Ko Iesu ko e Ulu he fakapotopotoaga Kerisiano. (Efeso 5:23) Mai he tuaga ha Iesu mogonei he lagi, kua takitaki e ia e tau tutaki haana he lalolagi he puhala he “fekafekau fakamoli mo e loto matala.” (Totou Mataio 24:45.) Ha ko Iesu ne age e kotofa, kua maeke e “fekafekau” ia ke taute e falu fifiliaga ka e tumau ni ko e fekafekau he Keriso mo e leveki e tau matakainaga he Keriso. Ko hai e fekafekau? Leveki fēfē he fekafekau a tautolu?

1. Ko hai e “fekafekau fakamoli mo e loto matala”?

Fakaaoga tumau e Iehova e taha tagata taane po ke matakau tote he tau tagata taane ke tala age e poakiaga ke he tau tagata haana. (Malaki 2:7; Heperu 1:1) He mole e mate ha Iesu, ko e tau aposetolo mo e tau patu i Ierusalema ne takitaki. (Gahua 15:2) He muitua e puhala ia, ko e matakau tote mogonei he tau motua, ko e Kau Fakatufono he Tau Fakamoli a Iehova kua foaki e tau mena kai fakaagaaga mo e takitaki e gahua fakamatala. Ko e matakau nei ko e “fekafekau fakamoli mo e loto matala, kua kotofa [e Iesu].” (Mataio 24:45a) Ko e tau matakainaga oti he Kau Fakatufono ko e tau Kerisiano kua fakauku he agaaga, ti amanaki a lautolu ke pule fakalataha mo e Keriso he Kautu he lagi ka oti e momoui ha lautolu he lalolagi.

2. Ko e heigoa e tau mena kai fakaagaaga ne foaki mai he fekafekau fakamoli?

Pehē a Iesu ko e fekafekau fakamoli ka “age [ke he tau Kerisiano] e tau mena kai ke he tau magaaho [tonu].” (Mataio 24:45e) Tuga e tau mena ne kai e tautolu kua lagomatai a tautolu ke hakahakau mo e tino malolō, ko e tau mena kai fakaagaaga​—tau fakaakoaga mai he Kupu he Atua​—kua fakamalolō a tautolu ke fakatumau e mahani fakamooli ki a Iehova mo e taute e gahua ne kotofa e Iesu a tautolu ke taute. (1 Timoteo 4:6) Moua e tautolu e tau mena kai fakaagaaga ia puhala he tau feleveiaaga, tau toloaga, tau fonoaga, tau tohi ne fakavē ke he Tohi Tapu mo e tau vitiō ka lagomatai a tautolu ke maama e finagalo he Atua mo e ke fakamalolō e fakafetuiaga ha tautolu mo ia.

 KUMIKUMI FAKAHOKULO

3. Lata e tau tagata ha Iehova ke fakatokatoka

I lalo he takitakiaga ha Iesu, fakatokatoka he Kau Fakatufono e gahua he Tau Fakamoli a Iehova. Pihia foki e fakaholoaga he tau Kerisiano fakamua atu. Tā e VITIŌ.

Totou 1 Korinito 14:33, 40, ti tutala ke he hūhū nei:

• Fakakite fēfē he tau kupu nei kua manako a Iehova ke he Tau Fakamoli haana ke fakatokatoka?

4. Fakatokatoka he fekafekau fakamoli e gahua fakamatala ha tautolu

Ko e fakamatala e gahua ne mua e aoga ne taute he tau Kerisiano fakamua atu. Totou Gahua 8:14, 25, ti tutala ke he tau hūhū nei:

• He tau Kerisiano fakamua atu, ko hai ne takitaki e gahua fakamatala?

• Tali atu fēfē a Peteru mo Ioane ke he takitakiaga he tau aposetolo?

Ko e fakamatala e gahua ne mua e aoga ne fakatokatoka he Kau Fakatufono. Tā e VITIŌ.

 Fakamaama e Iesu e kakano uho he gahua fakamatala. Totou Mareko 13:10, ti tutala ke he tau hūhū nei:

• Ko e ha e gahua fakamatala ne aoga lahi ke he Kau Fakatufono?

• Ko e ha kua lata e “fekafekau fakamoli mo e loto matala” ke fakatokatoka e gahua nei he lalolagi katoa?

5. Foaki he fekafekau fakamoli e takitakiaga

Foaki he Kau Fakatufono e takitakiaga ma e tau Kerisiano he lalolagi katoa. Ko e heigoa e tau fakatonuaga kua fifili e lautolu ke fakatoka mai? Manamanatu ke he puhala ne taute pihia he kau fakatufono he tau Kerisiano fakamua atu. Totou Gahua 15:1, 2, ti tutala ke he tau hūhū nei:

• Ko e heigoa e matakupu ati taufetoko e falu Kerisiano fakamua atu?

• Ko hai ne o atu ki ai a Paulo, Panapa, mo e falu ke maeke ke fakamafola e matakupu?

Totou Gahua 15:12-18, 23-29, ti tutala ke he hūhū nei:

• Ato taute e fifiliaga, ko e heigoa he kau fakatufono fakamua atu ne taute he kumi e takitakiaga he Atua ke he matakupu?​—Kikite e kupu 12, 15, mo e 28.

Totou Gahua 15:30, 31 mo e 16:4, 5, ti tutala ke he tau hūhū nei:

• Tali atu fēfē e tau Kerisiano fakamua atu ke he takitakiaga he kau fakatufono?

• Fakamonuina fēfē e Iehova e omaoma ha lautolu?

Totou 2 Timoteo 3:16 mo e Iakopo 1:5, ti tutala ke he hūhū nei:

• Moua mai i fe he Kau Fakatufono e takitakiaga ka taute e tau fifiliaga mogonei?

 MANATU KATOA

Ko e Kau Fakatufono ko e “fekafekau fakamoli mo e loto matala” ne kotofa he Keriso. Kua foaki mai he Kau Fakatufono e takitakiaga mo e tau mena kai fakaagaaga ke he tau Kerisiano he lalolagi katoa.

Liu Fakamanatu

• Ko hai ne kotofa e “fekafekau fakamoli mo e loto matala”?

• Leveki fēfē he Kau Fakatufono a tautolu?

• Talitonu nakai a koe ko e Kau Fakatufono e “fekafekau fakamoli mo e loto matala”?