu tu mai mo e liuaki mai ki a tautolu e mena fakaalofa uho he moui.—Ioane 5:28, 29; Heperu 11:6.

16. Ko e heigoa e fifiliaga mauokafua he tau fekafekau he Atua hagaao ke he toto?

¹⁶ He vahā nei, kua fifili mauokafua e tau fekafekau tua fakamooli he Atua ke mumuitua ke he hatakiaga haana hagaao ke he toto. To nakai kai ai e lautolu ke he ha puhala ni. Mo e to nakai talia e lautolu e toto ma e tau kakano fakaekekafo. * Kua mauokafua a lautolu kua iloa he Tufuga he toto e mena mitaki ma lautolu. Talitonu nakai a koe kua iloa mooli e ia?

17. I Isaraela i tuai, ko e heigoa e fakaaoga tonu hokoia he toto ne talia e Iehova ko e Atua?

¹⁷ Kua peehi he Fakatufono faka-Mose kua taha ni e puhala tonu ke fakaaoga e toto. Hagaao ke he tapuakiaga ne lata ke he  tau Isaraela i tuai, ne poaki e Iehova: “Ko e toto ko e moui he tino haia, kua tuku atu foki e au ia ke eke mo lukutoto ma mutolu ki luga he fatapoa; ha ko e toto ni ke eke mo lukutoto ma e tagata.” (Levitika 17:11) He magaaho ne hala e tau Isaraela, kua maeke ia lautolu ke moua e fakamagaloaga he poa e manu mo e uta taha vala toto ke tuku i luga he fatapoa he fale utafano po ke he faituga he Atua he magaaho fakamui. Ko e puhala tonu hokoia a ia ke fakaaoga e toto ke he tau poa pihia.

18. Ko e heigoa e tau aoga mo e tau monuina kua maeke ia tautolu ke moua mai he fakamaligi e toto ha Iesu?

¹⁸ Kua nakai ha ha e tau Kerisiano mooli i lalo he Fakatufono faka-Mose ti kua nakai lata ke poa e tau manu mo e tuku e toto he tau manu he fatapoa. (Heperu 10:1) Ka e, he fakaaoga e toto i luga he fatapoa he vahā a Isaraela i tuai kua takitaki atu ke he poa uho he Tama he Atua, ko Iesu Keriso. He ako e tautolu he Veveheaga 5 he tohi nei, ne foaki e Iesu e moui tagata haana ma tautolu he fakamaligi haana toto ke eke mo poa. Ti haele  hake a ia ke he lagi mo e foaki lagataha e uho he toto fakamaligi haana ke he Atua. (Heperu 9:11, 12) Kua fakatoka he mena ia e fakavēaga ke fakamagalo e tau hala ha tautolu mo e hafagi e puhala ma tautolu ke moua e moui tukulagi. (Mataio 20:28; Ioane 3:16) Kua aoga lahi ha e fakaaogaaga ia he toto! (1 Peteru 1:18, 19) Ko e tua ni ke he uho he toto fakamaligi ha Iesu ne kua maeke ia tautolu ke moua e fakamouiaga.

19. Ko e heigoa kua lata ia tautolu ke taute ke ‘mea mai he toto he tau tagata oti’?

¹⁹ Kua lata ia tautolu ke loto fakaaue ki a Iehova ko e Atua ma e foakiaga fakaalofa he moui! Ti kua nakai kia fakaohooho he mena ia a tautolu ke talatala atu ke he falu hagaao ke he amaamanakiaga ke moua e moui tukulagi ne fakavē he tua ke he poa ha Iesu? Ko e manamanatu mahani Atua ma e tau momoui he tau katofia ka omoi a tautolu ke taute fakamakai mo e fakamakutu e mena nei. (Totou Esekielu 3:17-21.) Kaeke ke fakakatoatoa fakailoilo e tautolu e matagahua nei, to maeke ia tautolu ke talahau, ke tuga e aposetolo ko Paulo: “Kua mea na au he toto he tau tagata oti. Ha ko e mena kua nakai toka e au taha kupu, neke nakai fakailoa atu kia mutolu e finagalo oti he Atua.” (Gahua 20:26, 27) He talatala atu ke he tau tagata hagaao ke he Atua mo e tau finagalo haana ko e puhala ne mua atu e mitaki a ia ke fakakite kua fakalilifu lahi e tautolu e moui mo e toto.