Ka manako a koe ke eke mo kapitiga he Atua, kua lata ia koe ke makutu ke he lotu kua talia he Atua. Ne pehe a Iesu “ko lautolu ne tapuaki fakamoli” ka tapuaki ke he Atua fakalagotatai mo e ‘kupu moli.’ (Ioane 4:23, 24) Taha ni e puhala hako ke tapuaki ke he Atua. (Efeso 4:4-6) Kua takitaki e lotu moli ke he moui tukulagi, ka e takitaki e lotu fakavai ke he malaia.—Mataio 7:13, 14.

Mailoga e koe e lotu moli he onoono ke he tau tagata hane fa e gahua ai. Ha kua mitaki a Iehova, kua lata foki hana a tau tagata tapuaki moli mo tau tagata mitaki. Tuga ni e akau mitaki ne fua mai e tau fua mitaki, kua moua mai he lotu moli e tau tagata mitaki.—Mataio 7:15-20.

Hokulo e fakalilifuaga he tau kapitiga ha Iehova ke he Tohi Tapu. Iloa e lautolu na mai he Atua e Tohi Tapu. Kua fakaata e lautolu e mena kua talahau mai i loto ke takitaki e tau momoui ha lautolu, ke fakamafola e tau mena vihi ha lautolu, mo e ke lagomatai a lautolu ke ako hagaao ke he Atua. (2 Timoteo 3:16) Lali a lautolu ke fakagahuahua e mena kua fakamatala e lautolu.

 Fakakite he tau kapitiga ha Iehova e fakaalofa ke he taha mo e taha. Kua fakakite e Iesu e fakaalofa ma e tau tagata he fakaako a lautolu hagaao ke he Atua, he fakamaulu a lautolu ne gagao. Ko lautolu kua taute e lotu moli kua fakakite foki e fakaalofa ke he falu. Tuga a Iesu, kua nakai onoono hifo a lautolu ki a lautolu ne mativa po kua mai he matakau motu kehe. Ne pehe a Iesu to kitia he tau tagata hana tau tutaki he fakaalofa ne fakakite e lautolu ke he taha mo e taha.—Ioane 13:35.

Kua fakalilifu he tau kapitiga he Atua e higoa he Atua, ko Iehova. Ka fai tagata ka fakaheu ke fakaaoga e higoa hau, to eke kia e tagata ia mo kapitiga tata hau? Nakai! Ka fai kapitiga a tautolu, fakaaoga e tautolu e higoa hana ti talahau e tautolu e tau mena mitaki ke he falu hagaao ke he kapitiga ia. Ti ko lautolu kua manako mo tau kapitiga he Atua kua lata ke fakaaoga hana higoa mo e tutala ke he falu hagaao ki a ia. Manako a Iehova ke taute e tautolu e mena ia.—Mataio 6:9; Roma 10:13, 14.

Tuga a Iesu, kua fakaako he tau kapitiga he Atua e tau tagata hagaao ke he Kautu he Atua. Ko e fakatufono he lagi e Kautu he Atua ka fakafou e lalolagi ke he parataiso. Kua talahau he tau kapitiga he Atua e tala mitaki hagaao ke he Kautu he Atua mo e falu.—Mataio 24:14.

Kua lali e Tau Fakamoli a Iehova ke eke mo tau kapitiga he Atua. Kua fakalilifu e lautolu e Tohi Tapu mo e fefakaalofaaki na lautolu. Kua fakaaoga mo e fakalilifu foki e lautolu e higoa he Atua mo e fakaako falu hagaao ke he Kautu he Atua. Kua fakagahuahua he Tau Fakamoli a Iehova e lotu moli he lalolagi he vaha nei.