Kua fai laliaga ke taute kapitiga; kua fai laliaga ke fakatumau e kapitiga. Ko e laliaga hau ke taute mo e fakatumau e kapitiga mo e Atua to fakamonuina lahi. Ne tala age a Iesu ki a lautolu kua talitonu ki a ia: “Ko e mena moli foki ke toka noa ai a mutolu.” (Ioane 8:32) Ko e heigoa e kakano he mena ia?

Maeke ia koe ke olioli e tokanoaaga mogonei. Maeke ia koe ke tokanoa mai he tau fakaakoaga fakavai mo e tau pikopiko ne kua fakaholofa e Satani. Maeke ia koe ke tokanoa mai he nakai fai amaamanakiaga ne kua fakapuke aki e tau momoui he tau tagata miliona ne nakai iloa a Iehova. (Roma 8:22) Kua tokanoa mai foki e tau kapitiga he Atua he “matakutaku ke he mate.”—Heperu 2:14, 15.

Maeke ia koe ke olioli e tokanoaaga he lalolagi fou he Atua. Ko e tokanoaaga homo ue atu ha ia ke olioli e koe he vaha anoiha! He lalolagi Parataiso, to ha ha ai e tokanoaaga mai he felakutaki, gagao, mo e matahavala. Tokanoaaga mai he mativa mo e hoge. Tokanoaaga mai he fuakau mo e mate. Tokanoaaga mai he matakutaku, tupetupe, mo e nakai fakafili tonu. Kua talahau mai e Tohi Tapu hagaao ke he Atua: “Kua fakamafola e koe hāu a lima, mo e fakamakona e manako he tau mena momoui oti.”—Salamo 145:16.

 To momoui tukulagi e tau kapitiga he Atua. Ko e mena fakaalofa uho e moui tukulagi ka foaki he Atua ki a lautolu kua kumi hana kapitiga. (Roma 6:23) Manamanatu la ke he moui nakai fai fakaotiaga ka moua e koe!

To fai magaaho a koe ke taute e tau mena loga. Liga manako a koe ke ako ke iloa e puhala ta leo fakatagitagi. Po ke liga manako a koe ke ako ke vali fakatino po ke eke mo tagata kamuta. Liga manako a koe ke ako hagaao ke he tau manu totolo po ke tau akau. Po ke liga manako a koe ke fano fenoga mo e kitia e tau motu kehekehe mo e tau tagata. He moua e moui tukulagi ka maeke e tau mena oti nei!

To fai magaaho a koe ke taute loga e tau kapitiga. Ko e moui tukulagi ka maeke ke iloa e falu foki ne kua eke mo tau kapitiga he Atua. To maeke ia koe ke iloa e tau taleni mo e tau aga mitaki ha lautolu, ti eke foki a lautolu mo tau kapitiga hau. To fakaalofa a koe ki a lautolu, to fakaalofa foki a lautolu ki a koe. (1 Korinito 13:8) To ta atu he moui tukulagi ki a koe e magaaho ke kapitiga atu mo e tau tagata oti he lalolagi! Mua ue atu ai, ko e kapitiga hau mo Iehova to tupu malolo fakahaga he mole atu e tau senetenari. Kia eke a koe mo kapitiga tukulagi he Atua!