Manako e Atua ki a koe ke eke mo kapitiga hana. Kua manamanatu nakai a koe na maeke ia koe ke eke mo kapitiga he Peresona lahi ue atu he lalolagi mo e lagi katoatoa? Ko Aperahamo, ne moui he vaha i tuai, ne talahaua ko e kapitiga he Atua. (Iakopo 2:23) Ko e falu ne talahau i loto he Tohi Tapu kua olioli foki e tuaga kapitiga mo e Atua ti lahi mahaki e fakamonuina ha lautolu. He vaha nei, ko e tau tagata he tau kalakala oti he lalolagi kua eke mo tau kapitiga he Atua. Eke foki a koe mo kapitiga he Atua.

Kua mua e mitaki he eke mo kapitiga he Atua he kapitiga mo e ha tagata. Nakai fakaita he Atua hana tau kapitiga fakaalofa. (Salamo 18:25) Kua mua e mitaki he eke mo kapitiga he Atua ke he muhu koloa. Ka mate e tagata muhu koloa, ti fano e tupe hana ke he falu. Ka ko lautolu ne olioli e tuaga kapitiga mo e Atua kua moua e tau koloa ne nakai maeke he taha ke fofo.—Mataio 6:19.

Liga lali falu tagata ke taofi a koe he ako hagaao ke he Atua. Liga taute he falu he tau kapitiga mo e magafaoa hau e mena nei. (Mataio 10:36, 37) Ka feki falu ki a koe po ke fakamatakutaku a koe, huhu hifo ki a koe ni, ‘Ko hai haku ne manako ke fakafiafia—ko e tau tagata po ke Atua?’ Manamanatu ke he mena nei: Ka fai tagata ne tala atu ki a koe ke taofi e kai, to omaoma nakai a koe ki a ia? Nakai pihia! Lata ia koe ke kai ke moui. Ka e taute he Atua a koe ke moui tukulagi! Ti aua neke toka ha tagata ke taofi a koe he ako e puhala ke maeke a koe mo kapitiga he Atua.—Ioane 17:3.