FAKAAKOAGA 22
Fakamatala Fēfē e Koe e Tala Mitaki?
He fakaako e koe e tau kupu mooli he Tohi Tapu liga manatu a koe, ‘Lata e tau tagata oti ke iloa e mena nei!’ Ti lata mooli e tau tagata oti ke iloa ai! Ka e liga hopoate a koe ke tala age ke he falu e tau mena haau ne fakaako. To fakatutala a tautolu ke he puhala ka kautū a koe mai he hopoate mo e kamata ke fiafia he fakamatala e tala mitaki he Tohi Tapu.
1. Fakamatala fēfē e koe e tau mena haau ne fakaako ke he tau tagata ne iloa e koe?
Pehē e tau tutaki ha Iesu: “Ha kua nakai maeke ke fakamamate a maua ke he tau mena ne kitia e maua, mo e fanogonogo a maua ki ai.” (Gahua 4:20) Uho lahi ke he tau tutaki e kupu mooli ti manako a lautolu ke tala age ke he tau tagata oti. Pihia foki nakai e logonaaga haau? Ka pihia, kumi e magaaho ke tala age fakalilifu ke he magafaoa mo e tau kapitiga e tau mena ne fakaako e koe.—Totou Kolose 4:6.
Falu puhala ke kamata
-
He tutala mo e magafaoa, kamata aki e matakupu Tohi Tapu he pehē: “Fai mena atihake au ne fakaako he faahi tapu nei.”
-
Talahau e kupu Tohi Tapu mafanatia ke he kapitiga kua gagao po ke tupetupe.
-
Tala age ke he tau kapitiga gahua ne hūhū hagaao ke he faahi tapu haau e tau mena ne iloa e koe he fakaako Tohi Tapu po ke he fakapotopotoaga.
-
Fakakite ke he tau kapitiga haau e faahi kupega hila jw.org.
-
Uiina e falu ke nonofo mo koe he fakaako Tohi Tapu haau, po ke fakakite age e puhala ke ole ma e fakaako Tohi Tapu he jw.org.
2. Ko e ha e fakamatala mo e fakapotopotoaga ko e foliaga aoga lahi?
Lahi atu e gahua he tau tutaki ha Iesu he nakai fakamatala ni e tala mitaki ke he tau tagata ne iloa e lautolu. Ko Iesu ne “fakafano atu a lautolu ke takitokoua, ke mumua kia ia ke he tau māga” ke fakamatala. (Luka 10:1) Ko e puhala ia ne fakatokatoka aki e gahua fakamatala ati tokologa e tau tagata ne logona e tala mitaki. He fakamatala auloa ne lahi foki e fiafia he tau tutaki. (Luka 10:17) Maeke foki nakai a koe ke taute mo foliaga ke fakamatala mo e fakapotopotoaga?
KUMIKUMI FAKAHOKULO
Manamanatu ke he puhala ka kautū a koe he hopoate mo e moua e fiafia he fakamatala e tala mitaki.
3. To fakalataha a Iehova mo koe
Falu kua manako ke fakamatala ka e hopoate he puhala ka onoono age e tau tagata po ke nakai fiafia ki ai.
-
Hopoate kia a koe ke tala age e tau mena haau ne fakaako? Ko e ha ne manatu pihia a koe, po ke ko e ha ne nakai manatu pihia a koe?
Tā e VITIŌ, ti tutala ke he hūhū nā.
-
Kautū fēfē e tau fuata Fakamoli nei mai he matakutaku ha lautolu?
Totou Isaia 41:10, ti tutala ke he hūhū nei:
-
Ka matakutaku a koe ke fakamatala, to lagomatai fēfē he liogi a koe?
Iloa nakai e koe?
Tokologa e Tau Fakamoli a Iehova ne manatu fakamua to nakai fakaai a lautolu ke fakamatala e tala mitaki. Ma e fakatai, ko Sergey ne logona hifo kua nakai aoga a ia ti uka ke tutala. Ka e fakaako e ia e Tohi Tapu. Pehē a ia: “Pete he matakutaku, kamata au ke tutala ke he falu ke he tau mena haaku ne fakaako. Ofo lahi au, ko e tutala ke he falu ke he Tohi Tapu kua fakaholo ki mua mooli e mauokafua haaku. He tutala ke he falu hagaao ke he tau taofiaga haaku kua fakamalolō e tua ni haaku.”
4. Kia fakalilifu
Ka fakamatala e tala mitaki, manamanatu ke he tau mena ka talahau mo e puhala ke talahau ai. Totou 2 Timoteo 2:24 mo e Tito 3:2, ti tutala ke he tau hūhū nei:
-
Fakagahua fēfē e koe e tau kupu nei ka tutala ke he falu hagaao ke he Tohi Tapu?
-
Falu tagata he magafaoa po ke tau kapitiga to liga nakai talia. Ko e heigoa haau ka taute? Ko e heigoa haau kua nakai lata ke taute?
-
Ko e ha kua mitaki ke fakaaoga e tau hūhū fakailoilo ka e nakai peehi fakamalolō ke talitonu a lautolu?
5. Moua e fiafia he fakamatala e tala mitaki
Tuku age e Iehova ki a Iesu e gahua ke fakamatala e tala mitaki. Fēfē e onoonoaga ha Iesu ke he gahua ia? Totou Ioane 4:34, ti tutala ke he tau hūhū nei:
-
Momoui a tautolu mo e fiafia he kai e tau mena kai mitaki. Ko e ha ne fakatatai e Iesu e taute he finagalo he Atua, putoia e fakamatala he tala mitaki ke he kai?
-
He manatu haau, ko e heigoa e fiafia ka moua he fakamatala e tala mitaki?
Tau puhala
-
He feleveiaaga he vahā tapu, kumi puhala ke kamata e fakatutala.
-
Manamanatu ke hū he aoga he feleveiaaga he vahā tapu. He fai kotofaaga, to lagomatai a koe ke mautauteute ke tala age ke he falu e tau mena haau kua fakaako.
-
Fakaaoga e tau vala “Pehē Falu Tagata” po ke “Ka Hūhū Taha Tagata” he tohi nei ke fakamahani ke tali e tau hūhū mo e tau totokoaga fa mahani.
KA HŪHŪ TAHA TAGATA: “Ko e heigoa e mena foou ne tupu ki a koe mogonei?”
-
Fakaaoga fēfē e koe e magaaho nei ke tala age ke he tagata hagaao ke he tau mena haau ne iloa he fakaako e Tohi Tapu?
MANATU KATOA
Moua e fiafia he fakamatala e tala mitaki ke he falu, ti kua mukamuka ke kamata ai.
Liu Fakamanatu
-
Ko e ha ne tala age e tala mitaki ke he falu?
-
Maeke fēfē a koe ke taute ai he puhala fakalilifu?
-
Kautū fēfē a koe he hopoate ke fakamatala?
KUMI FOKI
Manamanatu ke he fā e puhala mukamuka ka tala age e koe e tala mitaki he fakaaoga e laupepa matutaki jw.org.
Tau Fakafeleveiaaga Fakataitai he Laupepa Matutaki JW.ORG (1:43)
Fakaako ke he fā e mahani ka lagomatai a koe ke fakamatala e tala mitaki.
“Mautali Nakai a Koe ke Eke mo Tagata Takafaga?” (Ko e Kolo Toko, Sepetema 2020)
Kitekite ke he puhala ka foaki mai he fakafifitakiaga he Tohi Tapu e loto malolō ke fakamatala e tala mitaki, pete he ikiiki a tautolu.
Kumikumi ke he puhala ka tutala a koe ke he Tohi Tapu mo e tau magafaoa ne nakaila fakaako hagaao ki a Iehova.
“Hokotia ke he Tau Loto he Tau Magafaoa Nakai Talitonu” (Ko e Kolo Toko, Mati 15, 2014)
Liga Manako Foki a Koe
TAU HŪHŪ MAHANI MAU
Ko e Heigoa e Fakaakoaga Tohi Tapu ne Foaki he Tau Fakamoli a Iehova?
He fakaholoaga fetutalaaki ne foaki he Tau Fakamoli a Iehova kua nakai totogi, maeke a koe ke fakaaoga ha Tohi Tapu. Atāina ke uiina e magafaoa katoa po ke tau kapitiga ke fakalataha mo koe.
