Ke eke mo kapitiga he Atua, kua lata ia koe ke ako hagaao ki a ia. Iloa nakai he tau kapitiga e higoa hau ti fakaaoga nakai? Iloa e lautolu. Manako e Atua ke iloa e koe hana higoa ti fakaaoga foki. Ko e higoa he Atua ko Iehova. (Salamo 83:18; Mataio 6:9) Kua lata foki ia koe ke ako e tau mena kua loto a ia ki ai mo e tau mena ne nakai loto a ia ki ai. Kua lata ia koe ke iloa ko hai hana tau kapitiga mo e ko hai e hana tau fi. Kua fai magaaho ke maeke ke iloa taha tagata. Talahau mai he Tohi Tapu kua pulotu ke toka kehe taha magaaho ke ako hagaao ki a Iehova.—Efeso 5:15, 16.

Kua taute he tau kapitiga he Atua e mena kua fakafiafia a ia. Manamanatu ke he tau kapitiga hau. Ka taute fakakelea e koe a lautolu mo e taute e tau mena ne vihiatia e lautolu, to matutaki nakai a lautolu mo tau kapitiga hau? Nakai pihia! Ti tatai foki ni, ka manako a koe ke eke mo kapitiga he Atua, kua lata ia koe ke taute e mena kua fakafiafia a ia.—Ioane 4:24.

Nakai takitaki e tau lotu oti ke kapitiga mo e Atua. Ko Iesu, ko e kapitiga tata lahi he Atua, ne tutala ke he ua e puhala. Taha puhala kua pulahi mo e puke he tau tagata. Kua takitaki e puhala ia ke he malaia. Ko e taha puhala kua pukilu mo e tokogaogao e tagata ne o ai. Kua takitaki atu e puhala ia ke he moui tukulagi. Ko e kakano anei, kaeke ke manako a koe ke moua e tuaga kapitiga he Atua, kua lata ia koe ke ako e puhala hako ke tapuaki ki a ia.—Mataio 7:13, 14.