Ko Iesu Keriso ko e Tama ha Iehova mo e kapitiga tata lahi mahaki mo e hofihofi hana. Ato moui a Iesu ko e tagata ke he lalolagi, ne moui fakamua a ia he lagi ko e mena moui fakaagaga malolo ue atu. (Ioane 17:5) Nukua hau ai a ia ke he lalolagi ke fakaako e tau tagata ke he kupu moli hagaao ke he Atua. (Ioane 18:37) Kua foaki foki e ia hana moui fakatagata ke fakahao aki e tau tagata omaoma mai he hala mo e mate. (Roma 6:23) Ko Iesu mogonei e Patuiki he Kautu he Atua, ko e fakatufono he lagi ka ta mai e Parataiso ke he lalolagi nei.—Fakakiteaga 19:16.

Ko e tau kapitiga foki he Atua e tau agelu. Nakai kamata e tau momoui he tau agelu ko e tau tagata he lalolagi. Kua tufuga a lautolu he lagi ato taute he Atua e lalolagi. (Iopu 38:4-7) Totou miliona e tau agelu ne ha ha i ai. (Tanielu 7:10) Kua manako e tau kapitiga nei he Atua he lagi ke ako he tau tagata e kupu moli hagaao ki a Iehova.—Fakakiteaga 14:6, 7.

Fai kapitiga foki e Atua he lalolagi; ne ui e ia a lautolu ko e tau fakamoli hana. Ko e tagata fakamoli he hopoaga kua talahau e mena ne iloa e ia hagaao ke he taha tagata po ke taha mena. Kua tala age he Tau Fakamoli a Iehova ke he falu e mena kua iloa e lautolu hagaao ki a Iehova mo e hana finagalo. (Isaia 43:10) Tuga e tau agelu, kua manako e Tau Fakamoli ke lagomatai a koe ke ako e kupu moli hagaao ki a Iehova. Manako a lautolu ke eke a koe mo kapitiga foki he Atua.