Kua fakamaama he Tohi Tapu ua e vahega he tau tagata taane Kerisiano kua leveki e tau matagahua he fakapotopotoaga. Ti hagaao e Tau Fakamoli a Iehova ki a lautolu ko e “tau leveki” mo e “tau fekafekau lagomatai.” (Filipi 1:1, NW) Tokologa e matakainaga taane pihia kua fekafekau he tau fakapotopotoaga takitaha. Ko e heigoa e gahua kua taute he tau fekafekau lagomatai ke aoga ai a mautolu?

Lagomatai e lautolu e kau he tau motua. Ko e tau fekafekau lagomatai kua loto fakaagaaga, falanaki, mo e tau tagata gahua mitaki, falu ia lautolu ne fuata, mo e falu ne momotua. Leveki a lautolu ke he tau mena kua aoga ka e ha ha i ai foki e fakaholoaga he fakatokatokaaga mo e tau matagahua kua latatonu ke taute he fakapotopotoaga. Kua fakaatā he mena nei e tau motua ke hagaaki he fakaako atu mo e tau matagahua leveki.

Taute e lautolu e tau matagahua aoga. Falu he tau fekafekau lagomatai kua kotofa ko e tau matakainaga leveki ke fakafeleveia e tau tagata oti kua o mai ke he tau feleveiaaga. Falu ne liga leveki e tau matini ke he tau leo fakatagi, tufa he tau tohi, levekiaga he tau tupe he fakapotopotoaga, mo e foaki age e tau matakavi ke he tau tagata he fakapotopotoaga ke fakamatala. Kua lagomatai foki a lautolu ke he levekiaga he Fale he Kautu. Maeke e tau motua ke ole ki a lautolu ke lagomatai a lautolu kua fuakau. Ko e heigoa ni e tau matagahua ne kua age ke he tau fekafekau lagomatai, ko e makai ha lautolu ke taute e tau mena nei kua moua e lautolu e fakalilifu he falu.—1 Timoteo 3:13.

Fakatoka e lautolu e fifitakiaga mitaki ko e tau tagata taane Kerisiano. Ko e tau fekafekau lagomatai kua fifili ma e tau mahani fakaagaaga mitaki ha lautolu. Ka taute e lautolu e tau vala he tau feleveiaaga, kua fakamalolō e lautolu e tua ha mautolu. He takitaki e gahua fakamatala, kua fakalagalaga e lautolu e fakamakutu ha mautolu. Ha ko e aga kaufakalataha ha lautolu, kua fakatupu ki mua e lautolu e olioli mo e kaufakalatahaaga. (Efeso 4:16) Fai magaaho, kua liga lotomatala foki a lautolu ke fekafekau ke eke mo tau motua.

• Ko e vahega tagata taane fēfē e tau fekafekau lagomatai?

• Lagomatai fēfē he tau fekafekau e fakapotopotoaga ke gahuahua mitaki?